Luca 7:13 - ꞌRe Ihâimana Uꞌâsi Mono Zadawa Wasuꞌu

¹³ Tawamhã imrotõ te te 'madâ'â wamhã, ma tô ãma tipẽ'ẽzé, Zezusi hã. Tawamhã ma tô tãma tinha, wawa tõ da.

Luca 7:13 ပူးပေါင်းရင်းမြစ်များ

Salmu 103:13

Damama, ti'ra norĩ ãma 're isiwamri pese mono ne, te duré Uburé Danhib'apito te te 're iwazéb za'ra mono norĩ ãma hã sa'ẽtẽ na 're siwamri.

Marcu 8:2

Ãne te tãma siwasu'u za'ra: — Ãhã na ĩ'rata dasi'ubumroi ré, ma tô dasa hã dawi ai'utõ, bâdâ si'ubdatõ da'ãma si'utõrĩ wa. Tahawa, da'ãma ĩpẽ'ẽzé di, wa hã.

Luca 10:1

Taha pari, ma tô Zezusi hã aibâ ahâ na pisutu za'ra, isõwa datẽme 're nomro mono da, 72 na aibâ norĩ hâiba za'ra na. Maparane si, ma tô te te apisutu, 'ri wa'õtõ mono bâ iwana te te datẽme ropéi mono da, za datẽme 're imorĩzé wana, datẽme si'aba'ré da.

Luca 11:1

Tawamhã nimahã bâtâ na, te Zezusi hã nhamra, Timama ma, mreme da. Tãma mreme pari, ma tô misi isiré 're inomro mono norĩ hã 'mai'mahâ, ãne: — Wanhib'apito, ma'ãpé wama waihu'u za'ra na, 'Re ihâimana u'âsi mono ma, 're iwamreme zusi mono zéb da hã, wa te waihu'u za'ra da. Zuwã hã tinhimi'ubumro norĩ ma, te te iwaihu'u ne, te za wama iwaihu'u za'ra, wa te wasiwi waihu'u da.

Luca 11:39

Tawamhã ma tô Wanhib'apito hã tãma tinha, Zezusi hã: — Farizeu norĩ, wa za aima ãma romnhimiré'é za'ra wa'wa, ãne: Hâsizé hã duré pratu hã imana wawip si, da te 're upsõ za'ra mono wamhã, iwa'wamhã wasété di, zahadu upto wa. Tane, a norĩ wa'wa hã 're anomro wẽ wa'aba mono newa, da te 're ai'madâ'â wẽ za'ra wa'aba mono da, te 'Re ihâimana u'âsi mono nhimiroti ipire prã norĩ si 're i'madâ'â pese za'ra wa'aba mo, danho'a. Tane nherẽ, aipẽ'ẽ 'remhã asimirosa'rata wasété na te zahadu iré 're aihâimana u'âsi za'ra wa'aba mo. Danhibrob na si te duré 're ida'ruiwapari za'ra wa'aba mo. Aihâimana nhipese zarina, te duré marĩ na dawi 're asipsaihuri za'ra wa'aba mo.

Luca 12:42

Tahawa, te Wanhib'apito hã asa ãma romnhimiré'é, Zezusi hã ãne: — Dama romhuri'wa i'umnha hã duré isimiroti wẽ hã, e niha 're ihâimana mono zé hã. Ãne hã 're hâimana mono wamhã, te za isib'apito hã nimomo tiwi morĩ õ ré, tãma pisutu, uburé tãma iromhuri'wa norĩ hã isa'u nherẽ, te te sô 'madâ'â za'ra da. Te za duré tãma pisutu, bâtâ pisutuzém na isazéb da hã, te te tãma ãma uwaimrami za'ra da, tãma iromhuri'wa norĩ ma.

Luca 13:15

Tawamhã Wanhib'apito te tãma tinha, ãne: — Oro sabadu na te dapese wa, ĩma nharĩ za, te za powawẽ hã awaru po'repore zama, 're iwasihu za'ra wa'aba mo, âi ba, 're simroi wa'aba mono da, te te 're âhuri mono da. Ãhãta pi'õ hã, Abra'ãhã nhihudu hã. Satanasi hã te te 're pibui mono ré hã, ma tô 18 na ãma tiwahu. Sabadu na nherẽ, wa tô pese, hâzé ãna oto 're hâimana mono da. E niha bâ bété, aima wẽ za'ra wa'aba õ di, sabadu na te ipesezé hã rowẽ na pi'õ hã oto 're imorĩ da hã.

Luca 17:5

Tawamhã isadawa wasu'u'wa norĩ hã ma tô tiwi rowaptẽrẽ za'ra, ãne: — Wanhib'apito, wama 're aza'ẽtẽ u'âsi mono, wa te wasina 're i'ai'umnhasi za'ra mono zé hã.

Luca 17:6

Tahawa, te Zezusi hã asa tãma ãma romnhimiré'é za'ra, ãne: — Mostada nhamare hã surure nherẽ, da te 're wa, oto poto wamhã, wede za'ẽtẽ uptabi di. Tane, a norĩ wa'wa hã asina 're ĩ'umnhasi za'ra wa'aba mono zé hã, surure na nherẽ, aima 're hâimana za'ra wa'aba mono wamhã, te aré figuera wede ma inharĩ za'ra wa'wa, ãne: “Ma'ãpé asi'uihâ na asisa'o'o, â 're, asi'uihâ na asi're da.” Tawamhã te aré asadawa zamarĩ za'ra wa'wa, figuera wede hã.

Luca 18:6

Te duré tãma nharĩ za'ra, Wanhib'apito hã ãne: — Ma'ãpé, ãma rosa'rata za'ra wa'aba, da'ãma rowairébé'wa, te te sina irotizém na hã.

Luca 19:8

Zaqueu hã hâiwi te oto za, Wanhib'apito ma, siwasu'u da. Tawamhã ãne te tãma tinha: — Ãhãta, ĩnhibro hã wa za ãma aipo'o, isibrob'õ norĩ ma, te sõmri mono da. Duré, dawi ĩnhipsaihuri hã wa za, te isimi'uri nhowa're're, dama ãma 'rãnhipa, iwa'rãmi. Rob'uiprazé misi wamhã, wa za maparane si'uiwa na dama ãma 'rãnhipa.

Luca 22:61

Tahawa, ma tô Wanhib'apito hã aipi'ra. Sipi'rai wamhã, te Pedru hã 'madâ'â pese. Te te 'madâ'â wamhã, ma Wanhib'apito mreme na po're puru oto, Pedru hã. Romhâ ré, ma tô tãma waihu'u siro, te te dawi i'udâzém na, Zezusi hã. Ãne ma tô tãma tinha: “Ã bâtâ na si'a hã hârâ õ ré, te za si'ubdatõ dawi ĩ'udâ, ĩzadawa para õ nherẽ.” Ãne ma tô romhâ ré, Pedruhu ma waihu'u siro.

Luca 24:3

Tawamhã sisisi wamhã, te te sãmri za'ra õ di, Wanhib'apito Zezusihi hâiba hã. Robaba di.

Luca 24:34

— Tô sena, ma tô Wanhib'apito hã hâiwa'udu. Simahã ma, ma tô sihâi'ré.

Luca 7:12

Tawamhã 'ri wa'õtõ 'wawi wa'ra u, ma tô rob'uwe za'ra, Zezusi norĩ hã, 'ridawa u. Tawamhã iwab'rere, ma tô dasiwi âri ni, ab're u, imrotõ 'ra idâ hã. Misire aibâ i'ra hã. Da'ahâ na te isiré ai'aba'ré ni, imrotõ siré, ab're u.

Luca 7:14

Tawamhã ma tô oto itẽme wi. Te te âri za'ra ré, ma tinhib'rata na iré upi. Tahawa, ma iré mazahâri za'ra. Tawamhã te oto 'mahâ: — Ai'repudu, wa za aima tinha: Ai'utu.

Luca 8:52

Tame da'ahâ na te ãma ta'ru'ru ni, dapẽ'ẽzé wa. Tahawa, te Zezusi hã dama tinha, ãne: — Ãma ai'ru'ru wa'aba õ di za. Azaruture hã dâ'â õ di. Taré te nhono.

Zuwã 20:13

Tawamhã hâiwa hawi romhuri'wa norĩ hã te Maria Madaréna sadanharĩ zahuré, ãne: — Pi'õ. E marĩ wa, te aiwawa. — Wanhib'apito, da te dasiwi wazere wa, da te dasiwi ihirizé hã te waihu'u õ wa, wa ĩwawa.

Zuwã 20:15

Tawamhã Zezusi te tãma tinha, ãne: — Pi'õ, e marĩ wa, te aiwawa. E 'wa sô, te irob'madâ. Tawamhã Maria te asa tãma tinha, ãne: — A hã wazere wamhã, ma'ãpé ihirizé hã ĩma wasu'u na te waihu'u da, nimomo ihirizéb u sô ĩmorĩ da, apâ te we âri da. Rob'rere wede 'madâ'â'wa newa, te te waihu'u õ di, Zezusi na hã.

Zuwã 4:1

Tawamhã farizeu norĩ ma tô Zezusihi wasu'u hã wapari za'ra. Ãne ma tô dasima wasu'u za'ra ni: “Da'umro na si te oto 're dahâimana za'ra, Zuwã Batistaha nhimiroti 'madâ'â'wa hã. Da'umro na si te oto duré â dawabzuri hã te te dama 're ab'manharĩ. Zezusihi nhimiroti 'madâ'â'wa norĩ si te oto da'ahâ na 're dahâimana za'ra.”

Zuwã 6:23

Tawamhã ni'wam norĩ hã ma tô uba're na datẽme saprĩ za'ra, zara u. Tiberiadi hawi ma tô datẽme saprĩ za'ra, 'ri nho'õmo hawi. Wanhib'apito hã 'Re ihâimana u'âsi mono ãma iwatazéb u, ma tô ãma roptob za'ra, dasa hã da te ihurizéb u.

1 Corĩtu 7:30

Duré asisô 're aiwa'õ za'ra wa'aba mono wamhã, taha na si 're rosa'rata za'ra wa'aba mono õ di za. Duré aima 're irowẽ za'ra wa'aba mono zéb zarina, ato sina 're anomro aba mono wamhã, taha na si 're rosa'rata za'ra wa'aba mono õ di za. Duré marĩ hã asima 're uipra za'ra wa'aba mono wamhã, taha na si 're rosa'rata za'ra wa'aba mono õ di za, asima.

1 Tesalonita 4:13

Wasisãnawã norĩ, ni'wa hã 'Re ihâimana u'âsi mono zazei'õ'wa, dawi dâ'â wamhã, te za isiré norĩ hã ãma 're pẽ'ẽzé pese za'ra, apâ 're idahâiwa'utu za'ra mono zé wasu'u hã te te 're waihu'u za'ra mono õ wa. Tanei õ di za, a norĩ wa'wa hã. Tahawa, wa wasima wẽ za'ra ni, sena na waihu'u za'ra wa'aba da, dadâ'â wasu'u hã.

Hebreu 2:17

Tahawa, tisisãnawã norĩ me, aiwa uptabi a'â 're hâimana mono da, ma tô si'a'uwẽ Zezusi hã, sasedoti 'Re ihâimana u'âsi mono ma, da'ãma romhuri'wa tisiré norĩ nhipai u ipire uptabi ne 're hâimana mono da, tãma umnhasi na te te tãma 're romhuri mono da, da'ãma pẽ'ẽzé uptabi sina. Taha da, ma tô si'a'uwẽ tô, taha zarina dawasédé hã te te oto dama 're apari mono da. Ta hã dasiré si'a'uwẽ õ 'wa'âhã, ãne hã te te aré sina uwaimrami waihu'u õ di, 'Re ihâimana u'âsi mono ma hã.

Hebreu 4:15

Tawamhã tô õ hã sasedoti ipire uptabi na, te te wa'ãma 're iromhuri mono hã, e wahâimana nhib'uware na 're wahâimana za'ra mono nherẽ, wa'ãma 're siwamri mono õ di za bété, ta hã. Te za tô wa'ãma 're siwamri u'âsi. E marĩ wa. Ta hã ma tô Wa'uburé hã te te 're pibu aré, tiwasédé hã te te 'manharĩ da, wawasédé hã wa te 're 'manharĩ za'ra mono da, te te 're iwa'apibui u'âsi mono ne. Tane nherẽ, tiwasédé hã te te 'manharĩ õ uptabi di, Zezusi hã.

Zuize 10:16

Tahawa Izaraéu nhihudu norĩ, tisiré a'uwẽ'õ norĩ te ihâiba'õ norĩ hã ma tô oto siwi sãmra, Uburé Danhib'apito ãma si oto 're wata za'ra mono da. Tahawa ma tô oto duré itõmo na ãma aiwamri pese za'ra, ropire tãma 're ihâimana za'ra mono zém na.