Luca 24:25 - ꞌRe Ihâimana Uꞌâsi Mono Zadawa Wasuꞌu

^25-26 Tawamhã Zezusi hã te asa tãma nharĩ zahuré, ãne: — E niha bâ bété, waihu'u su'u aba õ di, sazei aba da, 'Re ihâimana u'âsi mono zadawa 'mahârâ 'rata 'wa norĩ nhimirowasu'u mono bâ, Danho'reptui'wa na rob'ui'éré hã. Danho'reptui'wa da, 'Re ihâimana u'âsi mono te te ipisudu hã te za a'â robzépata, rowasédé, da te tãma 'manharĩ wamhã. Taha parip si, te za rowẽ ãma 're sãmra, 'Re ihâimana u'âsi mono te te tãma ipisutuzéb uwaibaba.

Luca 24:25 ပူးပေါင်းရင်းမြစ်များ

Mateu 26:24

Ti'ai ãma Dasiré Ipodo hã duréihã ma tô idâ'âzém na rob'ui'éré siromo za'ra, 'Re ihâimana u'âsi mono zadawa 'mahârâ'wa norĩ hã. Ta norĩ hã te te ãma irob'ui'éré za'ra zéb zarina te za ãma mo tô, tidâ'âzéb u. Tane nherẽ, aibâ ma, tãma 're ropipa uptabi mono di za, za te te dama ihâiba nhomri'wa da ma hã. 'Re ihâimana u'âsi mono za te te azâri wamhã, te za sima rosa'rata, ãne: “Ĩpoto õ 'wa'âhã, aré wẽ di. E marĩ wa. Ãne na te 're robzépata mono õ wa aré.” Ãne te za 'râwi si'ãma rosa'rata, za dama ihâiba nhomri'wa hã.

Marcu 16:14

Tawamhã Zezusi hã tisiré 're inomro mono norĩ u ma duré wi, sai ma, si'ubumroi ré, 11 na ihâiba za'ra u. Tawamhã timreme ma tô tãma pẽtẽ za'ra, siwi isabui'wa norĩ nhimirowasu'u hã te te saze za'ra õ wa, apâ ihâiwa'utuzém na da te iwasu'u na hã.

Marcu 7:18

Tawamhã ma tô tãma nharĩ za'ra, ãne: — E niha a norĩ wa'aba ma zama, aima waihu'u za'ra wa'aba õ di bété. Dasa hã da te 're huri mono wamhã, taha na 're dasiwasété za'ra mono õ di za 'râwi.

Marcu 9:19

Tawamhã aibâ mreme te te wapari wamhã, ma tô tisiré 're inomro mono norĩ ma tinha, ãne: — E niha bété ai'rata za'ra wa'aba 're ĩnhamra u'âsi mono nherẽ, asina 're ĩ'umnhasi za'ra wa'aba mono õ di bété, te 're i'aipawaptob za'ra wa'aba mono zéb da hã. E ĩpẽ'ẽzé u'âsi, wa za asiré za'ra wa'aba hã 're mo, asina 're ĩ'umnhasi za'ra wa'aba mono õ wa. Ma'ãpé, ai'repudu hã we ĩtẽme asiwi saprõni aba.

Luca 24:24

Tahawa, ma tô wasiré norĩ hã 'mane, pi'õi wa'rãmi, ab're u. Ta norĩ te te duré robzabu zahuré wamhã, ab're hã baba na ma tô duré sabu zahuré, pi'õ norĩ nhimirowasu'u zarina. Taha wamhã, te duré wama rowasu'u za'ra, Zezusihi hâiba hã te te isãmri zahuré õ na.

Zuwã 5:39

A norĩ wa'wa hã te ãne asima 're irowasu'u za'ra wa'aba mo: “Wa norĩ hã wa wa te 're sõré u'âsi za'ra, 'Re ihâimana u'âsi mono mreme ui'éré hã. Tahawa, wa za ãma wasina uwaimrami za'ra ni, 're idanomro u'âsi mono zé hã.” Ãne te asima 're irowasu'u za'ra wa'aba mo. Ta hã te ĩwasu'u, 'Re ihâimana u'âsi mono mreme ui'éré hã. 'Re sõré u'âsi za'ra wa'aba mono nherẽ, asima 're ĩwẽ za'ra wa'aba mono õ di, 're ĩzaze za'ra wa'aba mono da hã. 'Re ĩzaze za'ra wa'aba mono 'wa'âhã, wa aré aima pisutu za'ra wa'wa, 're idanomro u'âsi mono zé hã asina uwaimrami za'ra wa'aba da.

1 Corĩtu 15:3

Zezusihi wasu'uwẽ hã danhipai u ipire uptabi hã, wa tô te aima 're wasu'u za'ra wa'wa, da te ĩma 're irowasu'u za'ra mono zéb zarina. Ãne, Zezusihi wasu'u hã ipire uptabi hã: Cristu hã ma tô, u, wazada dârâ, uburé wawasété na 're iwahâimana za'ra mono norĩ zada. Taha pari, ma tô dasiwi sẽrẽ ni, u, ab're 're. Tawamhã bâdâ maparane ãma si'utõrĩ õ ré, ma tô duré Imama hã, u, hâiwa'utu, 'Re ihâimana u'âsi mono hã. Ãne ma tô tãma tiromhâiba, duréihã 'Re ihâimana u'âsi mono zadawa 'mahârâ'wa norĩ hã ibaihâ na te te ãma irob'ui'éré siromo za'ra zéb zarina.