Marcu 2:24 - ꞌRe Ihâimana Uꞌâsi Mono Zadawa Wasuꞌu

²⁴ Tawamhã farizeu norĩ hã te Zezusihi ma nharĩ za'ra, ãne: — E niha, romhuri zahârizém na nherẽ, te te sima 'rãnhinarĩ za'ra, asiré 're inomro mono norĩ hã, wahi'rata norĩ hã romhuri zahârizém na te te dawi 're sawi za'ra mono nherẽ.

Marcu 2:24 ပူးပေါင်းရင်းမြစ်များ

Ezodu 20:10

Tane nherẽ, sabadu 7 bâtâ ãma hã dawa'utuzéb da si hã, Uburé Danhib'apito, ate za'ra wa'wa 'Re ihâimana u'âsi mono te wa. Taha bâtâ na 're romhuri za'ra wa'aba mono õ di za, ai'ra si'aibâ norĩ, ai'ra sipi'õ norĩ, pawa'âbâ ãna aima romhuri'wa norĩ zama, duré asimizama aba norĩ zama. Asiré a'uwẽ'õ norĩ asipti'ai 're, 're ihâimana za'ra mono norĩ zama te te 're romhuri za'ra mono õ di za.

Ezodu 31:15

6 si bâtâ 're, 're iromhuri za'ra wa'aba mono da hã te aima 're hâimana za'ra wa'wa. Tane nherẽ, bâdâ ipire te 7 bâtâ ãma dawa'utuzé hã 're hâimana, ĩte hã. Tahawa, ni'wa taha bâtâ na siwa'ru marĩ na te te 're romhuri mono wamhã, te za dasiwi wĩrĩ ni.

Mateu 12:2

Tawamhã farizeu norĩ hã te te ãma 'madâ'â za'ra wamhã, Zezusihi ma, te nharĩ za'ra, ãne: — E 'madâ'â za'ra ãna, asiré 're inomro mono norĩ hã. Ta norĩ hã ma tô trigu hã te te sima 'rãnhinarĩ za'ra, sabadu na 're iwawa'utu za'ra mono zém na nherẽ. Tahawa, wahi'rata nhimiroti hã ma tô ãma upa za'ra, dawa'utuzé bâtâ na romhuri, wa te dawi 're isawi za'ra mono zém na roti hã.

Marcu 2:16

Tawamhã ta norĩ me sai ma, sãmra ré, ma tô Zezusi hã 'madâ'â za'ra, dama rowahutu'wa norĩ hã, farizeu norĩ hã. Ta norĩ hã Zezusihi siré 're inomro mono norĩ ma, te nharĩ za'ra, ãne: — E niha bâ, te bété rob'uiprazé arĩ ubumroi'wa norĩ siré, duré dawasété na 're idahâimana za'ra mono norĩ siré zama hã dame tisa.

Marcu 2:25

Tawamhã Zezusi ma asa tãma waihu'u za'ra: — E apito Dawihi wasu'u na rob'ui'éré hã 're sõré za'ra wa'aba mono ã bâ, te te irob'manharĩzém na, isiré norĩ me, mra te te simroi wamhã.

Marcu 2:7

Ta norĩ hã te 'râwi sima ãma rosa'rata za'ra, ãne: — E niha te aibâ ma tinha bété, õ hã, imorĩ'õ ma. 'Re ihâimana u'âsi mono ma, wẽ õ di, aibâ ma, te te inharĩzé hã. Dawasédé hã da te 're i'manharĩ wasété za'ra mono zé hã, ni'wa hã te te dama 're apari waihu'u mono õ di. 'Re ihâimana u'âsi mono ma si waihu'u pese di, dawasédé hã te te dama 're i'apari mono zé hã.

Hebreu 12:3

Ma'ãpé ãma rosa'rata pese za'ra wa'aba, Zezusi hã ti'ab ré te te 're irobzépata mono na hã. Tiwasété si te te 're i'manharĩ za'ra mono norĩ hã te te 're 'ruiwapari za'ra mono wa, te te tãma 're irob'manharĩ wasété za'ra mono zém na, ma tô te te 're robzépata za'ẽtẽ, Zezusi hã. Tane nherẽ, siptete u'âsi ma tô 're hâimana. Tane duré a norĩ wa'wa hã te za marĩ iwasété wi 're asi'madâ'â pese za'ra wa'aba mo, asiptete sina 're aihâimana za'ra wa'aba mono da, aiwi 're robzei'õ za'ra wa'aba mono tõ da. Taha zarina, 'Re ihâimana u'âsi mono hã asina 're i'umnhasi za'ra wa'aba mono zé hã aiwi 're si'utõrĩ za'ra wa'aba mono tõ da, te za tô asiptete sina 're aihâimana za'ra wa'aba mo.