Marcu 15:19 - ꞌRe Ihâimana Uꞌâsi Mono Zadawa Wasuꞌu

¹⁹ Tawamhã i'rãi wi, ma tô nasi siwi ahâ, wedehu waré na. Te duré nasi siwi upto, tizadaipro na. Te duré nasi hi'rãtitõ tãma asimro, Zezusihi papara, ãma wata za'ra da newa.

Marcu 15:19 ပူးပေါင်းရင်းမြစ်များ

Zenezi 24:52

Tawamhã Abra'ãhã ma romhuri'wa ãne na te te mreme wapari zahuré wamhã, ma tô hi'rãtitõ nhamra. Duré ti'ubu na ti'ai u hã ma tô ropto. Tawamhã Uburé Danhib'apito ãma ma tô tiwata.

Zenezi 43:28

— Ĩhe, aima romhuri'wa wamama za'ra hã te zahadu rowẽ na 're hâimana.

Salmu 69:12

'Re idasisõpẽtẽ pese za'ra mono zéb ãma, te duré te te sima ĩ'ãma 're robzanhamri za'ra. Âzé zei'wa norĩ hã te duré ĩ'ãma niha na 're sõ're za'ra, siwa'ru.

Mateu 27:30

Tizadaipro na te duré nasi siwi upto. Wedehu te duré nasi tiwi mrami za'ra, i'rãi wi, te te nasi siwi ãma ahâri da.

Marcu 14:65

Tawamhã te te siwi wẽ'õ wa, ma tô nasi ni'wam norĩ hã siwi ubu upto, tizadaipro na. Zazahâ na ma duré siwi ubu ubu. Taha pari, ma tô duré nasi siwi ahâ. Ãne ré, te nasi siwi 'mahâ: — E 'wa hã ai'azâri'wa. Ma'ãpé, waihu'u. 'Re ihâimana u'âsi mono nhorõwa 'ri 'madâ'â'wa norĩ zama, ma tô siwi ti'â, te te nasi siwi ahâri da.

Marcu 15:18

Tawamhã sisarina si te duré nasi timreme na sawi za'ra, taré: — Zudeu norĩ nhib'apito, rowẽ na aihâimana.

Marcu 15:20

Tawamhã nasi ãma wa'ẽ za'ra parimhã, tisi'ubuzém na te te siwi ãma ihâiba ubu hã ma tô apâ tiwi wazere za'ra. I'uza na ma oto apâ siwi uza. Taha pari, te oto rob u siwi saprõ, wedepo'o nhonhi'rãmi na te te siwi sasõmri da, 'ri nho'õmo nhiti.

Marcu 9:12

Tawamhã Zezusi ma tô asa tãma waihu'u za'ra: — Duréihã 'Re ihâimana u'âsi mono zadawa 'mahârâ'wa hã ma tô i'uwaibaba ãma rob'ui'éré ibaihâ na, Eliasi za we apâ imorĩzém na te te ropese da. Tane nherẽ, wa za aima waihu'u za'ra wa'wa. Eliasi hã ma tô wei morĩ pa. Da te dasima iwẽ za'ra zéb zarina, ma tô tãma rob'manharĩ wasété za'ra ni, iwana da te duré ãma irob'ui'érézéb zarina. 'Re ihâimana u'âsi mono zadawa 'mahârâ'wa norĩ hã ma tô ãma rob'ui'éré siromo za'ra, ti'ai ãma Dasiré Ipoto ãma hã, sa'ẽtẽ na za te te irobzépatazém na hã, duré za da te dasiwi iwẽ'õzém na hã. E marĩ wa, ma tô ãne ãma rob'ui'éré siromo za'ra.

Luca 22:63

Tawamhã aibâ norĩ hã ma tô Zezusihi ma nharĩ wasété za'ra, siwi i'madâ'â'wa norĩ hã. Te duré nasi siwi ahâ.

Luca 23:11

Tawamhã Erodi norĩ hã ma tô Zezusihi ãma tiwa'ẽ za'ra, taré. Tinhib'a'uwẽ norĩ me, ma ãma tiwa'ẽ za'ra, da'wapéi'wa norĩ me. Ma tô ãma tito za'ra. Dasi'ubuzém na ma tô siwi ãma hâiba ubu, iwẽ na. Tawamhã Erodi hã te oto dama ti'ru, apâ da te dasiwi saprõni da, Pilatuhu u. Tahawa, te apâ siwi saprõ.

Luca 23:36

Da'wapéi'wa norĩ zama, ma tô ãma tiwa'ẽ za'ra. Tawamhã ma itẽme ai'ré za'ra, te te tãma wẽ za'ra da, uwa 'rãi wa'u isé hã, iwa'âbâ suru hã.

Roma 11:4

Tawamhã 'Re ihâimana u'âsi mono hã e niha ma tô asa tãma waihu'u, Eliasihi ma. Ãne ma tô tãma waihu'u: “Wa tô ĩsima tété za'ra, aibâ norĩ 7 miu na ihâiba na, tisiré norĩ wazari si'utõrĩ tõ da dame, ihâiba'õ na dame ãma 're iwata za'ra mono õ norĩ hã, Baau na romhâiba nhisi ãma hã. Ta norĩ si, te ĩzarina 're hâimana u'âsi za'ra.”

Filipu 2:10

Tahawa, niwapsi te za aihĩni pese dahi'rãtitõ tãma ana ni, Zezusihi ma, dama isisi pire uptabi ma. Ãne da, ma tô 'Re ihâimana u'âsi mono hã tãma pisutu, pire uptabi na 're hâimana mono da. Hâiwa ãma uburé pese hâiba ré 're ihâimana za'ra mono norĩ hã, duré ti'ai ãma uburé pese hâiba ré 're ihâimana za'ra mono norĩ zama, te za dahi'rãtitõ tãma ana ni, dama pire wa, adâ 're ihâimana za'ra mono zéb ãma uburé pese 're ihâimana za'ra mono norĩ zama. Tawamhã tame te za uburé pese dasisõ'a dasiwi sisi za'ra ni oto, ãne: “Õ hã Zezu Cristu, uburé Danhib'apito.” Ãne na Zezu Cristuhu ãma dawata za'ra wamhã, taha u'âbâ, te za duré 'Re ihâimana u'âsi mono ãma tawata za'ra ni, Wamama ãma hã.

Hebreu 13:13

Tahawa, wa za oto wa norĩ hã Zezusihi u si dawi 're wawairébé, taha si tô sena te te 're wa'anho'reptui mono da. Tahawa, wa za tô, 're idanomro 'rata mono zé hã, wa te 're rẽme pese za'ra. Zezusi hã wazada dâ'â wa, da te dasiwi i'ruiwapari ne, da te 're wa'ruiwapari za'ra mono da nherẽ, wa za tô itẽme 're wawairébé, 're iwanomro 'rata mono zém hawimhã, Zezusihi u hã.