Marcu 5:40 - ꞌRe Ihâimana Uꞌâsi Mono Zadawa Wasuꞌu

⁴⁰ Tawamhã asa te tãma nharĩ za'ra, ãne: — Oro taré sõtõ za. Pẽ'ẽzani õ di. Tawamhã Zezusi hã ma tô dama rob'ru, rob u dawairébé da, uburé. Si'ubdatõ isiré 're inomro mono norĩ hã ma tô isiré asisi, 'ri 're wa'wa u, inomrozéb u hã. Ina norĩ si, ma tô isiré tizasi zahuré.

Marcu 5:40 ပူးပေါင်းရင်းမြစ်များ

Zenezi 19:14

Tawamhã ãne te te tãma waihu'u zahuré wa, ma tô Lo, ti'ra sipi'õi mro norĩ da hã, te te po're pu'u za'ra da hã mo. Tahawa, ma tô ãne tãma nharĩ za'ra: — Awa'awi ã hawimhã aiwairébé aba. Uburé Danhib'apito, ã hã 'ri nho'u hã te za uprosi! Tane nherẽ, te ãma rosa'rata za'ra, sima to na te te tãma nharĩ za'ra newa.

Neemia 2:19

Tane nherẽ, Sãbalati norĩ, Tobiaha me duré Gesẽ, Arabia norĩ siré me, ãne na wa te i'manharĩ za'ra zé te te waihu'u za'ra wamhã, ma tô wa'ãma to za'ra sina wa'ãma aihâ za'ra. Tahawa te ãne wazadanharĩ za'ra: — E marĩ te bété asiwi i'manharĩ 'wa. E taha zarina apito da, aihâimana za'ra wa'aba da.

Salmu 22:7

Uburé da te dasiwi 're ĩ'madâ'â za'ra mono hã, te ĩ'ãma hã 're wa'ẽ za'ra. Te duré ĩma tizoto te te 're sani za'ra. Te duré ĩma 're 'rãsiwamnarĩ za'ra.

Mateu 15:11

Uburé marĩ na 're dasaihuri mono wa, dapẽ'ẽ 're, 're isisisi mono na 'râwi dapẽ'ẽ 'remhã 're dasiwasété za'ra mono õ di za. Dapẽ'ẽ hawim na danhimirosa'rata wasété zarina, da te dasima 're nharĩ wasété za'ra mono wapsi, te za 'râwi dapẽ'ẽ 'remhã 're dasiwasété za'ra.

Mateu 7:6

— Duré 'Re ihâimana u'âsi mono 'ruiwapari'wa norĩ ma, iwasu'uwẽ na tãma 're rowasu'u za'ra wa'aba mono õ di za, te te ãma 're iwasété za'ra mono norĩ ma hã. E marĩ wa. Ta norĩ hã wapsã ma, marĩ ise hã da te tãma 're a za'ra mono nherẽ, dazô 're sipizari za'ra mono wa, te te 're idahâzu mono ne, te za ta norĩ hã asada 're hâimana wasété za'ra wa'wa. Uhâbâ norĩ hã marĩ wẽ zô, sima 're sõpré waihu'u mono õ di. Marĩ iwẽ hã wa'âbâ za'ẽtẽ nherẽ, uhâbâi ma, da te 're sãmra mono wa, taré te te 're iwati'i za'ra mono ne, te za ta norĩ hã taré te te 're wapari za'ra, iwasu'uwẽ hã. Tahawa, ta norĩ ma, 're rowasu'u za'ra wa'aba mono õ di za, 'Re ihâimana u'âsi mono 'ruiwapari'wa norĩ ma hã.

Marcu 5:39

Tawamhã te dama tinha, ãne: — E marĩ wa, te ai'ahâ na aiwa'õ za'ra wa'wa. Azaruture hã dâ'â õ di. Taré te nhono.

Marcu 5:41

Tawamhã ma tô pa'â, Zezusi hã. Ãne te tãma tinha: — Tarita tumi. Ãne ãma isaprĩzé hã: “Azaruture ai'utu.”

Luca 16:14

Tawamhã farizeu norĩ hã ma tô Zezusihi mreme hã wapari za'ra. Tawamhã rob'uiprazé wẽ 'wa, 're nomro mono wa, ma tô Zezusihi ma nharĩ za'ra, ãne.

Zezusihi zadawa wasuꞌuꞌwa norĩ nhimiromhuri na robꞌuiꞌéré 17:32

Tawamhã dadâ'â nherẽ, apâ dahâiwa'utuzé wasu'u hã da te wapari za'ra wamhã, ma tô ãma dasima rowẽ za'ra ni. Tane nherẽ, ihâiba amo norĩ hã te ãne tãma nharĩ za'ra: — Nimahã bâtâ na wa za duré aiwapari za'ra ni, apâ 're idahâiwa'utu za'ra mono zé wasu'u na.