Luca 4:29 - ꞌRe Ihâimana Uꞌâsi Mono Zadawa Wasuꞌu

²⁹ Tawamhã ma tô sô tiwahutu za'ra, rob u te te siwi wazere da. Ma tô te te ãma robâdâ za'ra, 'ri nho'õmo nhiti. Sa'a na, ma tô ãma siwi sai'u, sa'a nhisi hawi, i'rã sipra u te te siwi me da.

Luca 4:29 ပူးပေါင်းရင်းမြစ်များ

Luca 4:28

Tahawa, isimirowasu'u hã te te wapari za'ra wamhã, ma tô sada tazahi za'ra ni, rowahutuzéb ãma idasi'ubumro norĩ hã.

Zuwã 8:37

A norĩ wa'wa hã Abra'ãhã nhihudu te 're anomro aba mo. Ãne na ĩma aiwaihu'u pese za'ra wa'aba di. Tane nherẽ, isihudu nherẽ, ma tô asiwi ĩwẽ'õ za'ra wa'wa, asiwi ĩwĩrĩ aba da hã. E marĩ wa. Ĩnhimiroti hã taré asiwi 're wẽ'õ za'ra wa'aba mono wa.

Zuwã 8:40

'Re ihâimana u'âsi mono nhimiroti hã tô sena uptabi. Taha si, wa tô te aima 're wasu'u za'ra wa'wa, te te ĩma 're i'awaihu'u mono zéb zarina. Tane nherẽ, ma tô ĩ'ãma asima iroti za'ra wa'wa, asiwi ĩwĩrĩ aba da. Ãne dama 're hâimana mono õ di, Abra'ã hã. A norĩ wa'wa hã aimama ne, te 're anomro aba mo.

Zuwã 8:59

Tawamhã te te sadawa 'ru za'ra wa, ma ẽne hã pa pâ sada waibu za'ra, te te siwi ãma wĩrĩ da. Tane nherẽ, te te siwi wĩrĩ õ di, rob u watobro da, tiwi si'wahi za'ra wa, 'ri 'wawi wa'ra hawimhã.

Hebreu 13:12

Ãne wa, ma tô duré Zezusi hã 'ri 'wawi wa'razém nhiti dârâ, te te irobzépata za'ẽtẽ zarina, tiwapru na taha si te te oto 're da'a'upsõi mono da, dawasété hawi.