Marcu 14:18 - ꞌRe Ihâimana Uꞌâsi Mono Zadawa Wasuꞌu

¹⁸ Tawamhã sai ma, si'ubumroi ré, ma tô Zezusi hã tãma waihu'u siromo za'ra, ãne: — Tô sena, wa aima waihu'u siromo za'ra wa'wa. A norĩ wa'wa hã ĩsiré asaihuri aba nherẽ, misire te za dama ĩ'maihâiba nhomri 'wa za.

Marcu 14:18 ပူးပေါင်းရင်းမြစ်များ

Salmu 41:9

Ĩsiwaihu iwẽ te 're i'umnhasi mono hã, ma tô taha zama ĩzada hã 'rãihaiwamna, ĩsiré 're isai u'âsi mono hã.

Mateu 26:21

Tawamhã saihuri ré, ma tô Zezusi hã tãma waihu'u siromo za'ra, ãne: — Tô sena, wa aima waihu'u siromo za'ra wa'wa. Misire te za dama ĩ'maihâiba nhomri 'wa.

Mateu 5:18

Tô sena, wa za ãne aima waihu'u siromo za'ra wa'wa. Hâiwa norĩ hã ti'ai me 're sa'wari zahuré mono ré hã, duréihã 'Re ihâimana u'âsi mono nhimiroti 'rata na rob'ui'éré hã pire na te za tô dama 're hâimana u'âsi. Nima hã dawi 'masi'utõrĩ waihu'u õ di za, iwaptẽrẽ mono bâ hã i'ui'éré misi hã, duré i'ui'éré 'rãzazazé hã. Za niha dama 're iromhâimana mono zéb da hã, ibaihâ na duréihã isadawa wasu'u'wa norĩ te te ãma irob'ui'éré siromo za'ra zéb zarina, rob'rãsutuzéb u za niha dama 're romhâimana uptabi za'ra mono õ ré, si'utõrĩ za'ra õ di za, isimiroti na rob'ui'éré 'rata norĩ hã.

Mateu 6:16

— 'Re ihâimana u'âsi mono ma, 're aimreme zusi aba mono da, asai ãna a'â 're aihâimana za'ra wa'aba mono wamhã, ai'ubu zei õre na hã 're aihâimana za'ra wa'aba mono õ di za. Ni'wam norĩ si te za ubu toi ãna sai ãna 're mreme zusi, 're nomro wẽ mono newa, da te 're 'madâ'â wẽ za'ra mono da. Tawamhã da te 're 'madâ'â wẽ za'ra mono wa, ãma 're dawata za'ra mono wamhã, taha si te za tô tãma 're hâimana za'ra. Nimahã na 'Re ihâimana u'âsi mono nhoprubzé hã tãma 're hâimana za'ra mono õ di za, ta norĩ ma hã. Tô sena wa ãne na hã aima waihu'u siromo za'ra wa'wa.

Mateu 6:2

— Tahawa, isibrob'õ norĩ ma, marĩ hã tãma 're isõmri za'ra wa'aba mono zém na, da te 're aiwẽsãmri za'ra wa'aba mono da, dama 're asiwasu'u za'ra wa'aba mono õ di za. Ãne hã te ni'wam norĩ hã te te dama 're 'manharĩ za'ra, rowahutuzéb 're, duré 'ri nhi'riti na 're idahâimana za'ra mono norĩ ma zama. 'Re hâimana wẽ za'ra mono newa, te ta norĩ hã ãma 're dawata za'ra mono zô, ãne hã te te dama 're 'manharĩ za'ra. Tawamhã ãma 're dawata za'ra mono wamhã, taha na si te za tô ãma 're hâimana za'ra. 'Re ihâimana u'âsi mono nhoprubzé hã nimahã bâtâ na hã tãma 're hâimana za'ra mono õ di za. Tô sena, wa ãne hã aima waihu'u siromo za'ra wa'wa.

Mateu 6:5

— Duré ni'wam norĩ hã te te sima 're iwẽ za'ra mono zéb zarina, te danho'a 're mreme zusi, 'Re ihâimana u'âsi mono ma. Hâiwi 're simasa mono sina, te 'Re ihâimana u'âsi mono ãma 're idawata za'ra mono zéb ãma, 're mreme zusi, 're hâimana wẽ za'ra mono newa, da te 're 'madâ'â wẽ za'ra mono da. 'Ri nhi'riti wa, bâdâdi sitob ãma, te duré ãne 're mreme zusi, da'ahâ norĩ nho'a. Tawamhã da te 're 'madâ'â wẽ za'ra mono wa, ãma 're dawata za'ra mono wamhã, taha na si te za tô ãma 're hâimana za'ra. Nimahã na hã 'Re ihâimana u'âsi mono nhoprubzé hã tãma 're ihâimana za'ra mono da hã, mare uptabi di za, ta norĩ ma hã. Tô sena wa ãne na aima waihu'u siromo za'ra wa'wa.

Marcu 10:15

Tô sena, wa aima waihu'u za'ra wa'wa. Ni'wam norĩ hã ai'uté dama iwapu ne, 're hâimana za'ra mono õ wamhã, 'Re ihâimana u'âsi mono, da'ãma 're isib'a'uwẽ mono zéb u, 're sisisi mono õ di za.

Marcu 10:29

Tawamhã Zezusi hã ãne ma duré tãma waihu'u za'ra: — Tane tô. Ĩwapari pese za'ra wa'aba. Ãté ni'wa hã te te 're ĩzawi pese mono zéb zarina, te za tinhorõwa hã a'â tirẽ, te te dama 're ĩzadawa wasu'u mono da. Ãté tisisãnawã norĩ, duré tihidiba norĩ te za a'â rẽme za'ra. Ãté tina, timama, duré ti'ra norĩ hã te za a'â rẽme za'ra. Ãté tinhipti'a zama, te za a'â tirẽ.

Marcu 14:17

Tawamhã ma'rã wi, ma tô aihutu Zezusi norĩ hã 'ri tẽme, aibâ 12 na ihâiba za'ra norĩ me.

Marcu 14:19

Tawamhã ãne te te sina wapari za'ra wamhã, ma tô tiwi tirobzei'õ za'ra. Tahawa, ma tô sidâpâsi nasi si'mahârâ za'ra, ãne: — E wa hã, merẽ.

Marcu 14:25

Tô sena wa za aima ĩsiwasu'u za'ra wa'wa. Ã hã rob'rãi wa'u hã te 're hâsi mono õ di za oto, a'â. 'Re ihâimana u'âsi mono hã za uburé da'ãma isib'a'uwẽzéb ãma si, wa za duré te 're hâsi.

Marcu 14:9

Tô sena, wa ãne aima waihu'u za'ra wa'wa. Daro mono bâ te za ĩwasu'uwẽ na da te 're dapo're pu'u za'ra. Tawamhã pi'õ hã te te ĩma i'manharĩ wẽ zém na zama, te za da te dasima 're wasu'u u'âsi za'ra, ãma 're dasipo're pu'u za'ra mono da.

Marcu 3:28

— Ma'ãpé, ĩwapari pese za'ra wa'aba za. Dawasédé hã da te 're 'manharĩ za'ra mono nherẽ, duré 'Re ihâimana u'âsi mono ãma, da te ãma 're wasété za'ra mono nherẽ, dawasété na tãma 're dasiwasu'u za'ra mono wamhã, dawasédé hã tãma waihu'u pese di, te te dama 're i'apari mono zéb da hã, te te oto da'ãma 're ab'madâ'â tõ mono da.

Marcu 6:11

Da te 're aiwaibui wẽ za'ra wa'aba mono õ wamhã, duré da te 're aiwapari ze za'ra wa'aba mono õ wamhã, te za dahawi 're aiwairébé su'u aba mo. Tawamhã dahawi 're aiwairébé aba mono õ ré, te za asisa'u aipara zapru hã 're itata'a za'ra wa'aba mo, ti'ai u 're rere'e mono da, dapo're õ na 're danomro mono wa, 'râwi 're dasisãmri za'ra mono da.

Marcu 8:12

Tawamhã Zezusi ãma pẽ'ẽzé za'ra wa, ma sa'ẽtẽ pẽ'ẽwaze. Tawamhã te sima tinha, ãne: — E niha ma tô nimosi dapoto tém norĩ hã siwi ĩwada'u, marĩ dama i'manharĩ waihu'u'õ hã isõ'a te tãma 'manharĩ za'ra da. Mare di za. Ãne hã te tãma 'manharĩ za'ra õ di za.

Marcu 9:1

Tawamhã Zezusi hã ma duré dama waihu'u, ãne: — Tô sena wa aima rowasu'u za'ra wa'wa. Aihĩni õ nherẽ, ai'matâ'â aba õ ré, te za tiwaihu'u pese na 'Re ihâimana u'âsi mono, da'ãma 're isib'a'uwẽ mono zé hã ãma i'madâ'â za'ra wa'wa.

Marcu 9:41

Tawamhã ma tô duré tãma nharĩ za'ra, ãne: — Ma'ãpé, ĩwapari pese za'ra wa'aba asina. A norĩ wa'wa hã ĩzazei'wa 're aihâimana za'ra wa'aba mono wa, â hã ni'wam norĩ hã te te aima 're sõmri za'ra wa'aba mono wamhã, 'Re ihâimana u'âsi mono, za te te tãma 're i'awa'âbâ mono zé hã tiwi 're simani za'ra mono õ di za. Te za te te sina 're uwaimrami za'ra.

Luca 22:21

Ma'ãpé, asiwi waihu'u aba. Ni'wa hã ĩzawi'wa newa, te ĩme nhamra, wedeza na, dama ĩhâiba nhomri'wa da hã.

Luca 4:24

Te duré tãma nharĩ za'ra, ãne: — 'Re ihâimana u'âsi mono zadawa 'mahârâ'wa norĩ zô hã, 're datob'uzu za'ra mono õ di, isipti'ai ãma wa. Mare di. Sô 're datob'uzu za'ra mono õ di za.

Zuwã 13:21

Tawamhã pẽ'ẽzé uptabi di, Zezusi hã. Tahawa, te duré tãma siwasu'u za'ra, ãne: — Tô sena, wa aima waihu'u siromo za'ra wa'wa. Misire te za dama ĩ'maihâiba nhomri 'wa.

Zuwã 13:22

Tawamhã aibâ te te sina iwaihu'uzém na, isiré 're inomro mono norĩ hã te te waihu'u za'ra õ wa, ma tô taré pese 'râwi si'madâ'â pese za'ra.

Zuwã 13:38

Tawamhã Zezusi, ma tô duré asa hã tãma tinha, ãne: — E tô sena asiwasu'uzé hã. Tô sena wa aima rowasu'u. Ĩzadawa para õ nherẽ, si'a hârâ õ ré, te za si'ubdatõ dawi ĩ'udâ, aima ĩza'rese õ na hã.

Zuwã 21:18

Te duré tawamhã tãma tinha, ãne: — Tô sena wa aima rowasu'u: Aipréduptéb ré, ma tô 're asi'uza mo, nimomo 're ane mono da, asima 're irowẽ mono zéb uwaibaba. Tane nherẽ, asi'ihi wapsi, te za aipaihi hã iwẽ zahuré, da te ai'awasisi da, nimomo asima rowẽ õ nherẽ, da te asaprõni da.

Zuwã 3:11

Tô sena, wa aima waihu'u za'ra wa'wa. Wama marĩ hã wama waihu'u pese wa, duré wa te 're 'madâ'â mono wa, wa ãne wa te dama 're wasu'u. Tane nherẽ, wa te aima 're rowasu'u za'ra wa'aba mono nherẽ, ãma 're wazaze za'ra wa'aba mono õ di.

Zuwã 3:3

Tahawa, te Zezusi hã asa tãma tinha, ãne: — Tô sena, wa za aima waihu'u. Dapẽ'ẽ 're, 're dapoto téb za'ra mono õ wamhã, 'Re ihâimana u'âsi mono nhib'a'uwẽ 're danomro mono õ di za.

Zuwã 3:5

Tawamhã Zezusi te duré asa tãma tinha, ãne: — Tô sena, wa aima waihu'u za'ra wa'wa. Ai'uté hã dama 're poto za'ra mono wamhã, 'Re ihâimana u'âsi mono nhib'a'uwẽ, 're nomro siromo mono õ di za. Tipẽ'ẽzani hã te te dama 're anhomri mono wapsi, te za 're dapoto téb za'ra, dapẽ'ẽ 're. Tawapsi te za oto isib'a'uwẽ si 're danomro. 'Re ihâimana u'âsi mono hã 're idanomro wasété mono hawi te te 're da'a'upsõi mono wa, duré Tipẽ'ẽzani hã te te dama 're anhomri mono wapsi, te za oto dapẽ'ẽ 're, 're dapoto téb za'ra. Tawapsi te za oto duré isib'a'uwẽ 're danomro. Dapẽ'ẽ 're, 're dapoto téb za'ra mono õ wamhã, 'Re ihâimana u'âsi mono nhib'a'uwẽ, 're danomro mono õ di za.

Zuwã 5:19

Tawamhã Zezusi hã te duré tãma nharĩ za'ra, ãne: — Tô sena, wa aima waihu'u za'ra wa'wa. Wa hã ĩsi'uihâ na dama i'manharĩ waihu'u'õ na te 're da'apawapto waihu'u mono õ di. Ĩmama zadawa para, wa tô te 're da'apawapto. Ĩmama hã tiwaihu'u pese na te te 're ida'apawapto mono ne, wa tô te 're da'apawapto.

Zuwã 6:26

Tahawa, te Zezusi hã asa tãma nharĩ za'ra, ãne: — E marĩ da, te we ĩzô asõpré wa'aba mo. E marĩ dama i'manharĩ waihu'u'õ hã ĩwaihu'u pese na te aima 'manharĩ za'ra wa'aba wa, ma tô ĩwaihu'u za'ra wa'wa, 'Re ihâimana u'âsi mono we te te ĩzatõrĩ na. E tahawa, te we ĩzô asõpré wa'aba mo. Mare di. Taré i'u'ẽne hã 'mahâpãrĩ za'ra wa'aba mono wẽ te, te we ĩzô asõpré wa'aba mo.

Zuwã 6:32

Tahawa, te Zezusi hã tãma nharĩ za'ra, ãne: — Mozési hã hâiwa hawi te te dama 're anhomri mono õ di, dasazé hã. Ĩmama si hâiwa hawi dasai uptabi nhomri'wa te 're hâimana.

Zuwã 6:47

— Tawamhã Danho'reptui'wa na da te dasina 're ĩ'umnhasi za'ra mono wamhã, rowẽ u'âsi te za dadâ'â ãna 're dahâimana u'âsi za'ra hâiwa ãma, 'Re ihâimana u'âsi mono 'rata. Tô sena, wa aima rowasu'u za'ra wa'wa, waihu'u za'ra wa'aba da.

Zuwã 6:70

Tawamhã Zezusi asa te tãma nharĩ za'ra, ãne: — A norĩ wa'wa hã 12 na aihâiba za'ra wa'wa hã wa tô aipisutu za'ra wa'wa, ĩsiré 're anomro aba mono da, dama 're ĩzadawa wasu'u za'ra wa'aba mono da. Tane nherẽ, misire Wa'uburé nhib'a'uwẽ te 're mo, asiré wa'aba.