Marcu 10:14 - ꞌRe Ihâimana Uꞌâsi Mono Zadawa Wasuꞌu

¹⁴ Ãne te te idawẽ'õ za'ra zém na hã, te te wapari ze za'ra õ di, Zezusi hã. Tahawa, te ãne tãma nharĩ za'ra: — Tô'ã. Dawi rosawi za'ra wa'aba tõ. A'â we ĩtẽme da te simroi mono, ai'uté norĩ hã. Ã norĩ hã ai'uté hã õne haré simizazei pese na 're ihâimana za'ra mono ne, ni'wam norĩ 're hâimana za'ra mono wapsi, te za 'Re ihâimana u'âsi mono hã ãma 're sib'a'uwẽ za'ra.

Marcu 10:14 ပူးပေါင်းရင်းမြစ်များ

Zenezi 17:7

Ĩnhimiropisutuzé õne u'â aima 're hâimana mono da, duré asihudu norĩ ma zama õne u'â tãma 're hâimana za'ra mono da zama wa aima 'manha ãne: Õne u'â, ate 'Re ihâimana u'âsi mono na, duré asihudu norĩ te 'Re ihâimana u'âsi mono na, wa za tãma 're ĩhâimana za'ra.

Salmu 78:4

Ta hã, wa'ra norĩ wi hã wa te 're udâ za'ra mono õ di za. Wa za wanhihudu norĩ ma hã Uburé Danhib'apito nhiptetezé hã wa te 're wasu'u za'ra, duré tinhiptete na marĩ te te 're i'ab'manharĩ wẽ mono zém na hã.

Mateu 18:10

— Ãhãta ai'uté norĩ hã te asimro. Ãma 're rosa'rata wasété za'ra wa'aba mono tõ, dama iwapu newa. Tô sena, wa aima rowasu'u za'ra wa'wa. Hâiwa ãma 'Re ihâimana u'âsi mono ma romhuri'wa norĩ hã te ai'uté mono bâ te te 're 'madâ'â pese za'ra, misi si, tite mono bâ. Ta norĩ hã te Ĩmama nho'a te te 're 'madâ'â pese za'ra, hâiwa ãma 're isãmra mono nho'a.

Mateu 18:4

Ni'wam norĩ hã ã ai'uté ne tipire na 'râwi 're si'madâ'â za'ra mono õ wapsi, te za pire na 're hâimana u'âsi za'ra, 'Re ihâimana u'âsi mono, da'ãma 're isib'a'uwẽ mono zéb ãma hã.

Mateu 19:14

Tawamhã Zezusi te tãma nharĩ za'ra, tisiré 're inomro mono norĩ ma, ãne: — Tô'ã. Dawi rosawi za'ra wa'aba tõ. A'â we ĩtẽme da te simroi mono, ai'uté norĩ hã. Ã norĩ ai'uté hã õne haré simizazei pese na 're ihâimana za'ra mono ne, ni'wam norĩ tane 're hâimana za'ra mono wapsi, te za ta norĩ 'Re ihâimana u'âsi mono hã ãma 're sib'a'uwẽ za'ra.

Mateu 5:10

— Duré, ni'wam norĩ hã 'Re ihâimana u'âsi mono te te sima 're iwẽ za'ra mono zéb zarina, uburé marĩ iwẽ hã te te 're 'manharĩ za'ra mono da si, te te sima 're wẽ za'ra mono wa, da te tãma 're irob'manharĩ wasété za'ra mono norĩ ma si, tãma 're rowẽ uptabi za'ra mono di za. E marĩ wa. 'Re ihâimana u'âsi mono hã ta norĩ ãma 're sib'a'uwẽ za'ra mono wa. — Ãne ma tô Zezusi hã tãma rowasu'u za'ra, tisiré 're inomro mono norĩ ma.

Mateu 5:3

— Ni'wam norĩ hã 'râwi 're isipawapto waihu'u za'ra mono õ na 're siwaihu'u za'ra mono wamhã, duré 'Re ihâimana u'âsi mono si za ta norĩ hã i'upana te te 're ipawapto wẽ za'ra mono na te te sina 're waihu'u za'ra mono wamhã, ta norĩ si te za rowẽ na 're hâimana za'ra, ãma 're sib'a'uwẽ za'ra mono wa.

Marcu 3:5

Tawamhã Zezusi te da'ab'madâ. Te te ãma irosa'rata norĩ ãma hã, toi õ di. Simirosa'rata wasété nhiptete za'ra wa, ta norĩ ãma pẽ'ẽzé za'ra di. Tawamhã isimizu'rã're ma, te tãma tinha, ãne: — Ma'ãpé, asimizu wahutu. Tawamhã ma tô tinhimizu hã wahutu, aibâ hã. Tahawa, ma tô tinhimizu pese.

Marcu 8:33

Tawamhã te te sina wapari wamhã, tisiré 're inomro mono norĩ u, ma aipi'ra. Tawamhã Pedruhu ma, te ãne tinha: — Satanasi, mo oto aimorĩ, ĩnhiti. 'Re ihâimana u'âsi mono nhimirosa'rata zarina rosa'rata õ di, a hã. Danhimirosa'rata zarina si, te ĩ'ãma irosa'ra, a hã.

Zuwã 3:3

Tahawa, te Zezusi hã asa tãma tinha, ãne: — Tô sena, wa za aima waihu'u. Dapẽ'ẽ 're, 're dapoto téb za'ra mono õ wamhã, 'Re ihâimana u'âsi mono nhib'a'uwẽ 're danomro mono õ di za.

Zuwã 3:5

Tawamhã Zezusi te duré asa tãma tinha, ãne: — Tô sena, wa aima waihu'u za'ra wa'wa. Ai'uté hã dama 're poto za'ra mono wamhã, 'Re ihâimana u'âsi mono nhib'a'uwẽ, 're nomro siromo mono õ di za. Tipẽ'ẽzani hã te te dama 're anhomri mono wapsi, te za 're dapoto téb za'ra, dapẽ'ẽ 're. Tawapsi te za oto isib'a'uwẽ si 're danomro. 'Re ihâimana u'âsi mono hã 're idanomro wasété mono hawi te te 're da'a'upsõi mono wa, duré Tipẽ'ẽzani hã te te dama 're anhomri mono wapsi, te za oto dapẽ'ẽ 're, 're dapoto téb za'ra. Tawapsi te za oto duré isib'a'uwẽ 're danomro. Dapẽ'ẽ 're, 're dapoto téb za'ra mono õ wamhã, 'Re ihâimana u'âsi mono nhib'a'uwẽ, 're danomro mono õ di za.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:39

Ãne ma tô aima ropisutu siromo za'ra wa'wa, te te aima 're sõmri za'ra wa'aba mono da, asihudu norĩ ma zama. Wasiré'õ norĩ ma zama ma tô tãma ropisutu siromo za'ra. Wanhib'apito, 'Re ihâimana u'âsi mono, za sitẽme sô 're ihârâ za'ra mono norĩ ma, ma tô ropisutu siromo za'ra, Tipẽ'ẽzani na hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 3:25

A norĩ wa'wa hã, wasiré wahi'rata norĩ nhihudu te 're aihâimana za'ra wa'aba mo. Tahawa, wahi'rata norĩ ma, 'Re ihâimana u'âsi mono te te 're i'apisutu mono zé hã te duré wama 're hâimana za'ra. Abra'ãhã ma, uimrehẽne ma tô tãma ropisutu 'rata. Ãne ma tô tãma ropisutu: “Romhutu'õpsi te za ni'wa hã asihudu hã te te 're da'apawapto, daro mono bâ rowẽ na 're danomro mono da.” Ãne ma tô taha ma ropisutu na'rata siro.

Roma 11:16

Ãne na, wa za oto aima ãma romnhimiré'é za'ra wa'wa. I'u'ẽtẽ wapu hã da te 're 'manharĩ za'ra mono wamhã, sebre õ ré, te za suru na da te 're po'o za'ra, 'Re ihâimana u'âsi mono ma, da te 're sõmri za'ra mono da. Misi i'u'ẽtẽ wa'õno hã da te tãma 're sõmri za'ra mono nherẽ, wahuré da te tãma 're isõmri za'ra mono zé, te wasu'u. Duré ãté ni'wa hã te za 'Re ihâimana u'âsi mono ma tinha, ãne: “Ã hã wede 're isa mono zari hã wa aima pisutu, ate da.” Ãne hã wede hã zahadu 're sa mono ré, ni'wa hã wedezari si 'Re ihâimana u'âsi mono te da, te te tãma pisutu nherẽ, ipanhipti zama ite hã za. Ã hã wedezari hã, Izaraéu nhihudu norĩ hi'rata norĩ, te wasu'u. Duré ipanhipti hã ta norĩ nhihudu norĩ, te wasu'u. Izaraéu norĩ hi'rata norĩ hã, 'Re ihâimana u'âsi mono ma si, 're hâimana za'ra mono da, te te 're ipisutu za'ra mono ne, te za duré isihudu norĩ zama tãma 're hâimana za'ra, wedezari si 'Re ihâimana u'âsi mono te da, da te tãma 're pisutu za'ra mono nherẽ, ipanhipti zama ite ne tãma 're hâimana za'ra mono da oto.

Roma 11:28

Zudeu norĩ hã Cristuhu wasu'uwẽ hã ma tô ahâ na te te siwi 're wẽ'õ za'ra. Tahawa, te oto 'Re ihâimana u'âsi mono nhitob'ru ne 're hâimana za'ra. Taha wa'rãmi, ma tô ai'ãma 're siwadi za'ra wa'wa, asiré zudeu'õ norĩ ãma hã. Tane nherẽ, isib'a'uwẽ 're nomro mono da, te te pisutu za'ra wa, te ta norĩ hã te te 're azawi pese u'âsi sima, ta norĩ hi'rata ma, te te sina iropisutu za'ra zéb zarina.

1 Corĩtu 14:20

Ĩsisãnawã norĩ, ai'uté norĩ hã siwa'ru te te sima 're irosa'rata za'ra mono ne, asima ãma 're rosa'rata za'ra wa'aba mono õ di za, te aima ãma irowasu'u za'ra wa'aba zém na hã. Duré ai'utépré norĩ hã tiwasédé te te 're i'manharĩ za'ra mono õ ne, te za aiwasété ãna 're anomro aba mo. Aihâimana prédub sina, te za asima ãma 're irosa'rata u'âsi za'ra wa'aba mo.

1 Corĩtu 7:14

Duré aibâ norĩ hã isazei'õ'wa na 're hâimana za'ra mono nherẽ, imro hã isazei'wa na tãma 're hâimana za'ra mono wamhã, 'Re ihâimana u'âsi mono hã pi'õ norĩ ma, rowẽ te te tãma 're ipisutu za'ra mono zéb u'âbâ, te za tô duré aibâ norĩ ma, te te tãma 're pisutu za'ra rowẽ hã, imro hâiba u'âbâ, isazei'õ'wa na 're hâimana za'ra mono nherẽ, aibâ norĩ hã. Duré pi'õ norĩ hã isazei'õ'wa na 're hâimana za'ra mono nherẽ, imro hã isazei'wa na tãma 're hâimana za'ra mono wamhã, 'Re ihâimana u'âsi mono hã aibâ norĩ ma, rowẽ te te tãma 're ipisutu za'ra mono zéb u'âbâ, te za tô duré pi'õ norĩ ma, te te tãma 're pisutu za'ra rowẽ hã, imro hâiba u'âbâ, isazei'õ'wa na 're hâimana za'ra mono nherẽ, pi'õ norĩ hã. Ãnei õ 'wa'âhã, i'ra norĩ isazei'õ'wa norĩ 'ra ne, te aré tô 're hâimana za'ra, 'Re ihâimana u'âsi mono ma hã. Tazahã imama norĩ hâiba u'âbâ, te za tô rowẽ si te te tãma 're apisutu, 'Re ihâimana u'âsi mono hã.

Éfézu 4:26

Nimahã na 're asiti'ru za'ra wa'aba mono wamhã, 're aiwasété za'ra wa'aba mono õ di za, aiwasédé hã 're 'manharĩ za'ra wa'aba mono tõ da. Duré asiti'rui ré bâdâ hã wahuré ai'ãma 're si'utõrĩ za'ra wa'aba mono tõ da, te za asiwi 're iwẽ'õ za'ra wa'aba mo, Wa'uburé nhimiwada'uri zarina aiwasédé hã 're 'manharĩ za'ra wa'aba mono tõ da dama.

2 Timotiu 1:5

Duré Wanhib'apito zazei'wa na tô sena 're aihâimana mono na, wa ai'ãma po're puru. Ai'rada Loidi norĩ hã ma tô ana me hã Wanhib'apito zazei'wa na 're hâimana zahuré, Eunisihi me. Ta norĩ ne, tô sena Wanhib'apito zazei'wa 're i'aimorĩ na hã, tô ĩma aiwaihu'u pese di.

2 Timotiu 3:15

'Watébrémi na 're aihâimana mono zém hawi, aima waihu'u pese di, 'Re ihâimana u'âsi mono nhimiroti 'rata na rob'ui'éré hã. Taha zarina hâiwa hawi rowaihu hã te aima 're hâimana, asõ'reptuzé hã asina i'uwaimramizéb da hã, Cristu Zezusihi zazei'wa 're aimorĩ wa.

Zozué 8:35

Mozésihi nhimiroti na ãma irob'ui'éré mono bâ, ma tô Zozué hã uburé pese sõré, Izaraéu nhihudu uburé norĩ ma, pi'õ norĩ ma, ai'uté norĩ ma, duré isiré a'uwẽ'õ iwazari 're ihâimana za'ra mono norĩ ma. Te te 'mairẽme õ pese na ma tô uburé sõré, Zozué hã.

1 Pedru 2:2

Ai'uté ipoto té hã tina hâiwa'u zô 're i'ru'ru mono ne, te za Wanhib'apito nhimiroti zô si 're irob'ruiwapari za'ra wa'aba mo, ãma 're asiptete za'ra wa'aba mono da, aihâimana wasété hawi asõ'reptuzé hã 'râwi oto asina 're waihu'u za'ra wa'aba mono da.

Apocalipsi 14:5

Duré 're sadawa nhipese za'ra mono õ di. Duré iwasédé hã sena na da te ãma 're sa'ra waihu'u mono õ di, iwẽ na si 're hâimana za'ra mono wa.

1 Samuéu 1:11

Tawamhã te ropisudu sena na tãma 'manha ãne: — Wanhib'apito 'Re ihâimana u'âsi mono I'aiwaihu'upe, ma'ãpé asib'a'uwẽ hã, ĩ'madâ'â! Duré sa'ẽtẽ na, robzei'õ te te ĩ'azârizé hã 'madâ'â! Tahawa, asib'a'uwẽ ãma, ĩ'ãma aipo're si'âri õ di za! Duré a hã ĩ'ra ĩma sõmri wamhã, wa za aima ropisutu, apâ te aima sõmri da za. Duré niwamhã ta hã tizéré hã te te sihâri õ di za.

1 Samuéu 1:22

Tane nherẽ, Ãna hã ime morĩ za'ra õ di. Tahawa, te ãne tãma tinha, timro Eucanahã ma: — Ĩhâ te te rẽme wapsi, wa za subza, Uburé Danhib'apito nhorõwa u hã, õmem haré oto 're hâimana u'âsi mono da.