Luca 6:47 - ꞌRe Ihâimana Uꞌâsi Mono Zadawa Wasuꞌu

⁴⁷ Ãté ni'wam norĩ hã te za we ĩtẽme aihutu, ĩnhimiroti hã te te wapari za'ra da. Tawamhã te te wapari za'ra wamhã, te za oto ĩnhimiroti hã te te 're 'madâ'â pese za'ra.

Luca 6:47 ပူးပေါင်းရင်းမြစ်များ

Mateu 12:50

Ni'wam norĩ hã Ĩmama, hâiwa ãma 're isãmra mono te te sima 're iwẽ za'ra mono zéb zarina, te te tãma ãma 're i'uwaimrami za'ra mono norĩ si, te za ĩsisãnawã na hã, duré ĩna na hã 're hâimana za'ra.

Mateu 17:5

Tawamhã ãne Pedru te te tãma nharĩ ré, ma tô hâiwa nhirõno hã we hâiba zuwa za'ra, Zezusi norĩ hã. Tawamhã hâiwa nhirõtõ zarob'a hawi, ma tô 'Re ihâimana u'âsi mono hã mre, ãne: — Ã hã ĩ'ra, te 're isawi pese mono. Tãma 're ĩto za'ẽtẽ mono di. Ma'ãpé isimiroti hã 're wapari pese za'ra wa'aba mono za.

Luca 11:28

Tahawa, te Zezusi hã asa tãma tinha, ãne: — Tane tô. Tãma 're rowẽ mono nherẽ, isipai u ni'wam norĩ ma, 're rowẽ uptabi za'ra mono di za. Ni'wam norĩ hã, 'Re ihâimana u'âsi mono zadawa wasu'u hã tipo're na te te 're wapari za'ra mono wamhã, duré te te 're 'madâ'â pese za'ra mono wamhã, tãma 're rowẽ uptabi za'ra mono di za.

Luca 14:26

— Ãté, ni'wam norĩ hã te za we ĩtẽme ai'aba'ré, ĩzazei'wa, 're nomro mono da. Tawamhã te za te te 're ĩzawi pese za'ra, timama zawi nhipai u, duré tina zawi nhipai u, duré timro zawi nhipai u, duré ti'ra norĩ zawi nhipai u, duré tisisãnawã norĩ zawi nhipai u, duré tihâimanazém nhipai u.

Luca 6:48

Tahawa, wa za ĩnhimiroti 'madâ'â'wai ãma simiré'é, 'ri'wa na. Aibâ hã ma tô ab're, 'ri da, ti'ai 'rowi ẽne hã inomro u. Tawamhã ma tô ãma tipahâ, ab're na. Ab're 'rehâ di oto. Tawamhã ẽtẽ nhisiwi ma tô 'ri, aibâ hã. Tawamhã âpré wamhã, â hã ma tô 're praba, 'ri u. Tete na ma tô 'ri hã 'manha, aibâ hã. Tahawa, rési ãna te 're sa, 'ri hã.

Luca 8:13

Duré amnho hã ẽtẽ nhisiwi irere'e mono hã, aimawi a'uwẽ, te wasu'u. Ta norĩ hã ãté te za 'Re ihâimana u'âsi mono zadawa wasu'u hã te te 're wapari za'ra, tipo're na. Tawamhã te za iwasu'u ma 're to za'ra. Tazahã, õne haré te te 're saze za'ra mono õ di za. Ãté, te za te te 're saze hutu za'ra. Ãté rowasédé hã da te tãma 're 'manharĩ za'ra mono õ'umnhasite, te za apâ 're sipizari za'ra.

Luca 8:8

Ti'ai wẽ wa, ma duré nima norĩ hã rere'e. Ta hã ma tô duré oto 'rã. 'Rãi mono wamhã, 'rãi pese uptabi di, rob're hã. Te duré dama tinha: — Asimipari pese za'ra wa'aba wamhã, ma'ãpé ĩwapari pese za'ra wa'aba ĩnhimirowasu'u na hã, waihu'u za'ra wa'aba da.

Zuwã 10:27

Ĩnhib'a'uwẽ si te za ĩmreme hã te te 're wapari pese za'ra. Duré pone'ẽrebâ tede'wa, tinhimizama te te 're i'awaihu'u mono ne, wa tô ĩnhib'a'uwẽ norĩ hã waihu'u za'ra. Ta norĩ si te za ĩnhimiroti hã te te 're 'madâ'â pese za'ra.

Zuwã 13:17

— Ãne wa tô aima rowasu'u za'ra wa'wa, waihu'u za'ra wa'aba da. Ĩnhimiroti hã 're 'madâ'â pese za'ra wa'aba mono wamhã, aima 're rowẽ za'ra wa'aba mono di za, uburé aima 're rowẽ za'ra wa'aba mono õ nherẽ. Asimirosa'rata na, wa tô aiwaihu'u za'ra wa'wa. Ĩsiré 're anomro aba mono da, te aipisutu za'ra wa'wa hã, misire ma tô ĩ'maiwẽ'õ wa'wa. Ta hã wa tô pisutu, ĩsiré 're morĩ da, 'Re ihâimana u'âsi mono mreme ui'éré te te sina uwaimrami da. Ãne ma tô wahi'rada hã tinha, aré: “Wasiré 're iwasai mono, ma tô ĩwẽ'õ.” Ãne ma tô duré ĩwẽ'õ'wa na rob'ui'éré siro, poto õ ré, wahi'rada hã. Tahawa, te za oto sina uwaimrami su'u, ĩwẽ'õ'wa hã.

Zuwã 14:15

Tawamhã Zezusi te duré tãma rowasu'u za'ra, ãne: — 'Re ĩzawi pese za'ra wa'aba mono wamhã, ĩnhimiroti si te za 're i'madâ'â pese za'ra wa'aba mo.

Zuwã 6:35

Tawamhã te Zezusi hã oto tãma siwasu'u za'ra, ãne: — Wa hã dasai uptabi, 're idahâimana u'âsi za'ra mono zém nhomri'wa. Ni'wam norĩ hã we ĩtẽme 're nomro mono wamhã, mrab ãna te za oto 're nomro. Duré te te sina 're ĩzaze za'ra mono wamhã, 'rubu ãna te za oto 're nomro.

Zuwã 6:37

Ĩmama ma tô da'apisutu, ĩnhib'a'uwẽ si 're danomro mono da. Ta norĩ si te za te te 're ĩzaze za'ra, te te ipisutu za'ra norĩ hã. Te te 're ĩzaze za'ra mono nherẽ, e wa za ĩsiwi te 're awẽ'õ. Mare di. Te ĩsiwi 're awẽ'õ mono õ di za.

Zuwã 8:52

Sõ'awi te te tãma rowasu'u za'ra õ wa, imreme hã tãma pibu prã za'ra di. Tahawa, asa te duré Zezusihi ma nharĩ za'ra, ãne: — Wa'uburé ré, 're aimorĩ na, wama aiwaihu'u pese za'ra di oto. Wahi'rada Abra'ã hã ma tô dârâ. Uburé 'Re ihâimana u'âsi mono zadawa 'mahârâ'wa norĩ zama ma tô duré tidâ'â za'ra. Tane nherẽ, ma tô inha, da te 're asaze za'ra mono wamhã, 're dadâ'â za'ra mono ãna, za 're idahâimana u'âsi za'ra mono na hã.

Hebreu 5:9

Tawamhã Zezusi hã ti'ab ré, te te 're robzépata mono nherẽ, Imama te te tãma iwẽzéb zarina si te te 're ab'manharĩ mono wa, ma tô sina uwaimra, uburé isimiroti te te 're i'madâ'â pese za'ra mono norĩ hã te te 're sõ'reptu za'ra mono da, hâiwa ãma dâ'â ãna 're hâimana u'âsi za'ra mono da.

Tiagu 4:17

Tahawa, wa za ãne aima waihu'u za'ra wa'wa. Marĩ iwẽ na da te dama ãma 're i'uwaimrami za'ra mono da hã, wẽ di. Tane nherẽ, taha wasu'u hã dama waihu'u pese za'ra nherẽ, marĩ iwẽ na da te dama ãma 're uwaimrami za'ra mono õ wamhã, ta hã duré dawasédé.

1 Pedru 2:4

Ma'ãpé, Wanhib'apito u asimirosa'rata na si nherẽ, 're aihutu aba mono. Ta hã wẽ nherẽ, ma tô dasiwi wẽ'õ ni, ẽne hã 'ri'wa norĩ te te siwi iwẽ'õ ne. Tane nherẽ, da te dasiwi wẽ'õ nherẽ, 'Re ihâimana u'âsi mono ma, wẽ uptabi di, Wanhib'apito hã. Tãma sawi uptabi di duré.

2 Pedru 1:10

Ĩsisãnawã norĩ, tô sena ma tô 'Re ihâimana u'âsi mono hã aipisutu za'ra wa'wa, isib'a'uwẽ 're anomro aba mono da. Ãne wa, te za sada 're asiptete za'ra wa'aba mo, ãma 're aihâimana wẽ za'ra wa'aba mono da, 'râwi isib'a'uwẽ na asina 're waihu'u za'ra wa'aba mono da. Ãne wamhã, Wanhib'apito hã 're rẽme za'ra wa'aba mono õ di za. Duré aiwasété u 're aipizari za'ra wa'aba mono õ di za oto.

1 Zuwã 2:29

Cristu hã 're imorĩ wẽ uptabi na hã aima waihu'u pese za'ra wa'aba di oto, marĩ na 're isiwasété mono õ na hã. Tahawa, ni'wam norĩ hã 'Re ihâimana u'âsi mono te te dama 're i'apisutu mono zéb zarina si 're nomro wẽ mono wamhã, tawapsi te za oto iwaihu'u za'ra wa'wa, ta norĩ hã 'Re ihâimana u'âsi mono nhib'a'uwẽ, sena na 're inomro mono na hã.

1 Zuwã 3:7

Ĩ'ra norĩ, dahâimana wasété na 're idanomro mono na, da'ãma 're sasõmri za'ra wa'aba mono õ di za, danhimiroti senai'õ na dama 're ihâimana za'ra mono na zama. Ma'ãpé 'râwi asina 're asõpré pese aba mono. Ni'wam norĩ hã 're nomro wẽ mono wamhã, 'Re ihâimana u'âsi mono nhimiroti na sima ãma 're sipa za'ra mono õ wamhã, ta norĩ si hã 're hâimana wẽ za'ra mono di, Cristu hã 're imorĩ ne.

Apocalipsi 22:14

Duré, ni'wam norĩ hã ti'uzazé hâirã da, te te 're i'upsõi pese za'ra mono norĩ ma si hã tãma 're rowẽ uptabi za'ra mono di za. Tane tiwasété wi, 're isipizari za'ra mono hã, 'Re ihâimana u'âsi mono, iwasédé te te tãma 're i'a'upsõi mono zé, te wasu'u, i'uza hâirã hã. Ta norĩ si te za rob'rãi u'â hã te te 're huri, da te 're huri mono wa, 'Re ihâimana u'âsi mono 'rata ãma 're idanomro u'âsi mono zé hã. Ta norĩ si te za duré õne haré 'ri nho'õmo u 're sisisi, 'ridawa za'ẽtẽ na, ni'wa te te tiwi sitob za'ra ãna.