Luca 22:18 - ꞌRe Ihâimana Uꞌâsi Mono Zadawa Wasuꞌu

¹⁸ Ã hã te 're hâsi mono õ di za oto, a'â. Niwapsi, wa za duré te 're hâsi, 'Re ihâimana u'âsi mono hã uburé da'ãma 're sib'a'uwẽ mono wapsi.

Luca 22:18 ပူးပေါင်းရင်းမြစ်များ

Salmu 104:15

Te duré ti'ai ma 're inharĩ mo, uwa 'ru 're 'rãi pese mono da, iwa'u zô, taha na dama 're rowẽ za'ẽtẽ za'ra mono da. Azeitona wa'u tob zô zama, te duré tãma 're inharĩ mo, te te sina 're da'ubu waipo za'ra mono da. Te duré i'u'ẽtẽ wapu zô zama tãma 're ĩnharĩ mo, danhiptede hã te te dama 're sõmri za'ra mono da.

Daniéu 2:44

Tawamhã apito norĩ ãne na 're hâimana za'ra mono ré, 'Re ihâimana u'âsi mono hâiwa ãma 're isãmra mono hã te za danhib'ihâ'a nhimi'madâ'âzé niwa za da te ipru waihu'u'õ hã pisutu, aimawi danhib'ihâ'a norĩ te te ãma i'ai'uté za'ra õ hã. Tawamhã ã hã te za aimawi ihâiba amo norĩ danhib'ihâ'a nhimi'madâ'âzé hã uburé pese uprosi pese. Tahawa, te za õhõ si oto 're hâimana u'âsi, pire na apito nhimi'madâ'âzém na hã.

Mateu 16:18

Pedru, ãne wa za aima waihu'u. Ẽtẽ na, wa ai'ãma simiré'é. Ni'wa hã ẽtẽ nhisiwi te za 'ri na'rada hã 'manha, 'ri hã siptete na tãma 're sa mono da. Õne na 'Re ihâimana u'âsi mono te te ĩpisutu na, ma tô a hã ĩwaihu'u na'ra. Tahawa, ni'wa hã ẽtẽ nhisiwi te te i'ri ne, te za oto ĩwaihu'u na'rata zém hawim na ĩwaihu'u za'ra ni, za da te 're ĩzaze za'ra mono norĩ hã. 'Re idadâ'â za'ra mono zé hã dama siptete nherẽ, duré dama pire nherẽ, ĩzazei'wa norĩ ãma hã te te ai'uté waihu'u za'ra õ di za.

Mateu 26:29

Tô sena, wa za aima ĩsiwasu'u za'ra wa'wa. Ãne hã rob'rãi wa'u te 're hâsi mono õ di za oto, a'â. Niwapsi Ĩmama hã uburé da'ãma 're sib'a'uwẽ mono wapsi, wa za duré te 're hâsi, asiré wa'aba.

Marcu 14:23

Taha pari, ma duré ti'â hâsizé hã, uwa 'rãi wa'ui ré hã. 'Re ihâimana u'âsi mono ãma te duré tiwata, sõpru wa. Taha pari, ma tô tãma sõmri za'ra, uwa 'rãi wa'ui ré hã. Tawamhã aihĩni ma âhu.

Marcu 14:25

Tô sena wa za aima ĩsiwasu'u za'ra wa'wa. Ã hã rob'rãi wa'u hã te 're hâsi mono õ di za oto, a'â. 'Re ihâimana u'âsi mono hã za uburé da'ãma isib'a'uwẽzéb ãma si, wa za duré te 're hâsi.

Marcu 15:23

Tawamhã da'wapéi'wa norĩ hã te aré tãma sõmri za'ra, uwa 'rãi wa'u isé hã te te hâ'rẽne da, miha na wedepa wa'u nhisi na, iwazari ré hã. Tane nherẽ, te te hâ'rẽne õ di, Zezusi hã.

Marcu 9:1

Tawamhã Zezusi hã ma duré dama waihu'u, ãne: — Tô sena wa aima rowasu'u za'ra wa'wa. Aihĩni õ nherẽ, ai'matâ'â aba õ ré, te za tiwaihu'u pese na 'Re ihâimana u'âsi mono, da'ãma 're isib'a'uwẽ mono zé hã ãma i'madâ'â za'ra wa'wa.

Luca 21:31

Tane duré, marĩ hã 're iromhâimana mono zéb da, te aima iwasu'u za'ra wa'aba zéb zarina, 'madâ'â za'ra wa'aba wamhã, te za ãma irowaihu'u za'ra wa'wa, romhuture di oto, 'Re ihâimana u'âsi mono, da'ãma 're isib'a'uwẽ mono zéb u hã.

Luca 22:16

Ãne na, ĩsa na 're ĩsai mono õ di za oto. Bâdâ iwa waptã'ã wapsi, 'Re ihâimana u'âsi mono hã uburé da'ãma 're sib'a'uwẽ mono wapsi, wa za duré 're ĩsa. Tawapsi, dasaihurizé hã marĩ te te iwasu'u hã te ĩsina uwaimrami wapsi, wa za duré 're ĩsa.

Luca 9:27

Tô sena wa aima rowasu'u za'ra wa'wa. Aihĩni õ nherẽ, ai'matâ'â aba õ ré, te za 'Re ihâimana u'âsi mono, da'ãma 're isib'a'uwẽ mono zé hã ãma i'madâ'â za'ra wa'wa.

Colosu 1:13

Ta hã ma tô wa'anho'reptu tô, robra hawi, Satanasihi nhiptetezém hawi. Ta hawi ma tô te te 're wa'awaibu, i'ra nhimi'madâ'â si oto tãma 're wahâimana za'ra mono da, tãma isawi uptabi nhimi'madâ'â si.

Zuize 9:13

Tane nherẽ, uwa 'ru, ma te duré ãma tãma wa'rãmi za'ra ãne: “Aima ĩsi'ĩ'rãnho'õmo za'ra wa'aba da wamhã, wa hã wa aré sõmri zazâ, ĩ'rãi wa'u isé ihâiba'õ norĩ ma, duré a'uwẽ norĩ ma, ãma tãma 're irowẽ pusi za'ra mono zé hã.”