Luca 9:29 - ꞌRe Ihâimana Uꞌâsi Mono Zadawa Wasuꞌu

²⁹ Zezusi hã Timama ma, mreme ré hã, aimawi oto i'ubu hã. Duré, ma tô ti'uza hâirã. Hâirã uptabi di, i'uza hã. Ma ai'ubuzi.

Luca 9:29 ပူးပေါင်းရင်းမြစ်များ

Mateu 17:2

Tawamhã tame si'ubumroi ré, ma tô Zezusi hã isõ'a za'ra aimawi tihâiba na hã saprĩ. Ma tô ti'uburã pese, bâtâ ro'o ne. Duré i'uza hã hâ zarob'a uptabi di, bâtâ ro te te 're irowa'a pese mono ne.

Marcu 16:12

Taha pari, ma duré Zezusi hã aimawi tihâiba na sihâi'ré, maparane tizazei'wa norĩ ma. Rom na bâdâdi na neb ré, ma tô itẽme tiwisi zahuré.

Luca 3:21

Tawamhã dazazéb 're, zahadu da te sẽrẽ õ ré, te â dawabzuri hã te te dama 're ab'manharĩ, Zuwã hã. Te te dama ab'manharĩ parimhã, Zezusihi ma zama, ma tô oto duré 'manha. Tawamhã Zezusi hã te mre, 'Re ihâimana u'âsi mono ma. Mreme ré, hâiwa ma we si'ridawa, isisi nho'õmoi baba. Tawamhã 'Re ihâimana u'âsi mono pẽ'ẽzani hã ma we itẽme wi, utu'u ne. Hâiwa hawi, te we tãma tinha, ãne: — A hã ĩ'ra. Ĩma asawi uptabi di. Aima ĩto za'ẽtẽ uptabi di.

Luca 5:16

Tane nherẽ, Zezusi hã ma tô dawi 're ne, a'ubuni u, 're mreme mono da hã, Timama ma.

Luca 6:12

Tawamhã ẽtẽ 'rãihâ na ma tô Zezusi hã sai'u, 'Re ihâimana u'âsi mono ma, mreme da. Tawamhã mara bâre te tãma mre.

Luca 9:18

Tawamhã Zezusi hã bâtâ na te nhamra danhiti, mreme da, 'Re ihâimana u'âsi mono ma. Aibâ norĩ hã te i'rata asimro, isiré 're inomro mono norĩ hã. Timama ma, mreme pari, te sadanharĩ za'ra tisiré norĩ hã, ãne: — E niha ma tô dasima ĩwasu'u za'ra ni. E 'wa hã wa hã, wa 're mo.

Luca 9:30

Tawamhã aibâ hã maparane, ma tô itẽme sihâi'ré zahuré, Mozési norĩ hã, Eliasihi me. Ihâiba na hã rowa'a sa'ẽtẽ zahuré di. Ta norĩ hã Zezusihi me, te sima rowasu'u za'ra, 'Re ihâimana u'âsi mono te te tãma ipisutuzéb zarina, za idâ'âzém na Zeruzalẽ ãma.

Zuwã 1:14

'Re ihâimana u'âsi mono mreme hã wa'rata 're sãmra mono da, ma tô sihâiba. Simizawi pese uptabi di. Isimiroti hã wẽ uptabi di. 'Re ihâimana u'âsi mono 'ra wa, õhõ si 're morĩ wẽ uptabi di. Misire i'ra hã. Õhõ si, waihu'u pese uptabi di. Wa norĩ hã wa tô wasiwi waihu'u za'ra ni, 're imorĩ wẽ uptabi na. Iwaihu'u pese na zama, wa tô duré wasiwi waihu'u ni.

Zezusihi zadawa wasuꞌuꞌwa norĩ nhimiromhuri na robꞌuiꞌéré 6:15

Tawamhã zudeu norĩ ma roti'wa norĩ hã, duré aihĩni isi'ubumrozéb ãma ihâimana za'ra norĩ hã te ãma tinhopré, Estewãhã ubu ãma hã. 'Re ihâimana u'âsi mono ma, hâiwa ãma romhuri'wai ubu ne, Estewãhã ubu hã.

Apocalipsi 20:11

Tawamhã wa tô duré 'madâ, danhib'apito simasisizé irã hã, isa'ẽtẽ uptabi hã. Ãma isãmra hã wa tô duré 'madâ. Tawamhã uburé pese hã, ma tô ti'a hã ai'utõ, duré hâiwa zama. Taha wamhã, marĩ õ uptabi di oto. Tahawa, da te 're 'madâ'â zahuré mono õ di oto, ti'a norĩ hã hâiwa me. Tâibâ ma tô ai'utõrĩ pese zahuré.