Luca 22:53 - ꞌRe Ihâimana Uꞌâsi Mono Zadawa Wasuꞌu

⁵³ Bâtâ sidâpâsi, wa tô asõ'a wa'aba nasi aimasisi, 'Re ihâimana u'âsi mono nhorõwa 'ri ãma. E niha bâ tameb ré, asiwi ĩ'âri aba õ di bété. Ãhã na ma tô bâdâ hã iwa waptãrã, asiwi ĩ'âri aba zéb da hã, robra tede'wa hã pire na 're imorĩzéb da hã.

Luca 22:53 ပူးပေါင်းရင်းမြစ်များ

Mateu 21:23

Tawamhã Zezusi hã ma tô apâ mo, 'Re ihâimana u'âsi mono nhorõwa 'ri u. Tame te oto dama rowahutu, 'ri 'wawi wa'ra 're. Tawamhã sasedoti ipire norĩ hã ma tô itẽme aimasa, zudeu norĩ ma roti'wa norĩ zama. Tawamhã Zezusi hã te siwi sadanha, ãne: — E 'wa sadawa para, te bété ãne hã marĩ hã dama 're i'ab'manharĩ mo. E 'wa hã, aipisutu'wa.

Luca 22:52

Zezusihi zô isihudu hã ta norĩ hã sasedoti ipire norĩ, duré 'Re ihâimana u'âsi mono nhorõwa 'madâ'â'wa norĩ, ipire norĩ, duré zudeu norĩ ma roti'wa norĩ. Tahawa, ma tô Zezusi hã tãma nharĩ za'ra, ãne: — E wa hã danhibrob zô dapãrĩ'wa pâ, ma bété we ĩzô aihutu 'wa, sib'ézé 'wapa ré, duré asiwãi ré zama.

Luca 22:54

Tawamhã ma tô oto siwi ti'â, Zezusi hã. Te te siwi âri wamhã, ma tô siwi saprõ, sasedoti tisiré norĩ nhipai u ipire uptabi nhorõwa u. Pedru hã te romhâ na te te dapibu.

Zuwã 12:27

— Ãhã na te ĩsina rosa'rata ahâ di. E Ĩmama ma, wa za ĩsi'ru, te te dawi ĩnho'reptu da, ĩdâ'â õ ré, te robzépata tõ da. Mare di. Tãma ĩsi'rui õ di za, te te dawi ĩnho'reptu da hã. Dazada ĩdâ'â da si, wa wei mo.

Zuwã 13:30

Tawamhã i'u'ẽtẽ wapu te te 'rẽne pari, rob u ma tô watobro Zuda hã, robra u.

Zuwã 14:30

Aima ĩmreme suru aba di za oto. E marĩ wa. Ĩzazei'õ'wa norĩ wada'uri'wa, we ĩzô morĩ wa, Wa'uburé hã. Ta hã ĩma pire õre di. Ĩma pire õ nherẽ, itẽme wasi'aba'réi wa'aba, Ĩmama te te ĩ'ãma irotizé hã te ĩsina uwaimrami da. Tawamhã te ĩsina uwaimrami wapsi, Ĩmama te 're isawi pese mono na te za da te 're ĩwaihu'u za'ra.

Zuwã 7:30

Tawamhã ma tô duré sima ãma roti za'ra, te te siwi âri da, dama ipire norĩ hã. Tane nherẽ, te te siwi âri õ di. E marĩ wa. Zahadu bâdâ hã 'Re ihâimana u'âsi mono te te ãma ipisutuzé hã, iwa waptã'ã õ wa.

Zuwã 7:45

Tawamhã Zezusihi zô isihutu norĩ hã te apâ ai'aba'ré, sasedoti ipire norĩ u, farizeu norĩ u zama. Ubana itẽme sihutu wamhã, te sadanharĩ za'ra, ãne: — E mahã. E marĩ da, we asiwi saprõni aba õ di, watẽmemhã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 26:18

Datob'a ne 're danomro mono wa, da te 're idato pese za'ra mono ne, te za 'Re ihâimana u'âsi mono nhimiroti na 're ipo're pu'u za'ra mo, zudeu'õ norĩ hã. Robra na 're inomro mono hã te za 're i'awaibui mo, rowa'a na oto 're nomro mono da, ta norĩ hã. Satanasihi nhiptetezém hawi te za 're i'apizari mo, 'Re ihâimana u'âsi mono niwĩ 're nomro mono da oto, te te sina 're ĩ'umnhasi za'ra mono zéb zarina, 'Re ihâimana u'âsi mono hã iwasédé hã te te tãma 're apari mono da, duré ãma 're sib'a'uwẽ za'ra mono da oto dame.” Tawamhã Paulu te duré siwasu'u, ãne:

Éfézu 6:12

Wa norĩ hã wasiré 're iwahâimana za'ra mono norĩ me, 're wasi'wapé za'ra mono õ di. Wa'uburé norĩ me si, wa za 're wasi'wapé za'ra, hâiwa nho're ãma simiroti wasété na 're ihâimana za'ra mono norĩ me. Wa'uburé norĩ hã ti'ai ãma dapo're'õ na 're idanomro mono norĩ ma hã, simiroti pire di, Wanhib'apito nhimiroti waihu'u'õ'wa ta norĩ hã 're nomro mono wa.

Colosu 1:13

Ta hã ma tô wa'anho'reptu tô, robra hawi, Satanasihi nhiptetezém hawi. Ta hawi ma tô te te 're wa'awaibu, i'ra nhimi'madâ'â si oto tãma 're wahâimana za'ra mono da, tãma isawi uptabi nhimi'madâ'â si.