Luca 6:6 - ꞌRe Ihâimana Uꞌâsi Mono Zadawa Wasuꞌu

⁶ Tawamhã sabadu ihâiba amo na, ma tô duré ãzé zudeu norĩ te, rowahutuzéb u, Zezusi hã. Tame te duré aibâ hã dame nhamra, isimire niwĩ isimizu'rã're hã.

Luca 6:6 ပူးပေါင်းရင်းမြစ်များ

Mateu 4:23

Tawamhã daza'rui mono bâ te 're mo Zezusi hã, Galiléa ãma hã. zudeu norĩ te, rowahutuzé mono bâ, ma tô te te dama 're rowahutu. 'Re ihâimana u'âsi mono, da'ãma 're isib'a'uwẽ mono zé wasu'u na te duré te te dama 're rowasu'u, iwasu'uwẽ na. Duré dahâzé da te 're isépata za'ra mono bâ hã ma da'apese. Hâzé u'âsi wa, sib'uware na 're inomro mono norĩ zama ma duré apese, Zezusi hã.

Luca 13:10

Tawamhã romhuri zahârizém na ma tô dama rowasu'u Zezusi hã, zudeu norĩ te, rowahutuzéb ãma.

Luca 14:3

Tahawa, ma tô Zezusi hã rowahutu'wa norĩ hã azadanha, farizeu norĩ me, ãne: — E romhuri zahârizém na, wa za wa te 're dapese za'ra, sabadu na hã. E ma tô wawi sawi, 'Re ihâimana u'âsi mono hã, sabadu na, wa te 're dapese tõ za'ra mono da. E niha isimiroti na rob'ui'éré hã.

Luca 4:16

Tawamhã Nazaré u te mo Zezusi hã, tiprédubzéb u. Sabadu sidâpâsi dame 're zasi mono wa, ma duré dame ãzé, zudeu norĩ te, rowahutuzéb u, romhuri zahârizém na hã. Tawamhã rowahutuzéb ãma sãmra wamhã, ma wahudu. Hâiwi te za, 'Re ihâimana u'âsi mono mreme ui'éré hã te te dama sõré da.

Luca 4:31

Tawamhã Cafanau na 'ri nho'õmo nhisi u, te mo Zezusi hã. Galiléa ãma, Cafanau hã te 're hâimana. Tame sabadu na te dama rowahutu, zudeu norĩ te, rowahutuzéb ãma.

Luca 6:1

Tawamhã sabadu na, Zezusi norĩ hã ma tô ro'rahâri za'ra, amnho wa'wai baba, zudeu norĩ te, romhuri zahârizém na. Tawamhã amnho trigu hã ma tô te te sima 'rãnhinarĩ, tinhib'rata na te te sima tomhâiwazu za'ra da, te te huri mono da, isiré 're inomro mono norĩ hã.

Luca 6:5

Te duré tãma nharĩ za'ra, ãne: — Wa hã 'Re ihâimana u'âsi mono te te ĩpisudu, dasiré ĩpoto da, ti'ai ãma. Tahawa, dama ĩpire di, sabadu na roti hã te dama 're i'apisutu mono zéb da hã.

Zuwã 9:16

Tawamhã ni'wam norĩ si, te Zezusihi ma nharĩ za'ra, farizeu norĩ hã: — Õ hã sabadu na te te pese nherẽ, te te 'madâ'â pese õ di, romhuri zahârizém na roti hã. 'Re ihâimana u'âsi mono hã we te te satõrĩ õ di. We te te satõrĩ 'wa'âhã, te aré te te 're 'madâ'â pese, isimiroti hã. Tawamhã ihâiba amo norĩ hã te rowasu'u za'ra duré: — 'Re morĩ wasété 'wa'âhã, aré waihu'u pese õ di, marĩ dama i'manharĩ waihu'u'õ hã te te dama 'manharĩ da hã. — Ãne Zezusihi ãma ma tô tasisada 'rãmi za'ra ni.