Luca 22:20 - ꞌRe Ihâimana Uꞌâsi Mono Zadawa Wasuꞌu

²⁰ Tawamhã saihuri pari, ma duré hâsizé hã ti'â, uwa 'rãi wa'u isé ré hã. Te duré ãhã wamhã tãma nharĩ za'ra, ãne: — 'Re ihâimana u'âsi mono te te dama iropisutuzép té, te wasu'u, rob'rãi wa'u hã. Rob'rãi wa'u za'wari ne, asada ĩdâ'â za'ra wa'aba wamhã, te za ĩwi puru, ĩwapru hã. Tô sena, te za te te dama ãma 're a'uwaimrami, te te dama iropisutuzép té hã. Ãne na waihu'u za'ra wa'aba da, te za ĩwi puru, ĩwapru hã.

Luca 22:20 ပူးပေါင်းရင်းမြစ်များ

Ezodu 24:8

Tawamhã Mozési, danhimizama waprui ré piza'a 're nho'a ma tô ti'â. Ma tô duré danhisi te te a'a. Taha sina te dama tinha ãne: — Ã hã danhimizama wapru, Uburé Danhib'apito me i'asisaze za'ra wa'aba nhitobzé, tinhimiroti te te aima hiri za'ra wa'aba wamhã.

Mateu 26:28

à hã ĩwapru, te wasu'u. Rob'rãi wa'u za'wari ne, te za ĩwapru hã ĩwi asa'wa, da'ahâ zada ĩdâ'â wamhã, 'Re ihâimana u'âsi mono hã dawasédé hã te te oto 're ab'madâ'â tõ mono da, da'ãma. à hã ĩwapru, ĩwi sisa'wari wamhã, 'Re ihâimana u'âsi mono hã tinhib'a'uwẽ ma, te te tãma iropisutuzé hã tô sena za te te tãma ãma 're i'uwaimrami mono zé, te wasu'u.

Marcu 14:24

Ãne ma duré tãma sina waihu'u za'ra, Zezusi hã: — Ã hã ĩwapru, te wasu'u. Rob'rãi wa'u za'wari ne, te za ĩwapru hã ĩwi asa'wa, da'ahâ zada ĩdâ'â wamhã. Ã hã ĩwapru hã ĩwi sisa'wari wamhã, 'Re ihâimana u'âsi mono hã tinhib'a'uwẽ ma, te te tãma iropisutuzé hã tô sena za te te tãma ãma 're i'uwaimrami mono zé, te wasu'u.

1 Corĩtu 11:25

Tawamhã saihuri pari, tô õne ma tô duré hâsizé hã ti'â, uwa 'rãi wa'ui ré hã. Ãne te duré tãma nharĩ za'ra: “Ã hã rob'rãi wa'u hã, ĩwapru asada za'ra wa'aba ĩwi pu'u wa, 'Re ihâimana u'âsi mono te te dama iropisutuzép té, tô sena za te te dama ãma 're i'a'uwaimrami mono zé, te wasu'u. Ã hã 're âhuri aba mono sidâpâsi, te za ĩ'ãma 're asipo're pu'u u'âsi za'ra wa'aba mono zéb da, 're i'manharĩ za'ra wa'aba mo, õne u'âsi.” Ãne ma tô duré sina tãma nharĩ za'ra, Zezusi hã.

2 Corĩtu 3:6

Taha si ma tô te te 're wapawapto, te te dama iropisutuzép téb zarina, wa te dama 're romhuri wẽ mono da. E niha tawamhã, 'Re ihâimana u'âsi mono te te dama iropisutuzép té hã. E 'Re ihâimana u'âsi mono nhimiroti 'rata na Mozésihi nhimi'ui'éré, te wasu'u, ã hã. Mare di. 'Re ihâimana u'âsi mono pẽ'ẽzani nhimipawaptobzéb zarina 're idanomro mono zép té, te wasu'u, ã hã. Mozésihi nhimi'ui'éré zarina 're danomro mono nherẽ, e taha zarina te za 're dasisõ'reptu za'ra, ropipa hawimhã. Mare di. Ni'wa hã te te sina uwaimrami waihu'u õ di, Mozésihi nhimi'ui'éré hã. 'Re ihâimana u'âsi mono te te dama iropisutuzép té hã da te 're saze za'ra mono wapsi, te za Ipẽ'ẽzani hã te te 're da'anho'reptu ropipa hawimhã, rowẽ na isiré 're dahâimana u'âsi za'ra mono da oto.

Hebreu 12:24

Zezusihi u ma tô duré asina 're irob'umhutu za'ra wa'aba mo. Ta hã te oto 'Re ihâimana u'âsi mono te te dama iropisutuzép té hã te te wa'ãma 're ab'madâ'â u'âsi. Duréihã Caĩ hã tino te te wĩrĩ wa, iwapru hã tiwi pu'u wamhã, 'Re ihâimana u'âsi mono te te i'ruiwa'âbâzé, te wasu'u, Abéu wapru hã. Tanei õ di, Zezusihi wapru hã. Dazada dâ'â wa, iwapru hã tiwi pu'u wamhã, 'Re ihâimana u'âsi mono hã dawasédé te te dama 're i'apari mono zé, te wasu'u.

Hebreu 13:20

Wanhib'apito Zezusi hã wazada idâ'âzéb zarina, te oto pone'ẽrebâ 'madâ'â'wa ne, wama 're hâimana za'ra, wa'madâ'â'wa iwẽ uptabi na hã. Wazada idâ'âzéb zarina, ma tô 'Re ihâimana u'âsi mono hã taha na dama ropisutu té, ãma 're dahâimana u'âsi za'ra mono da oto, taha ãma si. Zezusi hã dâ'â nherẽ, ma tô Imama hã apâ hâiwa'utu. 'Re ihâimana u'âsi mono hã dama rowẽ pisutu'wa hã, iwẽ si te te aima 're sõmri za'ra wa'aba mono da, wa taha na si te ai'ãma 're umnhasi za'ra wa'wa, taha zarina uburé marĩ hã te te aima 're iwẽ za'ra wa'aba mono zéb zarina si, tãma ãma asina 're uwaimrami za'ra wa'aba mono da. Duré Zezu Cristuhu waihu'u pese na te te 're wa'apawapto mono da, wa duré taha na si te ai'ãma 're umnhasi za'ra wa'wa, iwẽ si wa te oto tãma 're 'manharĩ za'ra mono wa, wa'ãma 're toi u'âsi mono da, 'Re ihâimana u'âsi mono hã. Tahawa, Zezu Cristuhu ãma si ãma 're wawata u'âsi za'ra wa'aba mono za. Tane tô.

Hebreu 9:15

Tahawa, te oto Cristuhu si te te da'ãma 're ab'madâ'â, 'Re ihâimana u'âsi mono te te dama iropisutuzép té hã. Tidâ'âzém na ma tô da'awa'â Cristu hã, dawasété na 're idanomro mono zém hawi te te oto 're da'anho'reptui mono da, zahadu 'Re ihâimana u'âsi mono te te dama iropisutuzéb 'rada hã dama 're hâimana mono ré. Taha zarina te za oto 'Re ihâimana u'âsi mono hã tinhib'a'uwẽ da, te te 're i'apisutu mono norĩ hã te te sima 're awaibu, iwẽ uptabi na te te tãma 're i'aropisutu mono zéb ré si, 're hâimana u'âsi za'ra mono da iré, ta norĩ hã.