Luca 23:27 - ꞌRe Ihâimana Uꞌâsi Mono Zadawa Wasuꞌu

²⁷ Tawamhã da'ahâ na te Zezusihi zarina ai'aba'ré ni. Pi'õ zama, te dame ai'aba'ré, wawa sina. Zezusihi ãma pẽ'ẽzé uptabi za'ra wa, te 'ru'ru.

Luca 23:27 ပူးပေါင်းရင်းမြစ်များ

Salmu 22:17

Uburé ĩhi hã sõ'awi oto ai'uréiwi hâimana za'ra wa, sa'rata waihu'u pese di. Duré ta norĩ hã te ĩ'ãma wa'ẽ za'ra sina siwi ĩ'madâ'â pese.

Mateu 27:55

Tawamhã pi'õ norĩ hã ahâ na te 'madâ'â za'ra romhâ na, Zezusi hã hâiwi sa'o ré. Ta norĩ hã ma tô isiré 're nomro Galiléa hawi, Zeruzalẽ u, te te siwi 're pawaptob za'ra mono da.

Marcu 15:40

Pi'õ norĩ zama, romhâ hawi te Zezusi hã 'madâ'â za'ra. Nima norĩ nhisi hã ãne: Maria Madaréna, duré Salomé, duré Maria, Zuzé norĩ na hã Tiaguhu me. Tiagu hã ihâiba té.

Luca 23:28

Tahawa, Zezusi hã ma tô itẽme aipi'ra za'ra, pi'õ norĩ u, te te tãma nharĩ za'ra da, ãne: — Pi'õ norĩ, Zeruzalẽ ãma 're ai'ubumroi wa'aba mono norĩ hã, ĩ'ãma ai'ru'ru wa'aba tõ. Ãté asisô si, te za 're ai'ru'ru wa'aba mo, ai'ra norĩ zô zama.

Luca 23:55

Tawamhã Zuzé hã ab're u morĩ wamhã, ma tô pi'õ norĩ hã isarina ai'aba'ré. Zezusihi zarina, Galiléa hawi we isi'aba'ré, pi'õ norĩ hã. Tawamhã ab're hã ma tô sabu za'ra. Duré Zezusihi hâiba, Zuzé te te isẽrẽzé hã ma tô sabu za'ra.

Luca 8:2

Pi'õ norĩ zama, te isiré 're nomro, wa'uburé, te te tãma 're i'anhamra mono norĩ hã. Duré, ihâzé hã te te tãma 're i'apari mono norĩ zama, te isiré 're nomro. Pi'õ nhisi hã, Maria Madaréna na isisi hã, wa'uburé hã, 7 na ihâiba za'ra hã te te tãma isãmra za'ra hã.

Luca 8:52

Tame da'ahâ na te ãma ta'ru'ru ni, dapẽ'ẽzé wa. Tahawa, te Zezusi hã dama tinha, ãne: — Ãma ai'ru'ru wa'aba õ di za. Azaruture hã dâ'â õ di. Taré te nhono.

Zuwã 16:20

Asina ĩwapari pese za'ra wa'aba za. A norĩ wa'wa hã aiwawa ahâ za'ra wa'aba di za. Ĩzazei'õ'wa norĩ si te za 're to za'ra. Aipẽ'ẽzé ahâ za'ra wa'aba nherẽ, aipẽ'ẽzé u'âsi 're anomro aba mono õ di za. Zahadu wapsi, aima 're rowẽ uptabi za'ra wa'aba mono di za.