Marcu 13:27 - ꞌRe Ihâimana Uꞌâsi Mono Zadawa Wasuꞌu

²⁷ Tawamhã hâiwa ãma tãma romhuri'wa norĩ hã te za we dazô satõrĩ za'ra, Ropoto'wa te te sima 're i'apisutu mono norĩ zô, te te itẽme da'ubumro za'ra mono da, daro mono bâ.

Marcu 13:27 ပူးပေါင်းရင်းမြစ်များ

Zenezi 49:10

Zuda, apito siwazusizé hã te za te te 're tété. Duré isihudu norĩ hã te za õne u'â dama i'rãnho'õmo na dama 're hâimana za'ra. Te za danhoprubzé hã da te tãma 're 'wasari, daro mono bâ. Tawamhã te za duré isimiroti hã da te 're wapari pese za'ra.

Mateu 12:42

Niwa apto'o ré 'Re ihâimana u'âsi mono, za da'ãma isipo'ozéb ãma, duréihã danhib'apito sipi'õ Saba na romnhisi ãma te te 're ida'ab'madâ'â mono hã te za duré asada tihâimana za'ra wa'wa, aiwasédé hã te te ai'ãma sa'ra wa'aba da, 'Re ihâimana u'âsi mono nho'a. E marĩ wa. Ta hã duréihã romhâ uptabi nherẽ, ma tô wi, apito Salomahã u, isimiroti hã te te wapari da, isimiroti hã dahâimanazém na rowaihu'u na hã wẽ uptabi wa. Taha nhimiroti hã pire nherẽ, isipai u ĩnhimiroti si pire uptabi di. Tane nherẽ, ĩnhimiroti hã aima wapari ze za'ra wa'aba õ di. Tahawa, te za tô i'uwaibaba aiwasédé hã ai'ãma sa'ra wa'wa, danhib'apito sipi'õ hã.

Mateu 13:41

Dasiré Ipodo hã hâiwa ãma tãma romhuri'wa norĩ hã te za we satõrĩ za'ra ti'ai u, marĩ iwasédé hã da te 're i'manharĩ u'âsi za'ra mono norĩ hã simisutu aimawi te te ubumro za'ra da, 'Re ihâimana u'âsi mono nhib'a'uwẽ norĩ nhiti. Dawasédé hã da te 're 'manharĩ za'ra mono da, te te dama 're iroti za'ra mono norĩ zama te za ubumro za'ra, hâiwa ãma ĩma romhuri'wa norĩ hã. Wab'ru hã da te 're isano za'ra mono ne, te za da'ubumro za'ra za, õne haré.

Mateu 13:49

Tane te za dama tiromhâiba, rob'rãsutuzéb ãma hã. Hâiwa ãma romhuri'wa norĩ hã te za we dazô ai'aba'ré ti'ai u, dawasété na 're idahâimana u'âsi mono norĩ si te te da'ubumro za'ra da, 'Re ihâimana u'âsi mono nhimiroti te te 're i'madâ'â pese za'ra mono norĩ hawi te te dazani za'ra da hã oto, isiti za'ra 're dahâimana za'ra mono da.

Mateu 24:22

'Re ihâimana u'âsi mono hã bâdâ ma tô sima pisutu, za da te 're irobzépata za'ra mono zé, te te dama wãtari da, rowasété ré da'ãma romhâimana pahâ tõ da. Ãne hã te te sima pisutu õ 'wa'âhã, te aré uburé dasi'utõrĩ pese, za daré irob'rãsutuzém na hã. 'Re ihâimana u'âsi mono hã ãma 're sib'a'uwẽ za'ra mono da, te te sima 're i'apisutu mono norĩ zawi te, te za ãne hã tô 'manha.

Mateu 24:24

E marĩ wa, wa ãne aima waihu'u za'ra wa'wa. Ni'wam norĩ hã te za datẽme 're nomro, danho'reptui'wa na, niha wamhã, 'Re ihâimana u'âsi mono zadawa 'mahârâ'wa na dama 're siwasu'u za'ra mono da, sadawa nhipese sina. Ta norĩ hã marĩ dama i'manharĩ waihu'u'õ hã te za duré te te dama 're 'manharĩ za'ra, 'Re ihâimana u'âsi mono zadawa param newa, da te ãma 're sasõmri za'ra mono da. Isazei'wa norĩ zama te te dame ãma 're saze za'ra mono da, te za ãne na te te dama 're romhõsi za'ra. Tane nherẽ, te te dame 're sazei waihu'u za'ra mono õ di za ta norĩ hã, 'Re ihâimana u'âsi mono te te sima 're apisutu siromo mono wa, ãma 're sib'a'uwẽ za'ra mono da hã.

Mateu 24:31

Tawamhã hâiwa ãma tãma romhuri'wa hã tinhimnhihârâzém na te za oto amnhihâ, hârâ 'rãihâ uptabi na, daro mono bâ da te iwapari za'ra da hã. Simnhihârâ wi, hâiwa hawi tãma romhuri'wa norĩ hã te za we dazô satõrĩ za'ra, ti'ai u. Tawamhã 'Re ihâimana u'âsi mono hã ãma 're sib'a'uwẽ za'ra mono da, te te sima 're i'apisutu mono norĩ hã te za we daro mono bâ te te simro, itẽme.

Marcu 13:20

'Re ihâimana u'âsi mono hã ma tô sima pisutu, bâdâ hã za da te 're irobzépata za'ra mono zéb da hã, te te dama wãtari da, rowasété ré da'ãma romhâimana pahâ tõ da. Ãne hã te te sima pisutu õ 'wa'âhã, te aré uburé dasi'utõrĩ pese, za da'ãma irob'rãsutuzém na hã. 'Re ihâimana u'âsi mono hã ãma 're sib'a'uwẽ za'ra mono da, te te sima 're i'apisutu mono norĩ zawi te, te za ãne hã 'manha.

Marcu 13:22

E marĩ wa, wa ãne aima waihu'u za'ra wa'wa. Ni'wam norĩ hã te za datẽme 're nomro, danho'reptui'wa na, niha wamhã, 'Re ihâimana u'âsi mono zadawa 'mahârâ'wa na dama 're siwasu'u za'ra mono da, sadawa nhipese na. Ta norĩ hã marĩ dama i'manharĩ waihu'u'õ hã te za te te dama 're 'manharĩ za'ra, 'Re ihâimana u'âsi mono zadawa para newa, da te ãma 're sasõmri za'ra mono da. Isazei'wa norĩ zama te te dame ãma 're saze za'ra mono da, te za ãne na te te dama 're romhõsi za'ra. Tane nherẽ, te te dame 're sazei waihu'u za'ra mono õ di za ta norĩ hã, 'Re ihâimana u'âsi mono te te sima 're apisutu siromo mono wa, ãma 're sib'a'uwẽ za'ra mono da.

Marcu 13:28

Tawamhã Zezusi hã ma duré ãne tãma waihu'u za'ra: — Figuera wede na wa za oto aima ãma romnhimiré'é za'ra wa'wa, waihu'u za'ra wa'aba da. Figuera wede panhipti hã wapti'i wamhã, duré isu té 're wairébé mono wamhã, tawapsi te za oto ãma iwaihu'u za'ra wa'wa, tã 're ita'a mono zéb u 're iro'rutu mono zém na hã oto.

Luca 16:22

Tawamhã ma tô oto dârâ, isibrob'õ hã. Dâ'â wamhã, hâiwa u ma tô siwi ti'â, 'Re ihâimana u'âsi mono ma, romhuri'wa norĩ hã. Abra'ãhã 'rata, te oto 're sãmra, dame 're sai mono da. Isibro pe hã ma tô duré dârâ. Dâ'â wamhã, ma tô dasiwi sẽrẽ ni, ab're 're.

Luca 18:7

Wẽ prã zahã, te za, u, imrotõ hã pawapto. E bété tinhib'a'uwẽ hã te te 're pawaptob za'ra mono õ di za, 'Re ihâimana u'âsi mono hã. Ãté rowa'a na, ãté bara na te za sô 're hãsi, te te 're pawaptob za'ra mono da. E bété te te 're pawaptop su'u za'ra mono õ di za.

Zuwã 10:16

Ni'wam norĩ hã te duré 're nomro, ĩnhib'a'uwẽ 're hâimana za'ra mono da hã. Ta norĩ ãma, wa za pone'ẽrebâ na simiré'é za'ra, ĩnhimiwa'ra 're, 're isi'ubumroi mono õ na hã. Ta norĩ zama wa za ĩsitẽme ubumro. Tawamhã te za ĩmreme hã te te 're wapari pese za'ra. Pone'ẽrebâ norĩ hã maparane danhimi'ubumro hã siré oto 're isi'ubumroi mono ne, te za simisutu ĩnhib'a'uwẽ 're nomro, misi i'madâ'â'wa, tãma 're ĩhâimana za'ra mono wa za.

Zuwã 11:52

Zudeu norĩ zada si, dâ'â õ di za, Zezusi hã. Daro mono bâ 'Re ihâimana u'âsi mono, ti'ra da, uburé te te 're i'apisutu mono norĩ zada, te za dârâ, simisutu i'ra si 're danomro mono da oto.

Roma 8:33

Wa norĩ hã 'Re ihâimana u'âsi mono, tinhib'a'uwẽ da, te te sima 're iwa'apisutu mono norĩ si, ma tô te te 're wa'awẽsãmri, wawasédé hã te te oto wa'ãma 're i'ab'madâ'â mono õ zarina. E ni'wam norĩ hã wawasédé te te wa'ãma 're sa'ra mono da bâ bété. Ni'wam norĩ hã, wawasédé te te wa'ãma 're sa'ra waihu'u mono õ di za oto. Ãne wa za duré aima waihu'u za'ra wa'wa. Cristu Zezusi hã ma tô wazada dârâ, wa'upana. Apâ ma tô duré hâiwa'udu. Tahawa, te oto Timama nhimire niwĩ 're sãmra, dama pire na. Timama ma, te duré te te 're wa'awasu'u wẽ u'âsi, wazada idâ'âzéb zarina, wawasédé hã te te wa'ãma 're ab'madâ'â tõ mono da oto. Ãne wa, e ni'wam norĩ hã wawasété na te te wama 're nharĩ zahu za'ra mono da bâ oto. Mare di.

Colosu 3:12

A norĩ wa'wa hã 'Re ihâimana u'âsi mono nhib'a'uwẽ, te tô oto 're aihâimana za'ra wa'aba mo. Ta hã te te 're asawi pese za'ra wa'aba mono wa, ma tô sima aipisutu za'ra wa'wa, taha ma si tãma 're aihâimana za'ra wa'aba mono da oto. Tahawa, da te 're robzépata za'ra mono wamhã, te za tô oto da'ãma 're aiwamri za'ra wa'aba mo. Te za duré 're idapawapto wẽ za'ra wa'aba mo. Asiré norĩ ma, aipire na 're aihâimana za'ra wa'aba mono na, 'râwi 're asi'madâ'â ze za'ra wa'aba mono õ di za. Aiwaimri te za dama 're aihâimana za'ra wa'aba mo. Duré aiwara sina dazada 're asahi za'ra wa'aba mono õ di za.

2 Tesalonita 2:1

Ãté ni'wa hã ma tô aima rowasu'u za'ra wa'wa, Wanhib'apito Zezu Cristu za we apâ wazô iwisizéb za'ra na hã. Ãté bâdâ hã iwa waptã'ã newa, ma tô aima rowasu'u za'ra wa'aba ni. Tawamhã iwasu'u hã tô sena newa, ãma 're rosa'rata za'ra wa'aba mono õ di za, 're aipẽ'ẽwara za'ra wa'aba mono tõ da. Ãté 'Re ihâimana u'âsi mono hã, marĩ hã ni'wai ma, te te iwaihu'u zarina newa, ãté duré marĩ hã te te iwapari zarina newa, ãté duré wanhimi'ui'éré zarina newa, ni'wa hã ma tô ãne na aima rowasu'u za'ra wa'wa. Mare di. Ãne danhimirowasu'u hã 're saze za'ra wa'aba mono õ di za, dazadawa nhipese na da te aiwi 're udâ tõ za'ra wa'aba mono da. Wanhib'apito wei morĩ õ ré, daro mono bâ te za 'Re ihâimana u'âsi mono nhimiroti zada 're dahâimana za'ra. Duré ni'wa hã iwasété uptabi hã te za dama sihâi'ré. Ta hã, ropipa ãma za oto 're ihâimana mono zé hã.

2 Timotiu 2:10

Te irobzépata da hã ĩma pire nherẽ, ĩsisawi õ di, te robzépata tõ da hã. Te 're robzépata mono nherẽ, 'Re ihâimana u'âsi mono hã tinhib'a'uwẽ da, te te sima ipisutu za'ra norĩ hã wa za te 're apawaptob u'âsi, Cristu Zezusi hã te te 're saze za'ra mono da, taha zarina tinho'reptuzé hã te te sina 're uwaimrami za'ra mono da, rowẽ na i'rata 're hâimana u'âsi za'ra mono da.

1 Pedru 1:2

Aipoto za'ra wa'aba õ ré, ma tô Wamama hã sima aipisutu siromo za'ra wa'wa, 'Re ihâimana u'âsi mono hã, isib'a'uwẽ na oto 're anomro aba mono da. Taha da, ma tô Tipẽ'ẽzani hã aipẽ'ẽ 're aima sõmri za'ra wa'wa, aiwẽ uptabi na oto õhõ ãma si 're anomro aba mono da, duré Zezu Cristuhu nhimiroti si 're wapari pese za'ra wa'aba mono da, duré Cristu hã dazada idâ'âzéb zarina, aipẽ'ẽ 're te te 're ai'a'upsõi wa'aba mono wa, aiwasété ãna ãma 're anomro aba mono da oto. 'Re ihâimana u'âsi mono ma, wa ai'ãma 're ĩmreme u'âsi za'ra wa'wa, isimizawizé hã ai'ãma 're hâimana u'âsi za'ra wa'aba mono da, rowẽ u'âsi, duré ãma 're anomro aba mono da, taha ãma si.