Marcu 12:29 - ꞌRe Ihâimana Uꞌâsi Mono Zadawa Wasuꞌu

²⁹ Tawamhã Zezusi hã ma tô ãma sada'â asa: — 'Re ihâimana u'âsi mono nhimiroti, danhipai u ipire uptabi hã ãne: “Izaraéu nhihudu norĩ, ma'ãpé ĩwapari pese za'ra wa'aba za. 'Re ihâimana u'âsi mono hã Wanhib'apito hã, misire danhib'apito uptabi, te 're hâimana.

Marcu 12:29 ပူးပေါင်းရင်းမြစ်များ

Provébiu 23:26

Ĩ'ra, te aima 're iroti mono zé ma hã ma'ãpé 're aipo're pese mono. Duré 're ĩhâimana wẽ mono zéb zarina si 're aihâimana mono.

Mateu 10:37

— Ni'wam norĩ hã te te 're ĩzawi za'ra mono zém nhipai u, timama norĩ hã te te 're sawi pese za'ra mono wamhã, ĩ'ãma 're nomro waihu'u mono õ di za. Duré ni'wam norĩ hã ĩzawi nhipai u ti'ra norĩ te te 're sawi pese za'ra mono wamhã, ĩ'ãma 're nomro waihu'u mono õ di za duré.

Mateu 23:9

Dawaptẽrẽ pire zém na, aimama za'ra wa'aba na hã 're danhisi za'ra wa'aba mono õ di za. E marĩ wa. Misire te Aimama za'ra wa'wa hã 're hâimana hâiwa ãma, siwaprosi.

Luca 10:27

Tahawa, ma tô aibâ hã ãma sada'â asa, ãne: — 'Re ihâimana u'âsi mono Asib'apito 're morĩ wa, te za 're isawi pese mo, uburé aipẽ'ẽ na, duré uburé asiptete na, duré uburé asimirosa'rata na. Te za duré 're idazawi pese mo, uburé. Marĩ iwẽ zô asima 're irob'madâ'â mono ne, te za duré uburé dama zama sô 're irob'madâ'â mo, iwẽ zô. Ãne isimiroti na rob'ui'éré hã.

Roma 3:30

'Re ihâimana u'âsi mono hã tô sena, misire uburé Danhib'apito uptabi. Zezusi hã te te 're isazei pese za'ra mono zéb zarina si, te za te te sima ãma 're aroti, iwasédé hã te te oto ãma 're ab'madâ'â tõ mono da, taha zarina si te te oto 're awẽsãmri mono da, zudeu norĩ hã, duré zudeu'õ norĩ hã.

1 Corĩtu 8:4

Duré, waihu'u pese newa, romhâiba 'manharĩ ãma 're idawata za'ra mono zéb da, dasa, da te tãma 're isõmri za'ra mono na, wa za oto aima roti za'ra wa'wa. E romhâiba 'manharĩ ma, dasa, da te tãma 're isõmri za'ra mono na, te za a norĩ wa'wa hã dame ãma 're asaihuri aba mo, isazei'wa 're anomro aba mono nherẽ. E dame ãma 're asaihuri aba mono õ di za. Ãne, wa za aima ãma waihu'u za'ra wa'wa. Romhâiba 'manharĩ ãma 're idawata za'ra mono hã, 'Re ihâimana u'âsi mono nei õ di. Iwaihu'u pese zéb da hã, marĩ hã tãma hâimana õ di. Robaba uptabi di. Tarére ta hã rob'manharĩ. Ãne hã wama waihu'u pese za'ra di. Siwaprosi, te 'Re ihâimana u'âsi mono si 're hâimana, waihu'u pese uptabi na. Isine hã marĩ hã isipai u iwaihu'upe hã 're 'maihâimana mono õ di, aimawi hã. Robaba uptabi di. Ãne hã wama waihu'u pese za'ra di duré.

Galata 3:20

Ni'wa hã ti'ai ãma si'uihâ na tinhimiroti hã te te dama waihu'u wamhã, ni'wa hã isãna'remhã hâimana õ di, isimiroti hã te te dama iwaihu'u da hã. Tane 'Re ihâimana u'âsi mono hã. Si'uihâ na ma tô Abra'ãhã ma waihu'u, iwẽ na za te te tãma ãma 're i'a'uwaimrami mono na hã.

1 Timotiu 1:5

E marĩ da, wa tô ãne hã aima waihu'u. Wa tô ĩsima aiwẽ, isazei'wa norĩ hã 're pawaptob za'ra mono wa, Wamama zawi pese 'wa, duré dazawi pese 'wa 're nomro mono da hã. Isazei'wa norĩ hã simirosa'rata wẽ ré si, te za 're nomro. Ãne wamhã, marĩ te te 're i'manharĩ wasété za'ra mono na, 'râwi 're siwẽ'õ za'ra mono õ di za. Wanhib'apito zazei uptabi 'wa, te za 're nomro. Tawamhã te aima iwaihu'uzéb zarina 're nomro mono wamhã, te za tô dasisawizé hã ipẽ'ẽ 're tãma 're hâimana za'ra.

1 Timotiu 2:5

Misire hâiwa ãma 're ihâimana mono si, uburé Danhib'apito uptabi hã. Misire da'ãwisi wẽ 'wa Wamama u hã. Ta hã Cristu Zezusi, aibâ na 're ihâimana mono.

Tiagu 2:19

Misire uburé Danhib'apito uptabi hã te 're sãmra. Ãne na hã aima waihu'u pese di. Taha wasu'u na ma tô ãma isaze. Wa'uburé norĩ zama ma tô misire Danhib'apito uptabi wasu'u hã waihu'u za'ra. Tahawa, te pipa te, 're rẽrẽ'ẽ za'ra.