Marcu 7:31 - ꞌRe Ihâimana Uꞌâsi Mono Zadawa Wasuꞌu

³¹ Tawamhã Zezusi norĩ hã Tiru 'rata, hâimana za'ra pari, ma tô ai'aba'ré. Sidõ na daza'ru nhisi wa'wai baba, ma tô ro'rahâri za'ra. Duré Decapori na danhipti'a nho'õmo nhisi wa'wai baba, ma tô ro'rahâri za'ra, 10 na daza'ru wa'wai baba. Tawamhã Galiléa ãma â zaihâ u, ma tô aihutu, isõ'ui u.

Marcu 7:31 ပူးပေါင်းရင်းမြစ်များ

Mateu 11:21

Ãne te 'ri wa'õtõ ãma ma tinha Zezusi hã, 'ri wa'õtõ 're, 're idahâimana za'ra mono norĩ ma: — Corazĩ na 'ri wa'õtõ nhisi ãma 're aihâimana za'ra wa'aba mono norĩ ma, aima 're ropipa uptabi za'ra wa'aba mono di za, duré Besada na 'ri wa'õtõ nhisi ãma 're aihâimana za'ra wa'aba mono norĩ ma zama. Marĩ dama i'manharĩ waihu'u'õ hã asõ'a za'ra wa'aba, te 're i'ab'manharĩ wẽ mono ne, Tiru ãma 'ri nho'õmo ãma, duré Sidõ ãma 'ri nho'õmo ãma 're idahâimana za'ra mono norĩ nho'a, te dama 're ab'manharĩ mono 'wa'âhã, duréi te aré ta norĩ hã 're sipizari za'ra, tiwasété wi. Tiwasété wi 're isipizari za'ra mono zém na, da te 're waihu'u za'ra mono da, te aré 'ru'a hã ti'rã nhisiwi te te 're sa'wari za'ra. Te duré aré sa'u ihâiro na 're si'uza za'ra.

Mateu 4:18

Tawamhã Zezusi hã Galiléa na isõ'u nhisi zaihâi baba 're morĩ wamhã, ma tô aibâ norĩ hã sãmri zahuré, tepe mrami na romhuri'wa norĩ hã, tisisãnawãi me: Sima na isisi hã, Pedru na isisi amo hã. Duré ino hã Ãdré na isisi hã. Isõ'ui wa, te nasi ta norĩ hã abazipara hã wabzuri zahuré, tepe zô.

Mateu 4:25

Tahawa, ma tô da'ahâ uptabi na isarina dasi'ré, Galiléa hawimhã, duré Decapori hawimhã, duré Zeruzalẽ hawimhã, duré Zudéa na danhipti'a nho'õmo nhisi hawimhã. Duré Zodã pa zara niwĩ 're idasi'ubumroi mono norĩ zama ma tô itẽme hã dasito.

Marcu 5:20

Tawamhã te oto mo, aibâ hã. Zezusi, iwẽ na te te ipawaptobzém na, ma tô te te dama 're rowasu'u, Decapori na danhipti'a nho'õmo nhisi 're. Tawamhã isimirowasu'u na da te 're wapari za'ra mono wamhã, ma tô ãma 're datob'uzu za'ra.

Marcu 7:24

Tawamhã Zezusi norĩ hã te oto ai'aba'ré, darob amoi u, Tiru na 'ri nho'õmo nhisi 'rata, daro ihâimana tẽme. Tawamhã 'ri para u ma tô asisi. Tame isãmrazém na da te dasiwi iwaihu'uzéb da hã, te te sima wẽ õ di, Zezusi hã. Tane nherẽ, a'â da te sa'rese ãna, sãmra waihu'u õ di.

Marcu 7:30

Tawamhã pi'õ hã te apâ mo, tinhorõwa u. Wisi wamhã, rowẽ na ma tô ti'ra hã sabu, waptâ nomro ré. Iwana ma tô tãma watobro, wa'uburé hã. Tahawa, tãma hã rowẽ di oto.