Marcu 13:34 - ꞌRe Ihâimana Uꞌâsi Mono Zadawa Wasuꞌu

³⁴ Romnhimiré'é na, wa za marĩ hã aima waihu'u siromo za'ra wa'wa. Ãté aibâ hã te za tinhorõwa hawi watobro, romhâ na 're morĩ da. Tawamhã sisõ'a ré, tãma iromhuri'wa norĩ ma, te za romhuri hã te te tãma pisutu. Duré 'ridawa 'madâ'â'wai ma zama te za roti, te te sô 're rob'madâ'â pese mono da.

Marcu 13:34 ပူးပေါင်းရင်းမြစ်များ

Mateu 16:19

Danhib'apito, 'ri za'ẽtẽ 're, 're isãmra mono hã te za 'ridawazé hã te te tãma 're iromhuri mono ma hã tãma tisõ, te te dama ãma 're 'ridawa mono wa, ãma 're danhisisi mono da. Tane, wa za aima tisõ 'ridawazé hã, 'Re ihâimana u'âsi mono, da'ãma 're isib'a'uwẽ mono zéb u, dama ãma 're a'ridawa mono wa, ãma 're danhisisi mono da. Uburé marĩ hã da te 're 'manharĩ tõ za'ra mono da, dawi 're i'azawi mono hã te za 'Re ihâimana u'âsi mono hã te te ãma 're asaze, hâiwa ãma. Duré uburé marĩ hã dawi 're i'azawi mono õ hã te za duré te te ãma 're ai'uzei pese.

Zuwã 10:3

Taha si 'ridawa u, sô 're simasisi mono wamhã, te za te te tãma 're 'ridawa, 'ridawa 'madâ'â'wa hã. Sô 're simasisi mono wamhã, imreme te za waihu'u za'ra, pone'ẽrebâ hã. Isisi mono bâ, te za sitẽme sô 're hârâ, rob u te te 're sani za'ra mono da hã.

Roma 13:6

Tahawa, dama ipire norĩ nhimipisutuzéb zarina te za duré rob'uiprazé hã suru na tãma 're i'arĩ za'ra wa'aba mo, ti'ai ãma dama ipire norĩ ma. E marĩ wa. Dama ipire norĩ hã 'Re ihâimana u'âsi mono zadawa para, te te 're romhuri za'ra mono wa.

1 Corĩtu 15:58

Ĩsisãnawã norĩ, ĩma asawi pese za'ra wa'aba norĩ hã, tahawa, te za asiptete u'âsi Cristuhu ãma si 're anomro aba mo, tiwi 're aipizari za'ra wa'aba mono ãna. Wanhib'apito ma, 're iromhuri za'ra wa'aba mono zé hã taréi õ di. Ãne na asina waihu'u za'ra wa'aba wa, te za tãma 're iromhuri pese u'âsi za'ra wa'aba mo, asimi'ẽ na.

Colosu 3:24

Aipawa'âbâ aba zé hã hâiwa ãma asô 're isimi'wara aba mono hã, Wanhib'apito hã za te te aima isõmri za'ra wa'aba na asina waihu'u siromo za'ra wa'aba wa, te za ãne hã tô sena ti'ai ãma asib'apito norĩ ma 're iromhuri wẽ u'âsi za'ra wa'aba mo. Tane nherẽ, ta norĩ ma si 're romhuri za'ra wa'aba mono õ di. Ta norĩ u'âbâ, te Wanhib'apito Cristuhu ma zama 're iromhuri za'ra wa'aba mo, ta hã Wanhib'apito uptabi wama 're hâimana mono wa.

Colosu 4:1

Danhib'apito norĩ, pawa'âbâ ãna aima romhuri'wa norĩ ma, te za 're i'manharĩ wẽ u'âsi za'ra wa'aba mo, i'uwaibaba na si. Asib'apito za'ra wa'wa hã hâiwa ãma 're isãmra mono hã te te 're ai'madâ'â u'âsi za'ra wa'aba mono na, asina 're waihu'u za'ra wa'aba mono wa, te za ãne na hã tãma 're i'manharĩ wẽ u'âsi za'ra wa'aba mo, aima romhuri'wa norĩ ma hã.

Apocalipsi 3:7

— Te za oto duré irob'ui'é, Filadéufia na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzém na te za tãma irob'ui'é, ãne: “Wa hã 're ĩwasété mono õ, wa za oto aima roti za'ra wa'wa, ĩnhimiropisutuzéb zarina, sena na te dama ãma 're i'a'uwaimrami mono 'wa hã. Duréihã Dawi hã te 're hâimana, dama ipire hã. Isõrõwa hã i'ri za'ẽtẽ uptabi. Tame te ni'wa hã 're sãmra, 'ridawazéb ré hã, te te dama 're i'ridawa mono da hã, duré te te dawi 're i'ridawa nhito mono da hã. Tane wa hã, wa hâiwa ãma Ĩmama nhorõwa 'ridawazéb ré 're ĩhâimana u'âsi, ĩwétési. Wa hã te dama 'ridawa wamhã, ni'wa apâ te te dawi sito waihu'u õ di. Duré te 'ridawa nhito wamhã, ni'wa hã te te 'ridawa waihu'u õ di.