Luca 9:50 - ꞌRe Ihâimana Uꞌâsi Mono Zadawa Wasuꞌu

⁵⁰ Tahawa, te Zezusi hã asa tãma nharĩ za'ra, Zuwã norĩ ma: — Tiwi sawi za'ra wa'aba õ di za, isimiromhuri hã. Ãté ni'wa hã te te 're aiwasu'u wasété za'ra wa'aba mono õ di za. Tane wamhã, aiwẽ wa'aba 'wa na, te za ãma iwaihu'u za'ra wa'wa. Tahawa, aibâ hã aiwẽ wa'aba 'wa, 're morĩ nherẽ, tiwi sawi za'ra wa'aba õ di za, isimiromhuri hã.

Luca 9:50 ပူးပေါင်းရင်းမြစ်များ

Mateu 12:30

— Ni'wam norĩ hã ĩwẽ'wa 're nomro mono õ wamhã, ta norĩ hã te ĩzada 're hâimana za'ra. Duré ni'wam norĩ hã 'Re ihâimana u'âsi mono u, te 're ida'anhimroi mono ne, te te 're danhimroi mono õ wamhã, ta norĩ hã te 'Re ihâimana u'âsi mono nhiti, te te 're dazatõrĩ za'ra.

Mateu 17:24

Tawamhã Zezusihi siré 're inomro mono norĩ hã ma tô ai'aba'ré, Cafanau na 'ri nho'õmo nhisi u. Sihutu wamhã, rob'uiprazé arĩ ubumroi'wa norĩ hã ma tô Pedru siwi sadanha, 'Re ihâimana u'âsi mono nhorõwa 'ri ma, rob'uiprazé arĩ ubumroi'wa norĩ hã. Ãne ma tô siwi sadanha: — E asib'apito za'ra wa'wa hã rowahutuzé 'madâ'âzéb da, te te dame hã 're wa'âbâ mono õ di.

Mateu 17:26

Tawamhã Pedru te asa tãma tinha: — Darob zô te te da'ãma 're i'ai'uté za'ra mono norĩ si, te za te te 're wa'âbâ za'ra. Tawamhã Zezusi hã te duré tãma tinha, ãne: — Tane tô. Daro mono bâ danhib'apito nhib'a'uwẽ norĩ, tinhib'apito ma, te te 're iwa'âbâ za'ra mono da hã mare di. (Tane, wa hã Ĩmama nhib'a'uwẽ wa, rowahutuzé 'madâ'âzéb da, te dame 're wa'âbâ mono õ nherẽ, te ãma dame 're upai mono õ di za.)

Marcu 9:38

Tawamhã Zuwã hã te Zezusihi ma siwasu'u, ãne: — Rowahutu'wa, aibâ wa tô 'madâ'â za'ra ni, asisi na wa'uburé ma, te te 're irob'rui mono hã, dama 're wairébé mono da. Tawamhã ma tô dama 're wairébé. Õ hã wasiré 're morĩ õ di. Tahawa, wa tô tiwi sawi za'ra ni, wasiré õ hã 're morĩ õ wa, asisi na wa'uburé ma, te te 're arob'ru tõ mono da.

Marcu 9:41

Tawamhã ma tô duré tãma nharĩ za'ra, ãne: — Ma'ãpé, ĩwapari pese za'ra wa'aba asina. A norĩ wa'wa hã ĩzazei'wa 're aihâimana za'ra wa'aba mono wa, â hã ni'wam norĩ hã te te aima 're sõmri za'ra wa'aba mono wamhã, 'Re ihâimana u'âsi mono, za te te tãma 're i'awa'âbâ mono zé hã tiwi 're simani za'ra mono õ di za. Te za te te sina 're uwaimrami za'ra.

Luca 11:23

Te duré tinha: — Ni'wam norĩ hã ĩwẽ'wa 're nomro mono õ wamhã, ta norĩ hã te ĩzada 're hâimana za'ra. Duré ni'wam norĩ hã te te 're ĩpawaptob za'ra mono õ wamhã, ĩtẽme te 're ida'ubumroi mono na hã ta norĩ hã ĩnhiti dazatõrĩ'wa na te za 're hâimana za'ra.

Luca 16:13

— Dama romhuri'wa hã isib'apito maparane wamhã, aiwa te te tãma 're romhuri wẽ zahuré mono õ di za. Duré sahuré te te 're sawi pese zahuré mono õ di za. Misi te za te te 're sawi pese. Ihâiba amo si te za te te siwi 're wẽ'õ. Duré sahuré te te 're wapari pese zahuré mono õ di za, romhuri'wa hã. Misi te za te te 're wapari pese. Ihâiba amo si te za te te 're 'ruiwapari. Tane, a norĩ wa'wa hã rob'uiprazéb zô si asima 're romhuri za'ra wa'aba mono wamhã, e aiwa asimiromhuri za'ra wa'wa hã za, 'Re ihâimana u'âsi mono ma, romhuri me. Mare di. Aiwab õ di.

1 Corĩtu 12:3

Tane nherẽ, wa ĩsima aiwẽ za'ra wa'wa, aimawi roti hã waihu'u za'ra wa'aba da oto. Ãté ni'wam norĩ hã te za ãne na Zezusi hã te te dama 're wasu'u za'ra: “Zezusihi ma, marĩ iwasétére si tãma 're hâimana mono neza, 'Re ihâimana u'âsi mono nhimirob'manharĩzém na.” Ãne na hã ni'wam norĩ hã 'Re ihâimana u'âsi mono pẽ'ẽzani nhimipawaptobzéb ré, 're inomro mono norĩ hã, te te dama 're wasu'u waihu'u za'ra mono õ di. Mare di. Duré ãté ni'wam norĩ hã te za ãne na te te dama 're wasu'u za'ra, Zezusi hã: “Zezusi hã, taha Wanhib'apito, danhipai u.” Ni'wam norĩ hã 'Re ihâimana u'âsi mono pẽ'ẽzani nhimipawaptobzéb zarinai õ nherẽ, ãne na tô sena te te dama 're wasu'u waihu'u za'ra mono õ di.

Zozué 9:14

Tawamhã aibâ norĩ Izaraéu nhihudu norĩ hã ma tô tisa te te i'wasari hã suru na siwi tẽ'ẽ za'ra. Tane nherẽ, Uburé Danhib'apito wi, rowaihu iwẽ hã te te tiwi waptẽrẽ za'ra õ di.