Luca 24:5 - ꞌRe Ihâimana Uꞌâsi Mono Zadawa Wasuꞌu

⁵ Tahawa, ma tô pi'õ norĩ hã tãma tipahi za'ra. Pahi te, ma tô aiwẽ'ẽ za'ra, ti'ai u. Tahawa, te ãne tãma nharĩ za'ra, pi'õ norĩ ma hã: — E niha da, te ihâiba zô irob'madâ'â za'ra wa'wa, inomrozéb ãmamhã. Apâ ma tô hâiwa'udu.

Luca 24:5 ပူးပေါင်းရင်းမြစ်များ

Daniéu 10:16

Taha ré, ma tô ni'wa a'uwẽ ne hã ĩzaihâ upi. Tahawa, wa tô sadawahaipo'o, oto ĩmreme na te sãna'rata da. Tawamhã ãne wa tô hâiwa ãma romhuri'wa ĩnho're isa ma hã tãma tinha: — Ĩnhib'apito, ã hã marĩ te i'ab'madâ'â mono zé, ma tô robzépada hã ĩma waze. Tahawa, ĩnhib'uware na wa tô oto ĩhâiba.

Daniéu 10:19

Ãne te ĩma tinha: — 'Re ihâimana u'âsi mono ma hã tãma asawi uptabi di. Tahawa, aipahi tõ. 'Re ihâimana u'âsi mono hawi rowẽzé aima ihâimana da si iwẽ hã. Tahawa, sada asib'ru na! Duré asiptete na aihâimana! Ãne te te ĩma nharĩ wa, oto apâ ĩnhiptete wamhã, wa tô ãma sada'â ãne: — Ma'ãpé oto ãma ĩma rowasu'u na. A hã ĩnhiptede hã ma tô apâ ĩma isõ.

Luca 1:29

Tane nherẽ, Maria hã te te waihu'u õ di, isimirowasu'u hã. Tahawa, te tipẽ'ẽ na hã, sima tinha, ãne: — E niha bâ, te õne ĩma tinha.

Luca 24:4

Te te waihu'u za'ra õ wa, te ãne ãma rosa'rata za'ra: — E niha ab're hã baba di. E mahãta ihâiba. Tawamhã aibâ norĩ hã maparane ma itẽme za'ra aima'wara zahuré. I'uza hã ma hâi ai'ubuzi zahuré.

Luca 24:6

Ãme nomro õ di oto. Ma tô hâiwa'udu. Galiléa ãma 're sãmra mono ré, ma tô romhâ ré aima siwasu'u siromo za'ra wa'wa aré, ãne: “Ti'ai ãma Dasiré Ipodo hã te za dama hâiba nhomri ni, aibâ iwasété norĩ ma. Wedepo'o nhonhi'rãmi na te za dasiwi sasõmri ni, dâ'â da. Bâdâ maparane ãma si'utõrĩ õ ré, te za apâ hâiwa'udu.” Ãne ma tô romhâ ré aima siwasu'u siromo za'ra wa'wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:24

Tane nherẽ, 'Re ihâimana u'âsi mono hã ma tô hâiwa'utu, ab're hawi watobro da, dâ'â uptabi nherẽ. Ma tô duré pawapto, dâ'â u'âsi nomro tõ da. Idâ'âzé tãma wapure wa, dâ'â u'âsi nomro waihu'u õ di, Zezusi hã.

Hebreu 7:8

Levita norĩ hã, sasedoti na da'ãma romhuri'wa norĩ hã te za tô te te dawi 're waibu danhibro hã, danhoprubzé da te tãma 're ipo'o za'ra mono hã. Tane nherẽ, te za uburé ta norĩ hã 're dâ'â za'ra, levita norĩ hã. Mequizédéquihi si, dâ'â ãna wama 're ihâimana mono ne, te wama 're hâimana sasedoti na hã, idâ'âzém na ãma irob'ui'éré hã ãma hâimana õ wa, ibaihâ na hã.

Apocalipsi 1:18

Wa tô dârâ aré. Ĩdâ'â nherẽ, wa oto tô 're ĩhâimana u'âsi. Duré oto ĩdâ'â waihu'u õ di za. Ma'ãpé, ãne na hã awaihu'u pese. Te ĩsima ipisutuzéb zarina, wa te te 're da'anho'reptu, adâ 're ihâimana za'ra mono zém hawi, 'Re ihâimana u'âsi mono 'rata, oto 're dahâimana u'âsi za'ra mono da.

Apocalipsi 2:8

— Te za oto irob'ui'é, Esmina na 'ri nho'õmo nhisi ãma ĩzazei'wa norĩ 'madâ'â'wai ma. Te aima iwaihu'uzém na te za tãma irob'ui'é, ãne: “Wa hã wa aima roti za'ra wa'wa, duréihã marĩ õ ré 're ĩhâimana mono. Uburé marĩ hã si'utõrĩ pese nherẽ, wa hã, marĩ zarina ĩsi'utõrĩ õ di za. Wa za 're ĩhâimana u'âsi. Wa tô dârâ aré. Ĩdâ'â nherẽ, wa tô apâ duré hâiwa'udu, 're ĩhâimana u'âsi mono da oto apâ.