Marcu 8:31 - ꞌRe Ihâimana Uꞌâsi Mono Zadawa Wasuꞌu

³¹ Tawamhã ãne te Zezusi hã tãma siwasu'u za'ra, tisiré 're inomro mono norĩ ma: — Ti'ai ãma Dasiré Ipodo hã, 'Re ihâimana u'âsi mono te te tãma ipisutuzéb zarina, te za robzépata za'ẽtẽ. Dama roti'wa norĩ hã te za siwi wẽ'õ za'ra, ihi norĩ hã. Sasedoti ipire norĩ zama, duré dama rowahutu'wa norĩ zama, te za siwi wẽ'õ za'ra. Tawapsi te za dasiwi wĩrĩ ni. Tawamhã bâdâ maparane ãma si'utõrĩ õ ré, te za hâiwa'udu apâ.

Marcu 8:31 ပူးပေါင်းရင်းမြစ်များ

Salmu 118:22

Ẽtẽ tõmo waré hã wẽ nherẽ, 'ri'wa norĩ wasété newa, te te siwi iwẽ'õ hã, aré 'ri na'ratazéb da ihâiba hã te taré nherẽ, danhipai u pire uptabi na 'ri na'rata sisasé ãma oto 're sa'wari u'âsi, wẽ nherẽ.

Zona 1:17

Tawamhã Uburé Danhib'apito hã ma tô tebe hã isa'ẽtẽ ma ti'ru, Zona te te sõmri da hã, hâiba wahuré. Tame, te si'ubdatõ bâtâ 're duré si'ubdatõ mara na, tepe za'ẽtẽ waihõ 'remhã tihâiba.

Mateu 21:42

Tawamhã Zezusi hã te oto sina ãma simiré'é ẽtẽ na, ãne: — Oro 'Re ihâimana u'âsi mono zadawa wasu'u na rob'ui'éré hã 're sõré za'ra wa'aba mono za, aima waihu'u za'ra wa'aba õ di bété. Ãne ibaihâ na rob'ui'éré hã: “Ẽtẽ tomhâpâ wẽ 'ri na'ratazéb da, wẽ uptabi nherẽ, wasété newa, 'ri'wa norĩ te te siwi iwẽ'õ hã te oto tô taré nherẽ pire na hã, 're sa'wari u'âsi. Uburé Danhib'apito hã ma tô ãne hã pisutu, 'ri na'rata uparizéb da, pire na 're isa'wari mono da hã. Tahawa, ãne na wa te ãma 're rosa'rata za'ra mono wamhã, wa ãma 're watob'uzu u'âsi za'ra, wa norĩ hã.”

Mateu 27:63

Itẽme si'rã'õtõ wamhã, ãne te tãma nharĩ za'ra: — Apito, õ hã isadawa nhipe hã zahadu 're morĩ ré, dama 're isiwasu'u mono zém na wa tô ãma wapo're pu'u za'ra ni, ãhã na hã. Ãne te dama 're siwasu'u: “Bâdâ si'ubdatõ ĩ'ãma si'utõrĩ õ ré, wa za apâ hâiwa'udu.” Ãne dama 're isiwasu'u mono zé hã.

Marcu 12:10

— Oro 'Re ihâimana u'âsi mono zadawa wasu'u na rob'ui'éré hã 're sõré za'ra wa'aba mono za, aima waihu'u za'ra wa'aba õ di bété. Ãne ibaihâ na rob'ui'éré hã: “Ẽtẽ tomhâpâ wẽ 'ri na'ratazéb da, wẽ uptabi nherẽ, wasété newa, 'ri'wa norĩ te te siwi iwẽ'õ hã te oto tô taré nherẽ pire na hã, 're sa'wari u'âsi.

Luca 17:25

Tazahã, te za a'â robzépata za'ẽtẽ, ã nimosi dapoto tém norĩ hã te te siwi wẽ'õ za'ra wa.

Luca 24:44

Tahawa, te Zezusi hã tãma nharĩ za'ra, ãne: — Romhâ ré wa tô aima rowasu'u za'ra wa'wa, ai'rata 're ĩnhamra za'ra wa'aba mono ré hã, marĩ hã za ĩzô iwairébé mono na, Mozésihi nhimi'ui'éré zarina, duré 'Re ihâimana u'âsi mono zadawa 'mahârâ 'rata 'wa norĩ nhimi'ui'éré zarina, duré isõ're na rob'ui'éré zarina.

Zuwã 12:48

Ni'wam norĩ hã te te 're ĩwẽ'õ za'ra mono wamhã, duré ĩmreme te te 're wẽ'õ za'ra mono wamhã, zahadu wapsi te za oto siwaihu'u za'ra, tiwasété na. Ti'a isi'utõrĩzéb ãma ĩmreme na po're pu'u za'ra wa, te za bâtâ na siwaihu'u za'ra, tiwasété na hã.

Zuwã 2:19

Tawamhã Zezusi te asa tãma nharĩ za'ra, ãne: — Ã hã 'ri hã asiwi sãmra aba wamhã, wa za apâ 'ri. Bâdâ si'ubdatõ na te za ĩ'ãma ne, apâ te 'ri ré hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 7:35

— Ãhã wa, te oto apâ mo, Mozési hã Ezitu u, tisiré norĩ te te sõ'reptu za'ra da. Tane nherẽ, Izaraéu nhihudu norĩ hã ma tô aré siwi watawa, ãne: “E 'wa sadawa para we aimorĩ bâ, wanhib'apito da, duré wa'ãma 're arowairébé mono da.” Tane nherẽ, 'Re ihâimana u'âsi mono hã ma tô apâ itẽme satõrĩ za'ra, Mozési hã. Tawamhã hâiwa ãma 'Re ihâimana u'âsi mono ma romhuri'wa hã, wedezapore ro'o wa'wa sô isãmra hã ma tô Mozési hã pawapto, Ezitu hawi te te danhimroi mono da apâ, danhipti'ai u.

1 Samuéu 10:19

Wa hã asib'apito za'ra wa'wa. Ĩwétési wa marĩ wi hã te 're asõ'reptu za'ra wa'wa, duré ropire hawimhã. Tane nherẽ, ãhã na hã ma tô asiwi ĩwẽ'õ wa'wa. Duré ma tô asiwi iwaptẽrẽ 'wa, apito hã te aima 'maipisutu za'ra wa'aba da hã. Wẽ di tô. Tahawa, ma'ãpé asi'rã'õtõ aba ĩnho're, aihi'rata norĩ nhihudu mono bâ duré aimama norĩ zarina ai'upsãtã aba mono bâ.”

1 Samuéu 8:7

Tawamhã ãne ma tô ãma sada'â, tãma imremezém na 'Re ihâimana u'âsi mono hã: — Te za ãma isada'âbâ za'ra, Izaraéu nhihudu norĩ te te aiwi irowaptẽrẽ za'ra na hã. Duré aiwétési te te siwi aiwẽ'õ õ di. Ĩzama ma tô duré siwi ĩwẽ'õ, Tinhib'apito za'ra na hã.