Marcu 14:49 - ꞌRe Ihâimana Uꞌâsi Mono Zadawa Wasuꞌu

⁴⁹ Bâtâ sidâpâsi wa tô asõ'a za'ra wa'aba te 're da'apawapto, ĩnhimirowasu'u na, 'Re ihâimana u'âsi mono nhorõwa 'ri 'wawi, wa'ra 're. Zapre tameb ré, asiwi ĩ'âri aba õ di bété. Tane nherẽ, te za tô asiwi ĩ'âri 'wa, ĩ'ãma rob'ui'érézé hã te ĩsina uwaimrami hâ.

Marcu 14:49 ပူးပေါင်းရင်းမြစ်များ

Mateu 1:22

Ãne da hã ma tô pisutu, Zezusihi ma, 'Re ihâimana u'âsi mono hã duréihã tizadawa wasu'u 'rata 'wai ma, Izaiaha ma, te te iwaihu'uzém na te te ãma uwaimrami da. Ãne ma tô tãma waihu'u, duréihã: “Pi'õi ubuni hã te za tiwasã. Duré i'ra hã te za tãma waptãrã, aibâ na. Taha nhisi hã za, Emanuwé na.” ('Re ihâimana u'âsi mono, wasiré 're imorĩ u'â, te wasu'u, isisi hã.) Ãne 'Re ihâimana u'âsi mono te te ãma irowaihu'u siromo zé hã duréihã.

Mateu 26:54

Ĩ'ãma dawi sisaprĩ za'ra wamhã, 'Re ihâimana u'âsi mono te te ĩ'ãma uwaimrami õ di aré, duréihã isadawa wasu'u'wa norĩ te te ĩ'ãma irob'ui'éré za'ra zéb zém na hã, za niha ĩ'ãma iromhâimanazém na. Tahawa, te tiwi waptẽrẽ õ di za, Ĩmama wi.

Mateu 26:55

Tawamhã Zezusi hã te oto dama rowasu'u, ãne: — E wa hã danhibrob zô dapãrĩ'wa pâ, ma te bété we ĩzô aihutu 'wa, sib'ézé 'wapa ré, duré uibroi ré zama. Bâtâ sidâpâsi wa tô asõ'a za'ra wa'aba 're ĩsimasisi, 'Re ihâimana u'âsi mono nhorõwa ãma 'ri 'wawi wa'ra 're, te dama 're rowahutu mono da. Oro zapre bété, tameb ré asiwi ĩ'âri aba õ di.

Mateu 26:56

Tane tô. Marĩ õre di. Ãne na hã ma te tô ĩ'ãma tiromhâiba ãhã na hã, duréihã 'Re ihâimana u'âsi mono zadawa 'mahârâ 'rata 'wa norĩ nhimi'ui'éré hã te te ĩ'ãma uwaimrami da. Tawamhã isiré 're inomro mono norĩ hã ma tô oto rẽme za'ra dama. Wara sina te ãhã wamhã dawi sisa're.

Marcu 10:1

Tawamhã Zezusi hã Cafanau hawi te oto mo, Zudéa na danhipti'a nho'õmo nhisi u, morĩ da. Tawamhã Zodã pa zara u, ma tô saprĩ. Te te saprĩ wamhã, da'ahâ uptabi na ma tô duré itẽme dasito. Tahawa, te duré dama rowahutu, te te dama 're irowahutu u'âsi mono zém na, Zezusi hã.

Marcu 11:27

Tawamhã ma tô apâ aihutu Zeruzalẽ u, Zezusi norĩ hã. 'Re ihâimana u'âsi mono nhorõwa ãma, 'ri 'wawi wa'ra 're, te 're mo, Zezusi hã. Tame 're morĩ ré, ma tô aibâ norĩ hã itẽme aihutu, sasedoti ipire norĩ hã, duré dama rowahutu'wa norĩ hã, duré zudeu norĩ ma roti'wa norĩ hã.

Marcu 12:35

Tawamhã bâtâ na te Zezusi hã dama rowahutu, 'Re ihâimana u'âsi mono nhorõwa 'ri 'wawi, wa'ra 're. Tawamhã te te dama rowahutu ré, te da'mahâ: — E niha rowahutu'wa norĩ hã te te dama 're rowasu'u za'ra, Dawihi nhihudu 're imorĩ na hã, 'Re ihâimana u'âsi mono te te ipisutu na hã Danho'reptui'wa da.

Marcu 14:48

Tawamhã Zezusi hã sô idasihutu norĩ ma, te tinha, ãne: — E wa hã danhibrob zô dapãrĩ'wa pâ, ma bété we ĩzô aihutu 'wa, sib'ézé 'wapa ré, duré uibroi ré.

Marcu 14:50

Tawamhã isiré 're inomro mono norĩ hã aihĩni ma siwi tirẽ. Wara sina, ma dama ropé.

Luca 19:47

Tawamhã bâtâ sidâpâsi, te nasi dama rowasu'u Zezusi hã, 'ri 'wawi wa'ra 're. Ni'wam norĩ hã ma tô Zezusi hã sima 'ru za'ra, te te siwi wĩrĩ da. Ta norĩ hã 'Re ihâimana u'âsi mono ma, da'ãma romhuri'wa ipire norĩ hã, duré isimiroti na rob'ui'éré 'rata na dama rowahutu'wa norĩ hã, duré roti'wa norĩ hã.

Luca 22:37

E marĩ wa, wa ãne aima 'ru za'ra wa'wa. Ĩwasété newa, te za rowasété 'manharĩ'wa norĩ zu ĩma rob'manharĩ za'ra ni. Ãne, duréihã ma tô romhâ ré ĩ'ãma rob'ui'éré siromo za'ra ibaihâ na, 'Re ihâimana u'âsi mono zadawa 'mahârâ'wa norĩ hã. Tahawa, te za ĩ'ãma rob'ui'éré zarina, tô ĩ'ãma uwaimrami za'ra ni.

Zuwã 18:20

Tawamhã Zezusi asa te tãma tinha, ãne: — Sõ'awi wa tô te dama 're rowahutu u'âsi, rowahutuzé mono bâ. Ãme dasi'rã'õtõzéb ãma zama, wa tô nasi dama rowahutu, 'Re ihâimana u'âsi mono nhorõwa 'ri ãma hã. Pi'uriwi te dama 're rowahutu mono õ di. E marĩ da, te ĩzadanha. Ĩwapari'wa norĩ hã te za isadanharĩ za'ra wa'wa, te te aima ĩzadawa wasu'u za'ra da. Ta norĩ ma, waihu'u pese za'ra di, ĩnhimirowasu'u hã.

Zuwã 7:37

Tawamhã irẽme ma dasi'rã'õtõ mono wa, ma tô Zezusi hã hâiwi za, te te dama rowahutu da, datozém na bâdâ ipire uptabi na. Ãne te tawamhã dama tinha: — 'Rubu wamhã, ma'ãpé we ĩtẽme 're anomro aba mono za, â u'â hã te aima 're sõmri za'ra wa'aba mono wa, 're âhuri aba mono da.

Zuwã 8:12

Tawamhã Zezusi te duré dama tinha, ãne: — Wa hã uburé dama rob'uiwẽ'wa na wa ĩsiwasu'u. Ĩnhimiroti zarina 're danomro mono wamhã, dawasété na 're danomro mono õ di za, robra na. Rowa'a na si te za ĩ'ãma 're danomro u'âsi, rowẽ na.

Zuwã 8:2

Awẽm na hã mararé, ma tô apâ mo 'ri u, 'Re ihâimana u'âsi mono nhorõwa u. Wisi wamhã, 'ri 'wawi wa'ra u, ma tô ãzé. Tamomo da'ahâ na ma tô Zezusihi u ubumro ni. Tawamhã ma tô nhamra, te te dama rowahutu da, Zezusi hã.