Luca 6:49 - ꞌRe Ihâimana Uꞌâsi Mono Zadawa Wasuꞌu

⁴⁹ Ãté ni'wam norĩ hã te za ĩnhimiroti hã tipo're na te te 're wapari za'ra. Tane nherẽ, te te 're 'madâ'â za'ra mono õ di za, ĩnhimiroti hã. Tahawa, wa za ĩnhimiroti 'madâ'â'õ'wai ãma simiré'é, 'ri'wa ihâiba amo na. Aibâ hã 'ri na'rata da, te te ab're õ di. Ti'a nhisiwip si, ma tô sima 'ri. Tawamhã 'ri u, â 're praba mono wamhã, â, ma tô 'marõwĩ, 'ri hã. Tâibâ oto. Tahawa, ma tô aipru pese, 'ri hã.

Luca 6:49 ပူးပေါင်းရင်းမြစ်များ

Provébiu 28:18

Ni'wa sena na 're ihâimana mono hã te za sima iwẽ na 'madâ'â ré na 're hâimana. Tane nherẽ, ni'wa senai õ na 're ihâimana mono hã te za waptu na waptãrã.

Mateu 23:3

Tahawa, farizeu norĩ nhimiroti hã te za 're iwapari pese za'ra wa'aba mo, ãma 're anomro aba mono da. Tane nherẽ, 're ihâimana za'ra mono zéb zarina, isine 're aihâimana za'ra wa'aba mono õ di za. E marĩ wa. Te te dama 're iroti za'ra mono zém na si 're sõpré mono õ wa, ta norĩ hã.

Mateu 24:10

Ãne na daré 're romhâimana mono ré, te za ĩzazei'wa norĩ hã te te 're ĩzazei utõrĩ za'ra, ahâ na. 'Râwim nherẽ, te za duré dama 're sihâiba nhomri za'ra, da te 're i'ruiwapari za'ra mono zéb zarina, da te 're waibui mono da. Ĩzazei'wai wa, tisisãnawã na sima 're hâimana za'ra mono nherẽ, te za oto duré 're si'ruiwapari za'ra, 'râwim nherẽ.

Marcu 4:17

Tane nherẽ, te za te te 're sazei hutu za'ra. Tawamhã ãté robzépada hã duré rowasédé hã te za isazei'õ'wa norĩ hã te te tãma 're 'manharĩ za'ra. Tawamhã 'Re ihâimana u'âsi mono zadawa wasu'u hã aré te te 're isaze za'ra mono zé hã, te za te te 're sazei utõrĩ za'ra za.

Luca 12:47

— Ãté, ni'wa hã te za waihu'u pese, tinhib'apito nhimiroti hã, tãma iromhuri'wa hã. Tane nherẽ, wa'a te, isimiroti hã te te 're uwaimrami mono õ di za. Tahawa, te za sa'ẽtẽ azâri ni, powawẽ hâiwaré na, apito zadawa para.

Luca 19:14

— Dama si'apito da nherẽ, irob 're, 're idahâimana za'ra mono hã te siwi 'ruiwapa, dama si'apito tõ da. Tahawa, te isarina siwi da'mazatõ, isib'apito ma, te te ãma dazadawa wasu'u za'ra da.

Luca 19:27

Oto ĩ'rui'wa norĩ hã we ĩtẽme ãwisi za'ra wa'aba. Ma tô siwi ĩwẽ'õ za'ra, tãma ĩsi'apito za'ra tõ da. Tahawa, te za ĩnho'a asiwi isimroi wa'wa.”

Luca 6:46

— E marĩ da, ma tô Asib'apito na asiwi 're ĩnhisi za'ra wa'aba mo, ĩnhimiroti hã 're 'madâ'â pese za'ra wa'aba mono õ nherẽ.

Luca 6:48

Tahawa, wa za ĩnhimiroti 'madâ'â'wai ãma simiré'é, 'ri'wa na. Aibâ hã ma tô ab're, 'ri da, ti'ai 'rowi ẽne hã inomro u. Tawamhã ma tô ãma tipahâ, ab're na. Ab're 'rehâ di oto. Tawamhã ẽtẽ nhisiwi ma tô 'ri, aibâ hã. Tawamhã âpré wamhã, â hã ma tô 're praba, 'ri u. Tete na ma tô 'ri hã 'manha, aibâ hã. Tahawa, rési ãna te 're sa, 'ri hã.

Luca 7:1

Tawamhã te te dama roti parimhã, te oto mo Zezusi hã, Cafanau u. Tawamhã ma tô wi.

Zuwã 15:2

Uwa 'ru panhipti sisa'ridi hã wẽ õ di, 're i'rã za'ra mono õ hã. Tahawa, uwa 'ru 'madâ'â'wa hã te za ipanhipti hã te te 're anhihâri i'rãi'õ hã, te te 're anhamra mono da. Tane te za Ĩmama hã ĩzazei'õ'wa norĩ hã te te 're azatõrĩ, ĩnhiti 're hâimana za'ra mono da. Uwa 'ru panhipti sisa'riti amo hã wẽ di, 're 'rã za'ra mono wa, ta norĩ hã. Tahawa, wa za 're i'rã za'ra mono na simiré'é, ĩzazei'wa norĩ ãma 're nomro wẽ mono wa. I'wanhipré te te 're i'anhihâri mono hã, wa za ãma simiré'é, ĩzazei'wa norĩ te te 're i'manharĩ wasété za'ra mono zém na. 'Re i'rã za'ra mono hã ipanhipti wãi wa, i'wanhipré ahâ wamhã, te za misi si te te 're anhihâri i'madâ'â'wa hã, 're 'rãi pese za'ra mono da. Tane te za Ĩmama hã ĩzazei'wa norĩ wi iwasédé hã te te 're anhihâri, 're nomro wẽ uptabi mono da oto.

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:29

Aihawi ĩmorĩ za'ra wa'aba wamhã, ni'wam norĩ hã te za we asô ai'aba'réi wa'wa. Abaze zahi, pone'ẽrebâ da, 're isahi za'ra mono ne, te za asada tizahi za'ra wa'wa. Tinhimirowahutu wasété na te za asada tihâimana za'ra wa'wa. Ai'ãma pẽ'ẽzé za'ra wa'aba õ di za. Ãne wa tô ai'ãma waihu'u siromo za'ra wa'wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 26:11

Tahawa, wa tô te ãma 're arowasété, rowahutuzé mono bâ, Zezusi hã te te siwi 're wẽ'õ za'ra mono da, isazei'wa norĩ hã. Ta norĩ zada ĩzahi uptabi wa, wa tô 'ri nho'õmo mono bâ te ãma 're rowasété za'ra, duré darob amoi ãma zama.

1 Tesalonita 3:5

Tahawa, asada 're dazahi za'ra wa'aba mono wa, apâ ãma atẽme ĩmorĩ aba neza, 're isazei'õ utõrĩ za'ra wa'aba mono zé hã te aiwi waihu'u za'ra wa'aba da. Tahawa, Timotiu hã wa tô ãma atẽme satõrĩ za'ra wa'wa, apâ te te we wama aiwasu'u za'ra wa'aba 'wa da hã. Wa'uburé hã dawasété da, dawada'uri'wa hã te te aipibu za'ra wa'aba wa, 're saze zahâri za'ra wa'aba mono õ'umnhasite, wa tô ai'ãma 're ĩhâtâ'â za'ra wa'wa. Aima wanhimiromhuri za'ra wa'wa hã taré 're hâimana mono õ'umnhasite, wa tô ãma atẽme satõrĩ za'ra wa'wa Timotiu hã, te te aiwaihu'u za'ra wa'aba da.

2 Pedru 2:20

Ãté ta norĩ hã Danho'reptui'wa na ma tô Wanhib'apito Zezu Cristu hã te te 're waihu'u za'ra. Taha zarina ma tô isazei'õ'wa hâimana wasétézém hawi 're sipizari za'ra. Tane nherẽ, apâ dasiré 're hâimana wasété za'ra mono wamhã, e niha za tawamhã, 're ihâimana za'ra mono zé hã. Wanhib'apito hã te te 're saze za'ra mono õ ré, rowẽ'õ na 're ihâimana za'ra mono zém nhipai u hã, tãma 're rowẽ õ uptabi za'ra mono di za oto.

1 Zuwã 2:19

Ta norĩ hã ma tô aré wasiré 're si'rã'õtõ u'âsi, iwasu'uwẽ u. Wasiré uptabi 're hâimana za'ra mono õ nherẽ, ma tô aré wasiré 're hâimana za'ra. Wasiré uptabi, 're hâimana za'ra mono 'wa'âhã, te aré wasiré 're hâimana u'âsi za'ra, 'râwi. Tane nherẽ, ma tô wahawi 're wairébé. Tahawa, wa tô wasina waihu'u za'ra ni oto, wasiré uptabi 're ihâimana za'ra mono õ na hã.