Marcu 1:5 - ꞌRe Ihâimana Uꞌâsi Mono Zadawa Wasuꞌu

⁵ Da'ahâ uptabi na te itẽme 're dasito, Zudéa na danhipti'a nho'õmo nhisi hawi. Zeruzalẽ na 'ri nho'õmo nhisi hawib zama, te itẽme 're dasito. Tawamhã dasisõ'a dawasété na, 'Re ihâimana u'âsi mono ma 're dasiwasu'u za'ra mono wamhã, ma tô â dawabzuri hã te te dama 're ab'manharĩ Zuwã hã, Zodã pa na â nhisi ãma.

Marcu 1:5 ပူးပေါင်းရင်းမြစ်များ

Salmu 32:5

Tawamhã ĩwasété na wa tô aima ĩsiwẽ'õ. Ĩnhimi'manharĩ wasété zé hã te aiwi simi'uri õ di. Ĩwasédé hã te aima wasu'u da, wa tô ĩsima rowairébé. Tawamhã a hã uburé ĩwasédé hã ĩ'ãma 're a'madâ'â mono õ di oto.

Provébiu 28:13

Ni'wa tiwasédé te te sima 're tété u'âsi mono wamhã, rowẽzé tãma 're ihâimana mono da hã mare di. Tane nherẽ, ni'wa isiwẽ'õ zarina te te rẽme wamhã, te za 'Re ihâimana u'âsi mono hã ãma 're isiwamri mono zé hã sina uwaimra.

Mateu 4:25

Tahawa, ma tô da'ahâ uptabi na isarina dasi'ré, Galiléa hawimhã, duré Decapori hawimhã, duré Zeruzalẽ hawimhã, duré Zudéa na danhipti'a nho'õmo nhisi hawimhã. Duré Zodã pa zara niwĩ 're idasi'ubumroi mono norĩ zama ma tô itẽme hã dasito.

Marcu 1:4

Tawamhã Izaia te te dama irob'ui'éré zarina, te oto Zuwã Batista hã â dawabzuri hã te te dama 're ab'manharĩ, a'ubuni wi. Ãne te tawamhã te te oto dama 're roti: — Ma'ãpé, aiwasété wi 're aipizari za'ra wa'aba mono, 'Re ihâimana u'âsi mono, marĩ 're i'manharĩ wasété za'ra wa'aba mono zé te te aima 're apari aba mono da. Tawamhã â dawabzuri hã wa za te aima 're ab'manharĩ 'wa. — Ãne ma tô te te dama 're roti, Zuwã Batista hã.

Marcu 1:6

Zuwã hã awaru ba'õmore zéré 'manharĩ na te 're si'uza. Duré romhâ 'manharĩ hâiwaré na te ãma 're si'usisi. 'Riti na si, te duré 're sa. Ropĩni na zama te duré 're sa.

Zuwã 1:28

Ãne romhâimanazé hã Betãnha na 'ri wa'õtõ nhisi ãma Zodã zara niwĩ â dawabzuri te te dama 're i'ab'manharĩzéb ãma hã.

Zuwã 3:23

Zuwã Batista hã te duré te te dama 're ab'manharĩ â dawabzuri hã, wanhiti. Sarĩ na 'ri nhisi 'rata â hã, te isa'ẽne hã 're hâimana. Tahawa, te tame a'â nhamra, Eno na â nhisi 'rata, Zuwã Batista hã. Tawamhã te nasi itẽme dasito, â dawabzuri hã te te dama ab'manharĩ da. Zahadu Zuwã hã danhib'apito te te 'rui õ di, da te dasiwi sẽrẽ da, dazazéb 're. Tahawa, te zahadu te te dama 're ab'manharĩ.

Zezusihi zadawa wasuꞌuꞌwa norĩ nhimiromhuri na robꞌuiꞌéré 19:18

Ni'wam norĩ hã te te 're saze za'ra mono õ ré, abzé te te 're i'manharĩ za'ra mono zém na ma tô siwasu'u za'ra danho'a, tiwasédé te te 're i'manharĩ za'ra mono zém hawi isipizari za'ra na hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:38

Tawamhã Pedru te duré asa dama tinha, ãne: — Aiwasété wi, te za aipizari za'ra wa'wa, rẽme pese za'ra wa'aba da, Zezusihi nhimiroti na si oto 're anomro aba mono da. Zezu Cristuhu zazei uptabi 'wa na asiwasu'u za'ra wa'aba sina, te za â dawabzuri hã i'manharĩ za'ra wa'wa. Aihâiba mono bâ te za ãne i'manharĩ za'ra wa'wa, aiwasédé hã te te aima pari za'ra wa'aba da, 'Re ihâimana u'âsi mono hã. Tawamhã Tipẽ'ẽzani te za aima sõmri za'ra wa'wa.

Tiagu 5:16

Ãne wa, Wanhib'apito hã aihâzé wa, te te 're aipese za'ra wa'aba mono da, marĩ 're 'manharĩ wasété za'ra wa'aba mono wamhã, te za asima 're asiwasu'u za'ra wa'aba mo. Te za duré asima tiwi 're irowaptẽrẽ za'ra wa'aba mo, Wanhib'apito wi. Tawamhã dahâimana wẽ sina, da te tiwi 're rowaptẽrẽ za'ra mono wamhã, da te tiwi 're irowaptẽrẽ za'ra mono zéb zarina, te za tô te te dama ãma 're a'uwaimrami, Wanhib'apito hã.

Zozué 7:19

Tawamhã Acãhã ma, te Zozué tinha, ãne: — Ĩ'ra, sena na te za asiwẽ'õ, Uburé Danhib'apito, Izaraéu nhihudu norĩ te 'Re ihâimana u'âsi mono nho're. Ĩma wasu'u na, marĩ i'manharĩzé hã; duré rosa'rata tõ, asima i'udâ da hã.