Marcu 5:22 - ꞌRe Ihâimana Uꞌâsi Mono Zadawa Wasuꞌu

²² Tawamhã aibâ hã ma itẽme wi, Zairu na isisi hã zudeu norĩ te, rowahutuzé 'madâ'â'wa hã. Itẽme wisi wi, ma tô hi'rãtitõ aime, Zezusihi papara.

Marcu 5:22 ပူးပေါင်းရင်းမြစ်များ

Mateu 2:11

Tawamhã 'ri para u ma tô asisi. Sisisi wamhã, ma tô sabu za'ra 'watébrémi hã, ina iré sãmra ré tipa, Maria hã. Tawamhã hi'rãtitõ ma tô asimro, ãma wata za'ra da. Taha pari, ma tô 'ridawa za'ra, tinhimiro'wapézé te te i'wasari zô, te te ãma sawi za'ra da. Tawamhã taha na ma tô ãma sawi za'ra, tinhoprub za'ra zém na; ẽtẽ waipo pré oru hã, duré wedewati isadaze hã, duré wedewati isadaze si'u'ẽne hã. Taha na ma tô tãma tinhoprub za'ra.

Marcu 5:33

Tahawa, te itẽme mo, pi'õ hã. Ma tô sihâiba waihu'u, ihâzé te te tãma ipari na. Tahawa, pahi nherẽ, te itẽme mo, rẽrẽ'ẽ sina. Hi'rãtitõ ma aime Zezusihi papara, tãma siwasu'u da. Ma tô tãma siwasu'u pese, pi'õ hã.

Marcu 5:38

Tawamhã Zairuhu nhorõwa u sihutu wamhã, ma tô da'ab'madâ, Zezusi hã. Azarutu ãma te ta'ru'ru ni, dawawai 'rãihâ sina. Tahawa, ro'wa'rutu di 'ri paramhã.

Luca 13:14

Tane nherẽ, rowahutuzé 'madâ'â'wa hã ma tô sada tizahi, Zezusihi zada, sabadu na nherẽ, te te pese wa. Tahawa, te uburé dama tinha, ãne: — Bâdâ hã, 6 na ihâiba hã, wa te 're iromhuri za'ra mono zéb da hã. Taha bâtâ na si, te za we 're anomro aba mo, da te 're aipese za'ra wa'aba mono da. Sabadu na hã mare di, romhuri zahârizém na hã.

Luca 5:8

Tebe ahâ na te te awaibui wamhã, ma tô ãma titob'uzu za'ra. Tiagu norĩ zama, ma tô ãma titob'uzu zahuré, Zuwãhã me. Ta norĩ hã Zebedehe 'ra zahuré. Isiré tepe na, te te 're romhuri zahuré, Simahã siré hã. Tawamhã hi'rãtitõ, ma aime Zezusihi papara, Sima Pedru hã, tebe ahâ na te te 'madâ'â wa. Ãne te Zezusihi ma tinha: — Ĩ'rata asãmra õ di za. Te za oto aimo, ĩnhiti. Wa hã ĩwasétére di. Tawamhã Zezusi te asa tãma tinha, ãne: — Asina aipahi õ di za. Tepe na 're iromhuri mono ne, te za oto ĩma 're ida'awaibui wẽ mo.

Luca 8:28

Aibâ hã da'rata 're sãmra mono ré, ma tô da te 're 'madâ'â za'ra, 're pusi tõ mono da. Ma tô da te dasiwi 're hi wasisi, isi'uwazi nhorõ rutu na. Te duré da te dasiwi 're pa wasisi. Tazahã, tihi wasisizé hã te te sina 're anhinarĩ, tipawasisizéb zama. Taha pari, te wa'uburé hã te te siwi 're saprõni, a'ubuni u. Tawamhã aibâ hã Zezusi te te 'madâ'â wamhã, ma tô 're sadari. Tahawa, hi'rãtitõ ma aime, Zezusihi papara. Tawamhã mreme 'rãihâ na te tãma tinha, ãne: — Zezusi, 'Re ihâimana u'âsi mono 'ra, e marĩ ĩ'ãma 'manharĩ da, te we aimo. Ĩ'azâri õ di za. Ãne, wa ĩsina aipa'uwati.

Zezusihi zadawa wasuꞌuꞌwa norĩ nhimiromhuri na robꞌuiꞌéré 13:15

Tawamhã ma tô ni'wa hã dama sõré, 'Re ihâimana u'âsi mono nhimiroti na Mozési te te irob'ui'érézém na hã. Isadawa 'mahârâ'wa norĩ nhimi'ui'éré hã te duré dama sõré. Te te sõré za'ra parimhã, rowahutuzéb ãma 're da'anhimi'rui mono 'wa hã ma tô Paulu norĩ hã ãne 'mahârâ za'ra, te te dama rowasu'u za'ra da: — Wasiré Izaraéu nhihudu norĩ, asima wẽ za'ra wa'aba wamhã, te za wama irowasu'u za'ra wa'wa, wama robze za'ra da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 18:17

Tawamhã ma tô aibâ hã siwi ti'â, rowahutuzéb ãma 're ida'anhimi'rui mono 'wa hã, Sotẽni na aibâ nhisi hã. Tawamhã ma tô siwi azâ, dama rowairébézé nho're ãma. Te te siwi azâri nherẽ, te te ãma rosa'rata õ di, apito Galiu hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 18:8

Tawamhã rowahutuzéb ãma 're ida'anhimi'rui mono 'wa hã ma tô saze Wanhib'apito hã, Crispu na isisi hã. Duré, uburé isõrõwa ãma isiré 're isi'ubumroi mono norĩ hã ma duré saze za'ra. Corĩtu ãma 're idasi'ubumroi mono zama ma tô da'ahâ na saze za'ra ni, Zezusihi wasu'uwẽ hã da te wapari za'ra wa. Tahawa, ma tô â dawabzuri hã 'manharĩ za'ra ni.

Apocalipsi 22:8

Wa hã Zuwã hã wa tô ãne uburé marĩ hã te awapari. Wa tô duré uburé marĩ hã te ab'madâ'â. Tawamhã ãne te awapari mono pari, duré ãne marĩ te ab'madâ'â mono pari, wa tô hâiwa ãma romhuri'wai papara aime, ãma ĩwata da, za iromhâimana mono zém na te te ĩma i'awaihu'u mono ãma.