Luca 4:43 - ꞌRe Ihâimana Uꞌâsi Mono Zadawa Wasuꞌu

⁴³ Tahawa, te Zezusi hã asa tãma nharĩ za'ra, ãne: — 'Re ihâimana u'âsi mono hã danhib'apito uptabi hã, te te dapawapto waihu'u pese di. Ta hã ma tô we ĩzatõ, iwasu'uwẽ na te 're da'apo're pu'u mono da, daza'rui mono bâ. Tahawa, a norĩ wa'aba si te 're aipo're pu'u za'ra wa'aba mono õ di za, iwasu'uwẽ na hã. Uburé wa za iwasu'uwẽ na te 're da'apo're pu'u.

Luca 4:43 ပူးပေါင်းရင်းမြစ်များ

Mateu 4:23

Tawamhã daza'rui mono bâ te 're mo Zezusi hã, Galiléa ãma hã. zudeu norĩ te, rowahutuzé mono bâ, ma tô te te dama 're rowahutu. 'Re ihâimana u'âsi mono, da'ãma 're isib'a'uwẽ mono zé wasu'u na te duré te te dama 're rowasu'u, iwasu'uwẽ na. Duré dahâzé da te 're isépata za'ra mono bâ hã ma da'apese. Hâzé u'âsi wa, sib'uware na 're inomro mono norĩ zama ma duré apese, Zezusi hã.

Marcu 1:35

Tawamhã robza'rã ré, ma wahudu Zezusi hã, 'ri nhiti morĩ da, a'ubuni u. Taha wamhã, te tame a'â tihâiba, 'Re ihâimana u'âsi mono ma, mreme da.

Zuwã 20:21

Tawamhã Zezusi te duré tãma nharĩ za'ra: — Rowẽ na 're aihâimana za'ra wa'aba mono. Ĩmama we te te datẽme ĩzatõrĩ ne, wa za duré datẽme asatõrĩ za'ra wa'wa isine.

Zuwã 9:4

Ta hã ma tô we ĩzatõ, dapawaptom na te tãma 're romhuri mono da. Rowa'a ré, te za da te 're romhuri za'ra, 're mara mono wa, da te 're romhuri waihu'u za'ra mono dai õ wa za. Tahawa rowẽ ré, wa za wa te tãma 're romhuri za'ra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 10:38

'Re ihâimana u'âsi mono hã ma tô Tipẽ'ẽzani hã tãma tisõ, Zezusihi ma, Nazaré ãma aré 're isãmra mono ma. Tiwaihu'u pese zama ma tô tãma tisõ. Tahawa, wasiré Izaraéu nhihudu norĩ nhipti'ai wa'wai baba, ma tô 're mo, marĩ iwẽ hã te te dama 're ab'manharĩ mono da, dama i'manharĩ waihu'u'õ hã. Duré, Wa'uburé nhimiwada'uri nhiptete zarina 're ihâimana siwamnarĩ za'ra mono norĩ hã ma tô te te 're apese. Ãne ma tô iwẽ hã te te dama 're ab'manharĩ, Imama hã isiré 're morĩ u'âsi wa, 'Re ihâimana u'âsi mono hã. Ãne Zezu Cristu 're ihâimana mono zém na ma tô iwaihu'u za'ra wa'wa.