Marcu 9:19 - ꞌRe Ihâimana Uꞌâsi Mono Zadawa Wasuꞌu

¹⁹ Tawamhã aibâ mreme te te wapari wamhã, ma tô tisiré 're inomro mono norĩ ma tinha, ãne: — E niha bété ai'rata za'ra wa'aba 're ĩnhamra u'âsi mono nherẽ, asina 're ĩ'umnhasi za'ra wa'aba mono õ di bété, te 're i'aipawaptob za'ra wa'aba mono zéb da hã. E ĩpẽ'ẽzé u'âsi, wa za asiré za'ra wa'aba hã 're mo, asina 're ĩ'umnhasi za'ra wa'aba mono õ wa. Ma'ãpé, ai'repudu hã we ĩtẽme asiwi saprõni aba.

Marcu 9:19 ပူးပေါင်းရင်းမြစ်များ

Salmu 78:22

E marĩ wa. Ta norĩ hã 'Re ihâimana u'âsi mono te te 're saze za'ra mono õ wa, duré tiwaihu'u pese na za te te 're isõ'reptu za'ra mono zém na te te sina 're umnhasi za'ra mono õ wa.

Mateu 17:17

Tawamhã Zezusi ma tô tinha, ãne: — E niha ai'rata 're ĩnhamra u'âsi za'ra wa'aba mono nherẽ, asina 're ĩ'umnhasi za'ra wa'aba mono õ di, te 're i'aipawaptob za'ra wa'aba mono zéb da na hã. Nimosi aipoto té wa'aba mono hã i'aihâimana wasété za'ra wa'wa. E ĩpẽ'ẽzé u'âsi, wa za asiré wa'aba hã 're morĩ u'â, 're ĩ'umnhasi za'ra wa'aba mono õ wa. Ma'ãpé we ĩtẽme asiwi saprõni aba, ai'repudu hã.

Marcu 16:14

Tawamhã Zezusi hã tisiré 're inomro mono norĩ u ma duré wi, sai ma, si'ubumroi ré, 11 na ihâiba za'ra u. Tawamhã timreme ma tô tãma pẽtẽ za'ra, siwi isabui'wa norĩ nhimirowasu'u hã te te saze za'ra õ wa, apâ ihâiwa'utuzém na da te iwasu'u na hã.

Marcu 9:18

Wa'uburé hã te te 're wabzuri, ti'ai u. Tawamhã isadaipro hã te tiwi 're pusi. Te duré 're 'wahãihãsi. Te duré 're sitete. Te duré 're sib'uwa. Wa tô aré waptẽrẽ za'ra, asiré 're inomro mono norĩ hã wa'uburé te te siwi me da, tãma. Tane nherẽ, tãma waihu'u za'ra õ di, ĩ'ra ma, te te siwi ime da hã.

Marcu 9:20

Tawamhã ma tô itẽme siwi saprõ, ai'repudu hã. Itẽme te te siwi ãwisi wi, te wa'uburé Zezusi hã 'madâ. Tahawa, te sisa'u ai'repudu hã wasutu. Sa'ẽtẽ te 're sipizari, ti'ai wa. Ma duré sadaiproi waze.

Luca 24:25

Tawamhã Zezusi hã te asa tãma nharĩ zahuré, ãne: — E niha bâ bété, waihu'u su'u aba õ di, sazei aba da, 'Re ihâimana u'âsi mono zadawa 'mahârâ 'rata 'wa norĩ nhimirowasu'u mono bâ, Danho'reptui'wa na rob'ui'éré hã. Danho'reptui'wa da, 'Re ihâimana u'âsi mono te te ipisudu hã te za a'â robzépata, rowasédé, da te tãma 'manharĩ wamhã. Taha parip si, te za rowẽ ãma 're sãmra, 'Re ihâimana u'âsi mono te te tãma ipisutuzéb uwaibaba.

Luca 9:41

Tawamhã te Zezusi hã tãma nharĩ za'ra, ãne: — E niha bété, ai'rata 're ĩnhamra u'âsi aba mono nherẽ, asina 're ĩ'umnhasi za'ra wa'aba mono õ di, te 're i'aipawaptob za'ra wa'aba mono zéb da hã. E niha te aiwasété na si 're anomro aba mo. E ĩpẽ'ẽzé u'âsi, wa za ai'rata 're ĩmorĩ 'wa, 're ĩ'umnhasi za'ra wa'aba mono õ wa. Tahawa, te aibâ ma tinha, ãne: — We ĩtẽme saprõni pé, ai'ra hã.

Zuwã 12:27

— Ãhã na te ĩsina rosa'rata ahâ di. E Ĩmama ma, wa za ĩsi'ru, te te dawi ĩnho'reptu da, ĩdâ'â õ ré, te robzépata tõ da. Mare di. Tãma ĩsi'rui õ di za, te te dawi ĩnho'reptu da hã. Dazada ĩdâ'â da si, wa wei mo.

Zuwã 20:27

Tawamhã Zezusi te Tomehẽ ma tinha, ãne: — We ĩtẽme aimorĩ, ĩnhib'rada 'madâ'â da. Ĩnhib'rata zapu'uzéb 're, asipto hã sẽrẽ. Duré ĩ'a're wi ĩwa'rézéb 're, asib'rada hã sẽrẽ. Ĩhâiwa'utuzém na ĩwasu'u na, ĩwawã tõ. Te za oto ĩzaze, ĩhâiwa'utuzém na hã.