Marcu 8:34 - ꞌRe Ihâimana Uꞌâsi Mono Zadawa Wasuꞌu

³⁴ Taha pari, Zezusi te duré sima dazô hâ, uburé itẽme dasi'rã'õtõ mono da. Tisiré 're inomro mono norĩ zô zama, te duré tihârâ za'ra sima. Tawamhã ãne ma si'ãma dama rowaihu'u: — Ni'wam norĩ hã ĩsiré 're nomro u'âsi mono da, te te sima 're ĩwẽ za'ra mono wamhã, tihâimanazém na te te 're rosa'rata za'ra mono õ di za. Tiza'ozéb ré, ĩzarina 're inomro mono ne, da te dasiwi uprosi da nherẽ, te za ĩsiré 're nomro.

Marcu 8:34 ပူးပေါင်းရင်းမြစ်များ

Mateu 10:38

Wedepo'o nhonhi'rãmi hã, daza'ozéb da, da te dasisada 're i'wasari mono ne, ni'wam norĩ hã da te 're simroi mono da nherẽ, sisawi ãna ĩzarina 're nomro mono wapsi, te za ĩ'ãma 're hâimana u'âsi za'ra. Duré ãne na 're hâimana za'ra mono õ wamhã, ĩ'ãma 're nomro waihu'u mono õ di za.

Mateu 16:24

Tawamhã Zezusi te duré tãma nharĩ za'ra, tisiré 're inomro mono norĩ ma, ãne: — Ni'wam norĩ hã ĩsiré 're nomro u'âsi mono da, te te sima 're ĩwẽ za'ra mono wamhã, tihâimanazém na hã te te 're rosa'rata za'ra mono õ di za. Tiza'ozéb ré, ĩzarina 're inomro mono ne, te za ĩsiré 're nomro, da te 're simroi mono da nherẽ hã.

Mateu 27:32

'Ri nho'õmo nhiti Zezusi hã te te oto siwi wazere wamhã, aibâ hã ma tô siwi tisã, Sima na isisi hã. Sireni na isa'ru nhisi hã. Te te siwi sãmri wamhã, ma tô tãma 'ru za'ra da'wapéi'wa norĩ hã, wedepo'o nhonhi'rãmi hã tinhisé te te tãma âri da, Zezusi te te sisada i'âri hã.

Marcu 10:21

Tawamhã Zezusi hã te aibâ 'madâ, isawi hã tãma hâimana sina. Ãne te tãma tinha: — Zahadu te misi aiwi sô rowaptâ, tãma ãma i'uwaimrami'õ hã. Mo oto aimorĩ apâ, asibro hã uburé dama wede mono da, iwa'âbâ zô, isibrob'õ norĩ ma, sõmri mono da. Ãne wamhã, duré asibro pese di za, hâiwa ãma. Taha parip si, te za we apâ aimo ĩtẽme, ĩsiré 're aimorĩ da hã oto.

Marcu 7:14

Tawamhã Zezusi te duré sima dazô hâ, te te dama roti da, ãne: — Ma'ãpé, ĩnhimirowasu'u hã wapari pese za'ra wa'aba za, marĩ hã waihu'u za'ra wa'aba da ãma.

Luca 13:24

— Tô sena, te za niwapsi da'ahâ na da te dasima 're wẽ za'ra, 'Re ihâimana u'âsi mono u 're danhisisi mono da. Tazahã, itẽme 're danhisisi mono õ di za. Tahawa, 'ri para u 'ridawa 're su'ure na 're danhisisi mono da, sada 're idanhiptete za'ra mono ne, te za sada 're asiptete za'ra wa'aba mo, 'Re ihâimana u'âsi mono u 're asisisi aba mono da.

Luca 18:22

Isihâimanazéb 'rãzarõno hã te te wapari wamhã, te asa tãma tinha, ãne Zezusi hã: — Tane nherẽ, misi te zahadu aihâimanazéb zô aiwi rowaptâ. Ma'ãpé, uburé asibro hã dama wede mono, iwa'âbâ zô, isibrob'õ norĩ ma, sõmri mono da. Tawapsi, asibro pese di za, hâiwa ãma hã. Asibro hã dama wede mono parip si, te za apâ we ĩtẽme aimo, ĩsiré 're aimorĩ da oto.

Luca 20:45

Tawamhã uburé, da te wapari za'ra ré, te Zezusi hã tinha, tisiré 're inomro mono norĩ ma, ãne:

Luca 9:23

Tawamhã te uburé oto dama tinha, ãne: — Ni'wam norĩ hã ĩsiré 're nomro u'âsi mono da, te te sima 're ĩwẽ za'ra mono wamhã, tihâimanazém na te te 're rosa'rata za'ra mono õ di za. Awẽ sidâpâsi, tiza'ozéb ré, ĩzarina 're inomro mono ne, da te dasiwi uprosi da nherẽ, te za ĩsiré 're nomro.

Zuwã 10:27

Ĩnhib'a'uwẽ si te za ĩmreme hã te te 're wapari pese za'ra. Duré pone'ẽrebâ tede'wa, tinhimizama te te 're i'awaihu'u mono ne, wa tô ĩnhib'a'uwẽ norĩ hã waihu'u za'ra. Ta norĩ si te za ĩnhimiroti hã te te 're 'madâ'â pese za'ra.

Zuwã 19:17

Tawamhã 'ri nhiti te oto siwi saprõ, Zezusi hã. Wedepo'o nhonhi'rãmi hã te sisada ti'â, Da'rãihi na romnhisi u. Hebreu norĩ mreme na Gogota na romnhisi hã. Tamomo te te siwi ãwisi za'ra wamhã, wedepo'o nhonhi'rãmi na ma tô oto siwi sasõ, da'wapéi'wa norĩ hã. Aibâ norĩ wa'wa, ma tô siwi sasõ. Aibâ maparane te ãma aiwa'aba zahuré, da te dasiwi isasõmri zahuré hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 14:22

'Ri nho'õmo wa'wai baba neb zahuré wamhã, ma tô isazei'wa norĩ hã pawaptob za'ra, hâimana nhiptete na 're nomro mono da, 'Re ihâimana u'âsi mono ãma te te 're sasõmri u'âsi za'ra mono da. Ãne te duré tãma nharĩ za'ra: — A norĩ wa'wa hã Zezusihi zazei'wai wa, marĩ iwasédé hã da te aima 're 'manharĩ za'ra wa'aba mono wamhã, tãma 're aipahi za'ra wa'aba mono õ di za. Ãne na hã te za tô 're irobzépata za'ra wa'aba mo. Tane nherẽ, 'Re ihâimana u'âsi mono nhib'a'uwẽ oto 're anomro aba mono wa, te za niwapsi hâiwa ãma i'rata 're aihâimana u'âsi za'ra wa'aba mo, rowẽ na. — Ãne te tãma nharĩ za'ra.

Roma 6:6

Wawasété na 're iwanomro 'rata mono zé hã, tâibâ oto. Cristu hã wedepo'o nhonhi'rãmi na idâ'â siré, ma tô 'Re ihâimana u'âsi mono hã te te wama 're a'uprosi, 're iwanomro 'rata mono zé hã. Marĩ iwasétére si, wa te wasima 're i'ruiwapari u'âsi za'ra mono zém hawi, te te 're wa'anho'reptui mono da, ma tô te te wama 're a'uprosi, 're iwanomro 'rata mono zé hã. Wawasédé hã wa te 're sahâri waihu'u za'ra mono ãna, 're wanomro mono tõ da, ma tô te te wawi 're a'uprosi. Ãne hã wama waihu'u pese za'ra di.

Roma 8:17

'Re ihâimana u'âsi mono 'ra, oto 're wanomro mono wa, marĩ iwẽ na tinhib'a'uwẽ ma, 're isõpru mono zéb da, te te tãma 're iropisutu za'ra mono zéb ré, wa za 're wahâimana za'ra. Duré uburé marĩ iwẽ na Cristuhu ma, isõprubzéb da, te te tãma iropisutuzéb ré, wa za isiré 're wahâimana za'ra. Zezusihi ne, wa te 're robzépata za'ra mono wamhã, wa za isine rowẽ uptabi na 're wahâimana za'ra.

1 Corĩtu 15:31

Ĩsisãnawã norĩ, awẽ sidâpâsi aré 're ĩdâ'â u'âsi mono nherẽ, wa tô te dama 're rowasu'u u'âsi, iwasu'uwẽ na. Wa norĩ hã Wanhib'apito Cristu Zezusihi ãma simisutu oto 're wanomro mono wa, tô sena aima 're ĩtoi uptabi za'ra wa'aba mono zéb zarina, wa tô sena na aima ĩsiwasu'u za'ra wa'wa, ãne na hã.

1 Corĩtu 8:13

Ãté ĩsisãnawã norĩ hã te za te te sima 're rosa'rata za'ra, dasa hã romhâiba 'manharĩ ma, da te 're isõmri za'ra mono na, dasiré ãma 're saihuri mono wa, tiwasédé te te 're i'manharĩ za'ra mono na hã. Ãne wamhã, taha na wa hã dame 're ĩsa zahu mono õ di za oto, ĩsisãnawã norĩ hã tiwasété u 're sipizari zahu za'ra mono tõ da, apâ.

1 Corĩtu 9:19

Wa hã ĩpawa'âbâ ré, 're ĩhâimana mono õ di. Tahawa, ĩwada'uri zarina si, te 're romhuri mono õ di. Tane nherẽ, wa tô ĩsima wẽ, dapawa'âbâ ãna dama romhuri'wa norĩ ne, te dama 're romhuri u'âsi mono da, ĩnhimirowasu'u zarina, Cristu hã da te 're isaze za'ra mono da si, da'ahâ na.

Galata 5:24

Cristu Zezusihi nhib'a'uwẽ 're idahâimana za'ra mono norĩ hã, tiwasédé hã aré te te 're 'manharĩ ze za'ra mono nherẽ, duré tiwasété zô aré te te 're rowasutu za'ra mono nherẽ, 'râwi te za tô oto te te siwi 're wẽ'õ pese za'ra, te te 're 'manharĩ za'ra mono tõ da hã oto.

Galata 6:14

Tanei õ di, wa hã. Wanhib'apito Zezu Cristuhu ãma si, wa za 're ĩwata u'âsi, wedepo'o nhonhi'rãmi na wazada idâ'â ãma. Tahawa, tiza'ozém na wazada dâ'â wa, ĩwi 're idadâ'â za'ra mono ne, duré wa hã dawi 're ĩdâ'â mono ne, ti'ai ãma danhimirosa'rata na hã oto 're ĩhâimana mono õ di.

Filipu 3:10

Cristu hã 'râwi te iwaihu'u pese da si, wa tô oto ĩsima wẽ, wa hã. Ta hã dâ'â nherẽ, apâ hâiwa'utu wa, te oto siptete sina 're hâimana u'âsi. Tane duré, wa hã 're ĩhâimana 'rata mono zé hã oto ĩma si'utõrĩ wa, duré taha wa'rãmi ĩhâimanazép tém na si oto 're ĩhâimana mono wa, wa ĩsima wẽ, ĩnhiptete sina taha ãma si oto 're ĩhâimana mono da, isimipawaptobzé iwẽ ré si. Ãne hã wa tô duré ĩsima wẽ, Cristu hã ti'ab ré te te 're irobzépata mono ne, te 're irobzépata mono da si, isine. Cristu hã dazada idâ'â ne, 're ĩhâimana 'rata mono zé hã ĩma isi'utõrĩ da si, wa tô ĩsima wẽ, 'Re ihâimana u'âsi mono hã te te sima ĩwẽ wamhã, te te ĩma pisutu da, isiré 're ĩhâimana u'âsi mono zéb da hã.

Filipu 3:7

Ãne na 're ĩhâimana 'rata mono zém na aima ĩsi'rãzarõtõ za'ra wa'aba zé hã ĩma wẽ di aré, taha si ĩma pire wa, taha zarina 'Re ihâimana u'âsi mono te te ĩwẽsãmri da newa. Tane nherẽ, Cristuhu ma oto 're ĩhâimana mono wamhã, tarére oto ĩma hã, 're ĩhâimana 'rata mono zé hã.

Colosu 1:24

Wa hã ai'udâna za'ra wa'aba, te ai'ãma 're robzépata za'ra wa'aba mono nherẽ, wa ĩto sina 're ĩhâimana. Cristuhu ma si, te 're romhuri mono wa, wa tô te 're robzépata za'ẽtẽ tô, ta hã ti'ai ãma 're morĩ ré, dazada te te irobzépata ne. Tane nherẽ, Cristuhu nhib'a'uwẽ norĩ ma, ĩnhimiromhuri na te tãma ãma 're uwaimrami mono da, wa za tô taha na te 're robzépata u'âsi.

Colosu 3:5

Ti'ai ãma isazei'õ'wa norĩ hâimanazéb zarina, marĩ wasété zô 're irob'ruiwapari za'ra wa'aba mono zé hã te za 'râwi asiwi 're i'uprosi pese za'ra wa'aba mo, 're dadâ'â za'ra mono wa, marĩ zô da te oto 're irob'ruiwapari za'ra mono õ ne. Pi'õ na aibâ na zama siwa'ru aiwasédé, 're i'manharĩ za'ra wa'aba mono zé hã te za 'râwi 're i'uprosi pese za'ra wa'aba mo asiwi, duré asisô 're irowasutu za'ra wa'aba mono zé hã, duré marĩ wasété zô si asima 're irob'ruiwapari za'ra wa'aba mono zé hã, duré danhipai u asibro pese na 're aihâimana za'ra wa'aba mono da, marĩ zô si asima 're i'asõpré wa'aba mono zé hã. Ãne hã 'Re ihâimana u'âsi mono ma, wẽ õ di, marĩ zô i'upana asima 're irob'ruiwapari za'ra wa'aba mono zé hã. Tahawa, te za tô uburé aiwasédé hã asiwi 're i'uprosi pese za'ra wa'aba mo, aiwi 're si'utõrĩ pese za'ra wa'aba mono wa, 're anomro wẽ wa'aba mono da oto.

2 Tesalonita 3:11

Ni'wam norĩ hã asiré wa'aba 're isi'ubumroi mono norĩ hã, isazei'wa nherẽ, taré te, u, 're hâimana za'ra. Te te 're romhuri za'ra mono õ di, u. Taré te, u, te te dawi 're ro'wa'rutu za'ra, da te 're iromhuri pese za'ra mono norĩ wi. Ãne wa, wa aima ãma sahu za'ra wa'aba ni, wanhimiroti na hã.

Titu 2:12

Ta hã te te 're wa'azawi pese mono wa, ma tô wama waihu'u, wa te 're rẽme pese za'ra mono da, isazei'õ'wa norĩ hâimanazé hã, dawẽ te, wawasété zô wa te 're rowasutu tõ za'ra mono da, ti'ab ré wasina 're wanhiptete za'ra mono da, 'Re ihâimana u'âsi mono ãma si oto 're wanomro wẽ mono da.

Hebreu 13:13

Tahawa, wa za oto wa norĩ hã Zezusihi u si dawi 're wawairébé, taha si tô sena te te 're wa'anho'reptui mono da. Tahawa, wa za tô, 're idanomro 'rata mono zé hã, wa te 're rẽme pese za'ra. Zezusi hã wazada dâ'â wa, da te dasiwi i'ruiwapari ne, da te 're wa'ruiwapari za'ra mono da nherẽ, wa za tô itẽme 're wawairébé, 're iwanomro 'rata mono zém hawimhã, Zezusihi u hã.

1 Pedru 4:1

Cristu hã ma tô tihâiba na robzépata. Tahawa, te za asina 're asiptete za'ra wa'aba mo, asihâiba zawi ãna, isine 're irobzépata za'ra wa'aba mono zéb da hã. Ãne, da te 're robzépata za'ra mono wamhã, marĩ, da te 're i'manharĩ wasété za'ra mono zé hã, te za oto da te 're rẽme pese za'ra.

1 Pedru 4:13

Cristu hã aiwana za'ra wa'aba, ma tô robzépata za'ẽtẽ. Tahawa, isine 're robzépata za'ra wa'aba mono wa, te za aipẽ'ẽ 're, 're ato za'ra wa'aba mo. E marĩ wa. Cristu hã tiwaihu'u pese na apâ wei morĩ wapsi, ato za'ẽne hã aima 're hâimana za'ra wa'aba mono wa.

1 Zuwã 3:16

E niha wa za, 're idasisawi pese za'ra mono zé hã waihu'u pese za'ra ni. Ãne wa za waihu'u pese za'ra ni. Cristu hã te te 're wa'azawi pese mono wa, ma tô sisawi ãna wazada tidâ'â za'ra. Taha zarina wa za duré wa norĩ hã 're wasipawaptob za'ra, 're wasisõ'reptu za'ra mono da. 'Re wadâ'â za'ra mono da nherẽ, wa za tô 're wasipawaptob za'ra, 're wasihâiba zawi za'ra mono ãna. Ãne 're idasisawi pese za'ra mono zé hã za oto.

Apocalipsi 2:10

Za 're irobzépata za'ra wa'aba mono zém na hã asina 're aipahi za'ra wa'aba mono õ di za. Ĩwapari pese za'ra wa'aba. Wa'uburé hã nimahã na te za dama ai'mai'ru wasété 'wa, da te ai'maimrami aba da, dazazéb 're, da te ai'manheme aba da, te te aipibu za'ra wa'aba da, tô sena ĩzaze za'ra wa'aba zô. Tawamhã 10 na bâdâ hã te za ai'ãma 'maihai'utõrĩ 'wa, dazazéb 're ai'masima'wara aba ré, niha aihâiba za'ra wa'aba na 're 'mairobzépata za'ra wa'aba mono ré hã. Ãne wamhã, ma'ãpé asiwi ĩrẽme aba tõ, tô'ã. Tawamhã da te ai'manhimroi wa'aba zém na ai'masi'utõrĩ aba nherẽ, ĩ'mairẽme aba õ wamhã, duré dawi ĩ'mai'udâ wa'aba õ wamhã, wa za aima wa'âbâ za'ra wa'wa. Rowẽ, wa za aima pisutu za'ra wa'wa, ĩ'rata 're i'ai'ubumroi u'âsi aba mono zéb da hã.