Marcu 2:2 - ꞌRe Ihâimana Uꞌâsi Mono Zadawa Wasuꞌu

² Tawamhã da'ahâ na ma itẽme dasito. Da'ahâ na itẽme dasito mono wamhã, 'ri 're wa'wa ãma hã, duré 'ridawa ãmab zama hã da'masisi di.

Marcu 2:2 ပူးပေါင်းရင်းမြစ်များ

Salmu 40:9

Uburé Danhib'apito, aihĩni asib'a'uwẽ 're isi'rã'õtõ mono zéb ãma hã, wa tô rowasu'u wẽ hã te dama 're wasu'u, a hã 're iwa'anho'reptui mono na hã. Aima waihu'u pese di, za rowasu'u wẽ 'mahârâzém na niwa te isazâri õ na hã.

Mateu 5:2

Taha wamhã, tame ma tô Zezusi hã tinhimirowahutu na tãma ãma sãna'rata za'ra, ãne:

Marcu 1:14

Tawamhã Zezusi hã te mo, Galiléa u. Zuwã Batista hã dazazéb 're, da te dasiwi sẽrẽ pari, te Zezusi hã mo. Tawamhã rowasu'u wẽ hã, 'Re ihâimana u'âsi mono te te tãma isõmri na, te Zezusi hã te te dama 're rowasu'u oto.

Marcu 1:33

Uburé 'ri ahâ 're, 're idasi'ubumroi mono norĩ hã ma itẽme tasi'rã'õtõ ni, 'ri nho'rem nho'õmob u.

Marcu 1:37

Tawamhã te te siwi sõpẽtẽ wamhã, te tãma rowasu'u za'ra ãne: — Aihĩni te asô hã tanhopré ni.

Marcu 1:45

Tazahã aibâ hã rowasu'u wẽ na ma tô ãma ropé. Tahawa, sõ'awi 'ri ahâ u hã datẽme 're ne waihu'u mono õ di, Zezusi hã. Tahawa, a'ubuni wi te a'â 're hâimana, danhiti. Tame 're hâimana mono ré, te itẽme 're dasihutu, daro mono bâ, da te 're sabu za'ra mono da.

Marcu 2:1

Suru na ãma ronomro parip si, ma Zezusi norĩ hã apâ aihutu, Cafanau na danhipti'a nho'õmo nhisi u. Tawamhã awa'awi ma iwasu'u hã ropé, 'ri para ãma oto ihâimana na, Zezusi hã.

Marcu 2:13

Tawamhã Galiléa ãma isõ'u zapoto u, te apâ mo Zezusi hã. Da'ahâ na ma tô itẽme 're danomro. Tawamhã dasihutu sidâpâsi te nasi dama rowahutu, rowasu'u wẽ na.

Marcu 6:34

Tawamhã Zezusi hã uba're hawi watobro wi, ma tô da'ahâ uptabi na da'ab'madâ. Tahawa, ma tô da'ãma tipẽ'ẽzé, pone'ẽrebâ 'madâ'â ãna 're inomro mono ne, 're danomro mono wa. Tawamhã tame ma tô tinhimirowasu'u iwẽ na ahâ uptabi na hã da'apawapto, Zezusi hã.

Luca 12:1

Tawamhã ma tô dasina tahâ'â ni. Tahawa, da'ahâ uptabi di oto. Da'ahâ uptabi wa, ma tô 're dasipara wati'i za'ra. Ãhã wa, te Zezusi hã a'â tãma nharĩ za'ra, tisiré 're inomro mono norĩ ma, ãne: — Farizeu norĩ hâimanazé hã, tô senai õ di. Tahawa, te za tiwi 're asi'madâ'â pese za'ra wa'aba mo, i'u'ẽtẽ wapuzém nhiti 're anomro aba mono da, farizeu norĩ nhimi'manharĩzém nhiti. Wa za ãma simiré'é, ãne: Ãté te za marĩ hã da te dawi 're sahâri za'ra, da te 're waihu'u tõ za'ra mono da, danhimirowasu'uzé hã, danhimi'manharĩzé hã. Tane nherẽ, te za niwapsi waihu'u za'ra ni. Tane bara na, aihâiba pisutu dama asimirowasu'uzé hã te za rowa'a ré dama asimirowasu'u za'ra wa'aba zém na aiwasu'u za'ra wa'aba ni. Duré 'ri nhitob ré, aihâiba pisutu dama asimirowasu'u za'ra wa'aba zé hã, te za sõ'awi dama asimirowasu'uzém na aiwasu'u za'ra wa'aba ni. Tahawa, te za 'râwi 're asi'madâ'â za'ra wa'aba mo, farizeu norĩ hâimanazéb zarina, 're aihâimana za'ra wa'aba mono tõ da, tô senai õ wa, ta norĩ 're ihâimana za'ra mono zé hã.

Luca 5:17

Tawamhã apâ datẽme wisi wamhã, te nimahã bâtâ na dama rowasu'u, Zezusi hã. Te te dama rowasu'u ré, te i'rata ai'ubumro, farizeu norĩ hã. Rowahutu'wa norĩ me, te i'rata ai'ubumro, 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ hã. Ta norĩ hã ma tô itẽme sito Galiléa hawi, duré Zudéa hawi, duré Zeruzalẽ hawi. Tawamhã 'Re ihâimana u'âsi mono tiwaihu'u pe hã, te te tãma isõmri na, ma tô da'apese, Zezusi hã.

Luca 8:1

Tawamhã ãma ronomro wapsi, te Zezusi hã datẽme 're mo, daro mono bâ. 'Ri nho'õmo mono bâ, te datẽme 're mo, 'ri wa'õtõ mono bâ. Tawamhã datẽme 're morĩ wamhã, ma tô iwasu'uwẽ na te te 're da'apo're pu'u, 'Re ihâimana u'âsi mono, da'ãma 're isib'a'uwẽ mono zé wasu'u na. Datẽme 're morĩ wamhã, aibâ norĩ hã 12 na ihâiba za'ra hã, te isiré 're nomro.

Luca 8:11

— Ãhã na, wa za aima waihu'u za'ra wa'wa, te ãma isimiré'ézé hã waihu'u za'ra wa'aba da. Amnho potozé hã, 'Re ihâimana u'âsi mono mreme, te wasu'u.

Zezusihi zadawa wasuꞌuꞌwa norĩ nhimiromhuri na robꞌuiꞌéré 11:19

Tawamhã Estewã da te dasiwi iwĩrĩzéb zarina, isazei'wa norĩ ãma da te rowasété za'ra wa, ma tô da te ropé, isazei'wa norĩ hã Zeruzalẽ hawi. Penisiza na danhipti'a nho'õmo nhisi u, ma tô da te ropé, duré Sipri na danhipti'a nho'õmo nhisi u, duré Ãtioquia na 'ri nho'õmo nhisi u zama. Si'aba'réi ré, zudeu norĩ ma si ma tô 'Re ihâimana u'âsi mono zadawa wasu'u na rowasu'u za'ra, Zezusihi wasu'uwẽ na. Zudeu'õ norĩ ma, zahadu te te ãma rowasu'u za'ra õ di.

Zezusihi zadawa wasuꞌuꞌwa norĩ nhimiromhuri na robꞌuiꞌéré 14:25

Tame, ma tô Zezusihi wasu'uwẽ na dama rowahutu zahuré, Peregui na 'ri nho'õmo nhisi ãma. Taha pari, ma tô duré tineb zahuré, Atariza na uba're nhimizahârizém nhisi u.

Zezusihi zadawa wasuꞌuꞌwa norĩ nhimiromhuri na robꞌuiꞌéré 16:6

Tawamhã Paulu norĩ hã ma tô ai'aba'ré, Prizia na danhipti'a nho'õmo nhisi wa'wai baba, duré Galasia na danhipti'a nho'õmo nhisi wa'wai baba. Tane nherẽ, 'Re ihâimana u'âsi mono pẽ'ẽzani hã ma tô sadawa uwati za'ra, Azia na danhipti'a nho'õmo nhisi ãma iwasu'uwẽ na te te dama rowasu'u za'ra tõ da a'â.

Zezusihi zadawa wasuꞌuꞌwa norĩ nhimiromhuri na robꞌuiꞌéré 8:25

Tawamhã Pedru norĩ hã Wanhib'apito mreme na te te dama rowahutu zahuré pari, ma tô apâ tineb zahuré, Zeruzalẽ u. Neb zahuré wamhã, te sipa zahuré, daza'rui mono bâ, Samaria ãma, Zezusihi wasu'uwẽ na te te dama rowasu'u zahuré mono da.