Luca 6:30 - ꞌRe Ihâimana Uꞌâsi Mono Zadawa Wasuꞌu

³⁰ Marĩ hã da te aiwi 're waptẽrẽ za'ra wa'aba mono wamhã, te za dama 're isõmri za'ra wa'aba mo. Ãté ni'wa hã te za asibro hã aiwi âri 'wa. Tawamhã sô aihârâ õ di za, apâ te te aima sõmri da.

Luca 6:30 ပူးပေါင်းရင်းမြစ်များ

Salmu 112:9

Isimarĩ'õ norĩ ma, te za duré sõprum na tinhimarĩ hã te te 're anhomri. Õne u'â te za duré isimizawizé hã da'ãma 're hâimana. Ta hã dama pire di, duré dama iwazéb za'ẽne.

Salmu 41:1

Tãma 're rowẽ uptabi za'ra mono di, isimarĩ'õ te te 're ipawaptob za'ra mono norĩ ma hã. E marĩ wa. Ta norĩ hã ropire sô 're wairébé mono wamhã, Uburé Danhib'apito te te 're apawapto mono wa!

Provébiu 19:17

Ni'wa isimarĩ'õ ma, te te 're rob'manharĩ wẽ mono wamhã, Uburé Danhib'apito ma, marĩ te te a'â taré tãma isõmri ne hã. Tahawa te za isimi'manharĩ wẽ zé wa'rãmi iwẽ hã tãma tisõ.

Provébiu 21:26

Bâtâ wahuré na te ta hã marĩ zô si te te sima 're rob'ruiwapari. Tane nherẽ, iwẽ norĩ, te marĩ hã sawi ãna te te dama 're sõmri za'ra, sõprum na hã.

Provébiu 22:9

Ni'wa sõprum na 're hâimana mono wamhã, te za iwẽ si tãma ipisudu hã 're hâimana. E marĩ wa. Tisa hã isimarĩ'õ norĩ ma, te te 're a'a mono wa.

Mateu 18:35

Tawamhã ãne ma tô timreme hã tãma 'rãsutu za'ra, Zezusi hã: — Ãne hã asiré isazei'wa hã asada 're iwasété za'ra wa'aba mono zém na sena na asina 're 'madâ'â zahâri za'ra wa'aba mono õ wamhã, te za Ĩmama hã te te aima 're rob'manharĩ wasété za'ra wa'wa aihâiba mono bâ wa'aba, hâiwa ãma 're isãmra mono hã.

Mateu 5:39

Tane nherẽ, wa za duré wa hã aimawi aima waihu'u za'ra wa'wa, tô õhõ na rotizém na hã. Da te aima 're rob'manharĩ wasété za'ra wa'aba mono nherẽ, asa dama ãma 're wa'rãmi za'ra wa'aba mono õ di za. Atob'rata nhimire niwĩ da te 're aihâ za'ra wa'aba mono wamhã, dama ãma 're wa'rãmi za'ra wa'aba mono õ di za. Taré te za 're aipizari za'ra wa'aba mo, atob'rata amo niwĩ, da te duré 're aihâ za'ra wa'aba mono da.

Mateu 6:12

Dawasédé hã da te wa'ãma 're 'manharĩ za'ra mono wa, wa te wasina 're i'madâ'â za'ra mono õ ne, a hã duré wa'ãma 're ab'madâ'â mono õ di za, wawasédé hã.

Luca 11:41

Tahawa, ma'ãpé isibrob'õ norĩ ma, 're asõprub za'ra wa'aba mono. Ãne dama 're 'manharĩ za'ra wa'aba mono wamhã, asimirosa'rata wẽ na, te za te te 're ai'awaihu'u 'wa, 'Re ihâimana u'âsi mono hã.

Luca 12:33

Tahawa, te za uburé asimarĩ hã dama iwede za'ra wa'wa, iwa'âbâ zô, isimarĩ'õ norĩ ma, sõmri aba mono da. Tawamhã asimarĩ hã isi'utõrĩ'õ hã te za hâiwa ãma asô 're hâimana u'âsi za'ra wa'wa, wẽ u'âsi na. Tame, isipsaihuri norĩ hã sô 're sisisi waihu'u mono õ di za. Tame duré, da'uza hâzapu'u'wa hã 're hâimana za'ra mono õ di. Ti'ai ãma asimarĩ ahâ zô si 're rob'ruiwapari za'ra wa'aba mono wamhã, taha na si te za aipẽ'ẽ 're, asima 're irosa'rata u'âsi za'ra wa'aba mo, hâiwa ãma iwẽ hã isi'utõrĩ'õ upana. Duré hâiwa ãma iwẽ uptabi zô si, asima 're rob'ruiwapari za'ra wa'aba mono wamhã, taha na si te za asima 're irosa'rata u'âsi za'ra wa'aba mo, 'Re ihâimana u'âsi mono hã iwẽ hã te te asô 're i'apisutu aba mono zô si.

Luca 18:22

Isihâimanazéb 'rãzarõno hã te te wapari wamhã, te asa tãma tinha, ãne Zezusi hã: — Tane nherẽ, misi te zahadu aihâimanazéb zô aiwi rowaptâ. Ma'ãpé, uburé asibro hã dama wede mono, iwa'âbâ zô, isibrob'õ norĩ ma, sõmri mono da. Tawapsi, asibro pese di za, hâiwa ãma hã. Asibro hã dama wede mono parip si, te za apâ we ĩtẽme aimo, ĩsiré 're aimorĩ da oto.

Luca 6:29

Ai'u'rata wi, da te 're aihâ za'ra wa'aba mono wamhã, dama ãma 're wa'rãmi za'ra wa'aba mono õ di za. Taré te za 're aipizari za'ra wa'aba mo, ai'u'rata amo niwĩ, da te 're aihâ za'ra wa'aba mono da. Duré asi'ubuzé hã da te aiwi 're waibui wa'aba mono wamhã, dawi 're sawi za'ra wa'aba mono õ di za, asõ'utu'u zama, da te aiwi 're waibui wa'aba mono da.

Luca 6:31

Marĩ iwẽ si, da te aima 're 'manharĩ za'ra wa'aba mono da, asima 're idawẽ za'ra wa'aba mono ne, te za marĩ iwẽ si dama 're i'manharĩ u'âsi za'ra wa'aba mo, iwa'rãmi.

Luca 6:38

Asibrom na te za dama 're asõprub za'ra wa'aba mo, isimarĩ'õ norĩ ma. Tawamhã 'Re ihâimana u'âsi mono hã te za marĩ hã iwa'rãmi sa'ẽtẽ na te te aima 're sõmri za'ra wa'wa. Marĩ na asima 're asõprub za'ẽtẽ za'ra wa'aba mono ne, te za aima 're sõprub za'ẽtẽ za'ra wa'wa. Sa'ẽtẽ na dama 're sõmri za'ra wa'aba mono wamhã, te za sa'ẽtẽ na te te aima 're sõmri za'ra wa'wa, iwa'rãmi, 'Re ihâimana u'âsi mono hã. Suru na dama 're sõmri za'ra wa'aba mono wamhã, te za suru na te te aima 're sõmri za'ra wa'wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:35

Ĩnhimiromhuri pese na wa tô aima ãma asanho za'ra wa'wa, sib'uware na 're ihâimana za'ra mono norĩ hã wanhimiromhuri na wa te ãma 're pawaptob za'ra mono da. Wanhib'apito Zezusihi mreme na te za 're aipo're pu'u u'âsi za'ra wa'aba mo. Ãne ma tô wama waihu'u za'ra: “Dama marĩ nhomri'wai ma, rowẽ uptabi di, dawi marĩ âri'wai ma, irowẽ nhipai u.”

2 Corĩtu 8:9

Wanhib'apito Zezu Cristuhu nhimizawi pese zé hã aima waihu'u pese za'ra wa'aba di oto. Ta hã Timama siré robze na 're hâimana u'âsi mono nherẽ, ma tô hâiwa ãma tihâimanazé hã we tirẽ a'â, ti'ai ãma si'a'uwẽ da, te te a'â dame 're robzépata mono da. Asada za'ra wa'aba, ma tô dawazari si'a'uwẽ, taha zarina, a norĩ wa'aba zama 'Re ihâimana u'âsi mono 'rata 're asimroi u'âsi aba mono da, hâiwa ãma hã. Tahawa, Wanhib'apito hã sisawi ãna 're ihâimana mono ne, te za asisawi ãna dama asõprub za'ra wa'wa, ate rob'uiprazé wa'aba na hã.

Éfézu 4:28

Danhibrom na dawi 're i'asimisaihuri za'ra wa'aba mono zém na hã, duré oto 're asimisaihuri za'ra wa'aba mono na hã ãma 're sahu za'ra wa'aba mono õ di za. Te za oto asib'rata na 're iromhuri za'ra wa'aba mo, aihâimana wẽ na oto 're aihâimana za'ra wa'aba mono da, duré asimiromhuri na isibrob'õ norĩ hã 're pawaptob za'ra wa'aba mono da, ãne na si hã wẽ wa.