Luca 5:27 - ꞌRe Ihâimana Uꞌâsi Mono Zadawa Wasuꞌu

²⁷ Tawamhã rob u, ma tô watobro, Zezusi hã. Watobro wamhã, ma aibâ hã 'madâ, danhib'apito ma, dawi rob'uiprazé arĩ ubumroi'wa hã, Levi na isisi hã. Isimiromhurizéb ãma sãmra ré, ma tô 'madâ. Tame te da te tãma 're sõmri za'ra rob'uiprazé hã, i'ubumrozéb ãma, danhib'apito nhimiwada'uri zarina. Tawamhã Zezusi hã ma tô ãne 'mahâ: — We aimorĩ, ĩsiré 're aimorĩ da oto.

Luca 5:27 ပူးပေါင်းရင်းမြစ်များ

Mateu 10:3

Duré Filipi, duré Batolomeu, duré Tome, duré Mateu. Ta hã rob'uiprazé arĩ ubumroi'wa aré. Duré Tiagu, Afeuhu 'ra. Duré Tadeu, duré Sima ihâiba amo. Ta hã ma tô aré dame 're hâimana, romanu norĩ zada, tirom hawi apâ te te 're satõrĩ za'ra mono da. Duré Zuda Icarioti, Zezusi te te dama ihâiba nhomri'wa da hã.

Mateu 16:24

Tawamhã Zezusi te duré tãma nharĩ za'ra, tisiré 're inomro mono norĩ ma, ãne: — Ni'wam norĩ hã ĩsiré 're nomro u'âsi mono da, te te sima 're ĩwẽ za'ra mono wamhã, tihâimanazém na hã te te 're rosa'rata za'ra mono õ di za. Tiza'ozéb ré, ĩzarina 're inomro mono ne, te za ĩsiré 're nomro, da te 're simroi mono da nherẽ hã.

Mateu 8:22

Tane nherẽ, te Zezusi asa hã tãma tinha, ãne: — Õne haré te za ĩsiré 're aimo oto. Idâ'â norĩ hã te za tisiré idâ'â norĩ ãma hã te te 're ti'a za'ra.

Marcu 3:18

Duré isiré norĩ hã ãne isisi za'ra hã: Ãdré, duré Filipi, duré Batolomeu, duré Mateu, duré Tome, duré Tiagu, Afeuhu 'ra hã, duré Tadeu, duré Sima, Zeroti norĩ niwĩ aré 're ihâimana mono hã, duré Zuda Icarioti, si'uihâ na Zezusihi hâiba nhomri'wa da hã dama. Ãne isisi za'ra hã.

Luca 18:22

Isihâimanazéb 'rãzarõno hã te te wapari wamhã, te asa tãma tinha, ãne Zezusi hã: — Tane nherẽ, misi te zahadu aihâimanazéb zô aiwi rowaptâ. Ma'ãpé, uburé asibro hã dama wede mono, iwa'âbâ zô, isibrob'õ norĩ ma, sõmri mono da. Tawapsi, asibro pese di za, hâiwa ãma hã. Asibro hã dama wede mono parip si, te za apâ we ĩtẽme aimo, ĩsiré 're aimorĩ da oto.

Zuwã 1:43

Tawamhã awẽm na Galiléa na danhipti'a nho'õmo nhisi u morĩ da, te Zezusi hã sina ropisutu. Ãhã wamhã, wa isiré hã ai'aba'ré ni. Wasi'aba'réi ré, wa tô aibâ hã sõpẽtẽ za'ra ni, Filipi na isisi hã. Tawamhã Zezusi te tãma tinha, ãne: — We aimorĩ, ĩsiré 're aimorĩ da oto. Tahawa, te oto isiré mo.

Zuwã 12:26

Duré ni'wam norĩ hã te te ĩma 're romhuri za'ra mono da, te te sima 're ĩwẽ za'ra mono wamhã, 're ĩmorĩzém na si te za 're nomro, ĩnhirã zarina si. Tawamhã ĩ'rata te za 're hâimana u'âsi za'ra, hâiwa ãma. Te te ĩma 're romhuri pese za'ra mono wa, te za Ĩmama hã ãma 're wata za'ra. Te za duré te te tãma 're wa'âbâ za'ra, isimiromhuri hã.