Luca 23:34 - ꞌRe Ihâimana Uꞌâsi Mono Zadawa Wasuꞌu

³⁴ Tawamhã Zezusi hã te Timama ma tinha, ãne: — Ĩmama, da'ãma 'madâ'â õ di za, da te ĩma i'manharĩ wasété za'ra zé hã. Da te dasiwi ĩwaihu'u ãna, ma tô ĩma 'manharĩ wasété za'ra ni. Tawamhã ẽtẽ zapotore i'ui'éré ré hã ma tô nasi sima sãmra, Zezusihi uzazéb zô. Taha zarina, ma tô sima ãma aipé.

Luca 23:34 ပူးပေါင်းရင်းမြစ်များ

Zenezi 50:17

ma tô wawi waptẽrẽ za'ra, ãne wa te aima nharĩ za'ra da hã: “Asisãnawã norĩ iwasédé te te aima i'manharĩ za'ra zém na hã, asina pa'ruiwapari za'ra õ di za.” Tahawa, wa ãhã na hã aiwi waptẽrẽ za'ra ni, wawasédé, wa te aima i'manharĩ za'ra zé, wa'ãma 'madâ'â za'ra tõ da, asina 're iwapaza'rata za'ra mono õ zarina, wa norĩ hã aimama te, 'Re ihâimana u'âsi mono nhib'a'uwẽ na 're wahâimana za'ra mono dâ'âsina. Tawamhã ãne na Zuzé isadawa wasu'u za'ra, te te wapari wamhã, ma tô aiwa'õ.

Salmu 22:18

Ta norĩ hã ma tô duré ĩ'uza hã te te sima sõmri za'ra. Duré ma tô ĩsi'ubuzéb zô niha hã datozébre nasi siwi wabzu.

Mateu 11:25

Tawamhã Zezusi hã te duré ãne Timama ma hã mre: — Ĩmama, a hã Danhib'apito uptabi, hâiwa ãma hã, duré ti'ai ãma zama. A hã ma tô rowaihu'u pese 'wa norĩ wi roti iwẽ hã 're i'anhito mo, te te 're waihu'u za'ra mono tõ da hã. Rowaihu'u prãi 'wa na 're ihâimana za'ra mono norĩ ma si, ma tô marĩ iwẽ hã 're i'awaihu'u mo. Tahawa, wa ai'ãma ĩwata, asõpru wa.

Mateu 11:26

Tane tô, Ĩmama. Asima 're i'awẽ mono zéb uwaibaba si, ma tô õ norĩ ma si 're i'awaihu'u mo.

Mateu 5:44

Tane nherẽ, wa za duré wa hã aimawi aima waihu'u za'ra wa'wa, tô õhõ na rotizém na hã. Ai'ruiwapari'wa norĩ hã te za 're isawi pese za'ra wa'aba mo. Duré te te aima 're irob'manharĩ wasété za'ra wa'aba mono norĩ ãma, te za 're aimreme zusi aba mo, 'Re ihâimana u'âsi mono ma, iwẽ si te te tãma 're apisutu mono da, ta norĩ ma.

Marcu 15:24

Taha pari, ma tô oto wedepo'o nhonhi'rãmi na siwi sasõ. Te te siwi sasõmri pari, ma tô ẽtẽ zapotore i'ui'éré ré hã nasi sima sãmra da'wapéi'wa norĩ hã, pibui pese na Zezusihi uza hã te te siwi waibu da.

Luca 22:42

Ãne te Timama ma mre: — Ĩmama, asima wẽ wamhã, ĩma ba'a ĩdâ'âzé hã, te robzépata tõ da. Tane nherẽ, te ĩsima iwẽzéb uwaibaba, ĩma pisutu õ di za. Aima iwẽzéb uwaibaba, te 'manharĩ da hã ĩma wẽ di.

Zuwã 17:9

— Ãhã na wa aima ãma wasu'u za'ra, 're pawaptob u'âsi za'ra mono da. Ĩzazei'õ'wa norĩ hã te aima ãma wasu'u za'ra õ di. We ĩma ipisutu za'ra norĩ si, wa ãma aima wasu'u za'ra, asib'a'uwẽ 're nomro mono wa, duré 're pawaptob u'âsi za'ra mono da.

Zuwã 19:11

Tawamhã Zezusi asa te tãma tinha, ãne: — 'Re ihâimana u'âsi mono, ma tô aipisutu, ĩma aipire da. Ĩma aipire da, te te aipisutu õ 'wa'âhã, aré ĩma aipire õ di. Tawamhã ĩma aipire da, te te aipisutu nherẽ, ĩ'ãma asimiroti wasété wamhã, tãma aiwẽ õ di za, aiwasédé hã ĩ'ãma 'manharĩ wa. Tane nherẽ, aibâ hã si'uihâ na te te aima ĩhâiba nhomri hã aiwasété nhipai u wasété uptabi di, ta hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 16:28

Tahawa, te Paulu hã hârâ 'rãihâ na 'mahâ, ãne: — Tô'ã. Asiwĩrĩ tõ. Ãhãta wa aihĩni aimasam ni.

Zezusihi zadawa wasuꞌuꞌwa norĩ nhimiromhuri na robꞌuiꞌéré 3:17

— Wasiré Izaraéu nhihudu norĩ, ĩwapari pese za'ra wa'aba za. Wa hã wa tô aiwaihu'u za'ra wa'wa. Asiwi waihu'u aba ãna, ma tô dama i'ru za'ra wa'wa, Zezusi hã. Aima ipire za'ra wa'aba norĩ zama te te siwi waihu'u ãna, ma tô ta norĩ zama dama 'ru za'ra, Zezusi hã da te dasiwi wĩrĩ da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 7:60

Tawamhã hi'rãtitõ ma tô nhamra, Estewã hã. Mreme 'rãihâ na ma tô duré tãma mre, ãne: — Wanhib'apito, tiwasédé te te ĩ'ãma 'manharĩ za'ra nherẽ, tãma pisutu za'ra õ di za, rowasédé hã. Tawamhã ãne na mreme pari, ma tô oto dârâ, Estewã hã.

Roma 12:14

'Re rowaptẽrẽ za'ra wa'aba mono, 'Re ihâimana u'âsi mono wi, te te aima 're irob'manharĩ wasété za'ra wa'aba mono norĩ hã te te 're apawapto wẽ mono da. Rowẽ hã te te tãma 're i'apisutu mono da si, te za tãma ãma 're aimreme zusi aba mo, ropipa hã te te tãma 're apisutu mono tõ da.

1 Corĩtu 2:8

Tiwaihu'u pese zarina, 'Re ihâimana u'âsi mono nhimirowaihu iwẽ uptabi hã te te waihu'u za'ra õ di, ti'ai ãma dama roti'wa norĩ isazei'õ'wa norĩ hã. Te te waihu'u za'ra 'wa'âhã, Wanhib'apito, danhipai u iwaihu'u pe hã te te siwi wĩrĩ õ di aré, wedepo'o nhonhi'rãmi na hã.

1 Corĩtu 4:12

Wahâimanazéb da hã, wawasutu nherẽ, wa wanhib'rata na wa te 're romhuri pese za'ra. Duré da te wa'ãma 're wasété za'ra mono nherẽ, wa da'ãma 're wamreme zusi u'âsi, 'Re ihâimana u'âsi mono ma, iwẽ hã te te dama 're anhomri mono da. Duré da te wama 're rob'manharĩ wasété za'ra mono nherẽ, wa wanhiptete na õhõ ãma si 're wahâimana za'ra, asa wa te dama ãma 're wa'rãmi za'ra mono ãna.

1 Pedru 3:9

Duré asada 're dahâimana wasété za'ra wa'aba mono wamhã, asa dama ãma 're wa'rãmi za'ra wa'aba mono õ di za, aihâimana wasété na. Duré dapẽ'ẽ na taré da te 're ai'ruiwapari za'ra wa'aba mono wa, da te aima 're nharĩ za'ra wa'aba mono nherẽ, asa dama ãma 're wa'rãmi za'ra wa'aba mono õ di za, aimreme wasété na hã. Wamama wi si, te za ta norĩ ma 're iwaptẽrẽ za'ra wa'aba mo, iwẽ si te te tãma 're sõmri za'ra mono da, ta norĩ ma hã. Ãne da, ma tô Wamama hã sitẽme asô tihârâ za'ra wa'wa, iwẽ na si aima 're sõprub za'ra wa'aba mono da.