Marcu 14:41 - ꞌRe Ihâimana Uꞌâsi Mono Zadawa Wasuꞌu

⁴¹ Tawamhã isiti te duré timorĩ za'ra. Taha pari, ma duré apâ sina siri. Si'ubdatõ tinem na, ma tô oto ãma sahu. Tawamhã sõtõ za'ra ré, ma tô duré apâ siza za'ra. Tahawa, te ãne 'mahârâ za'ra: — E niha bâ te zahadu asõtõ za'ra wa'wa bété. Te duré zahadu aiwa'utu siroptub za'ra wa'wa. Tô'ã oto. Bâdâ ma tô oto iwa waptãrã. Ti'ai ãma Dasiré Ipodo, te za oto hâiba nhomri ni, aibâ iwasété norĩ ma.

Marcu 14:41 ပူးပေါင်းရင်းမြစ်များ

Mateu 26:2

— Romhuture di oto, dato hã da te 're i'manharĩ za'ra mono zéb u hã, 'Re ihâimana u'âsi mono, Ezitu hawi te te idawaibuzém na ãma dasipo're pu'u za'ra da, Pascowa na dato nhisi na hã. Awẽ amo na te za iwa waptãrã, bâdâ hã. Ãne hã aima waihu'u pese za'ra wa'aba di. Tawapsi te za oto dasiwi ĩhâiba nhomri ni, Danho'reptui'wa da 'Re ihâimana u'âsi mono te te ĩpisudu hã, da te dasiwi ĩzasõmri da hâiwi, wedepo'o nhonhi'rãmi na.

Marcu 14:10

Tawamhã Zuda Icarioti hã te mo, sasedoti ipire norĩ u. Aibâ 12 na Zezusihi siré 're inomro mono norĩ siré 're imorĩ, Zuda hã. Zezusihi ãma te te tãma ãma roti za'ra da, te itẽme timorĩ za'ra, te te tãma ãma rowairébé za'ra da, Zezusi za te te tãma ihâiba nhomri za'ra zém na hã.

Marcu 14:18

Tawamhã sai ma, si'ubumroi ré, ma tô Zezusi hã tãma waihu'u siromo za'ra, ãne: — Tô sena, wa aima waihu'u siromo za'ra wa'wa. A norĩ wa'wa hã ĩsiré asaihuri aba nherẽ, misire te za dama ĩ'maihâiba nhomri 'wa za.

Marcu 14:35

Tawamhã romhâ prã na te isiti timorĩ za'ra. Tawamhã hi'rãtitõ ma tô nhamra. Sãmra wamhã, ma tô aiwẽ'ẽ, ti'ai u. Tawamhã Timama wi, te rowaptẽ, robzépada hã te te tãma ba'a da.

Marcu 14:40

Timama ma, mreme pari, te duré apâ itẽme timorĩ za'ra. Tawamhã sõtõ za'ra ré, ma duré siza za'ra. Tãma aptâ'â uptabi za'ra wa, te tinhotõ pese za'ra, sõpré waihu'u ãna. Tawamhã utu za'ra da, Zezusi te te 'mahârâ za'ra wamhã, asa te te tãma iwaihu'u za'ra da hã, mare di.

Marcu 14:42

Oto aiwahutu za'ra wa'aba, wasi'aba'ré da. Õhõta te wei oto mo, dama ihâiba nhomri'wa da hã.

Marcu 7:9

Ãne ma tô duré tãma waihu'u za'ra: — A norĩ wa'wa hã aihâimana nhipese sina te 're irẽme za'ra wa'aba mo 'Re ihâimana u'âsi mono nhimiroti hã, 'râwi asimirosa'rata na si 're aihâimana za'ra wa'aba mono da.

Zuwã 12:23

Tawamhã imreme te te wapari wamhã, ãne te Zezusi hã tãma siwasu'u zahuré: — Romhuture di oto bâdâ hã, za Dasiré Ipoto ãma 're idawata za'ra mono zéb da hã.

Zuwã 12:27

— Ãhã na te ĩsina rosa'rata ahâ di. E Ĩmama ma, wa za ĩsi'ru, te te dawi ĩnho'reptu da, ĩdâ'â õ ré, te robzépata tõ da. Mare di. Tãma ĩsi'rui õ di za, te te dawi ĩnho'reptu da hã. Dazada ĩdâ'â da si, wa wei mo.

Zuwã 17:1

Tawamhã tãma siwasu'u za'ra pari, Timama ma mreme da, te hâimo rob'madâ, Zezusi hã. Ãne te Timama ma tinha: — Ĩmama, bâdâ ĩma ipisutuzé hã ma tô iwa waptãrã. Ma'ãpé, we ĩpawapto na, ĩ'ãma irotizé hã te dama ĩsina uwaimrami da, ai'ãma 're dawata u'âsi za'ra mono da.

Zuwã 7:30

Tawamhã ma tô duré sima ãma roti za'ra, te te siwi âri da, dama ipire norĩ hã. Tane nherẽ, te te siwi âri õ di. E marĩ wa. Zahadu bâdâ hã 'Re ihâimana u'âsi mono te te ãma ipisutuzé hã, iwa waptã'ã õ wa.

Zuwã 8:20

Ãne te tãma rowasu'u za'ra, 'Re ihâimana u'âsi mono nhorõwa ãma, 'ri 'wawi wa'ra 're, te te dama rowahutu ré. Rob'uiprazé, da te 're iséme mono zéb 'rata sab ré, te ãne tãma rowasu'u za'ra. Tahawa, te te siwi âri ze za'ra nherẽ, te te siwi âri õ di, dama ipire norĩ hã. E marĩ wa. Zahadu bâdâ hã iwa waptã'ã õ wa, te te sima ãma irotizé hã, 'Re ihâimana u'âsi mono hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 7:52

Aihi'rata norĩ wa'wa hã ma tô sada 're sib'ru za'ra, 'Re ihâimana u'âsi mono zadawa 'mahârâ 'rata 'wa norĩ zada. 'Re imorĩ wẽ uptabi hã za we iwisi wana, ma tô aré te te dama 're wasu'u za'ra, isadawa wasu'u'wa norĩ hã. Tane nherẽ, ma tô aihi'rata norĩ wa'wa hã te te 're simro, ta norĩ hã. Aihi'rata norĩ wa'wa hã ãne te te 're i'manharĩ za'ra mono ne, ma tô duré a norĩ wa'aba zama dama isa'ré za'ra wa'wa, 're imorĩ wẽ uptabi hã da te dasiwi wĩrĩ da.

Zuize 10:14

Tahawa ma'ãpé ihâiba'õ norĩ asima ipisutu za'ra wa'aba wi si, tiwi rowaptẽrẽ za'ra wa'aba, ropire 're, aihâimana za'ra wa'aba ré, pé ta norĩ si te te aipawaptob za'ra wa'aba da.