Luca 22:17 - ꞌRe Ihâimana Uꞌâsi Mono Zadawa Wasuꞌu

¹⁷ Tawamhã ma hâsizé hã ti'â, uwa 'rãi wa'ui ré hã. 'Re ihâimana u'âsi mono ãma te tiwata, sõpru wa. Te duré tãma nharĩ za'ra, ãne: — Ã, âhuri aba, uburé.

Luca 22:17 ပူးပေါင်းရင်းမြစ်များ

Salmu 23:5

Dasa isa'ẽne hã te ĩma 're i'a'manharĩ u'âsi mo, ĩnhitob'ru norĩ tõmo nho'a hã. A hã te ĩpire na 're ĩnhimizusi mo. Te duré ĩnhimihâsizé hã ĩma 're i'masisi mo, taré 're ipu'u mono zéb u.

Mateu 14:19

Tawamhã te oto dama tinha, duiroi wa, dasi'ubumroi mono da. Taha pari, ma tô i'u'ẽtẽ wapu 5 na ihâiba hã oto waibu. Duré pe'a maparane ihâimana zahuré hã ma tô timra. Tawamhã hâiwa u te iré rob'madâ, Timama ãma wata da, sõpru wa. Taha pari, ma tô i'u'ẽtẽ wapu hã te te si'ẽ. Duré ãhã wamhã, tisiré 're inomro mono norĩ ma hã, ma tô tãma sõmri za'ra, te te dama sõmri za'ra mono da.

Mateu 15:36

Taha pari, ma tô duré 7 na i'u'ẽtẽ wapu hã waibu. Duré pe'a zama ma tô timra, 'Re ihâimana u'âsi mono ãma wata da, sõpru wa. Tawamhã ãma wata pari, ma tô i'u'ẽtẽ wapu norĩ hã, pe'a me hã te te si'ẽ. Duré tisiré 're inomro mono norĩ ma, ma tô te te sõmri, te te dama sõmri za'ra mono da hã.

Mateu 26:26

Tawamhã saihuri ré, ma tô i'u'ẽne hã ti'â, Zezusi hã. 'Re ihâimana u'âsi mono ãma te iré ãma tiwata, sõpru wa. Taha pari, ma tô te te wẽ'ẽ, i'u'ẽne hã. Te te wẽ'ẽi mono parimhã, ma tô te te tãma sõmri, tisiré 're inomro mono norĩ ma. Ãne te oto tãma nharĩ za'ra: — Ã, i'u'ẽne hã huri aba. Ã hã ĩhâiba te wasu'u.

Marcu 14:22

Tawamhã saihuri ré, ma tô ti'â, i'u'ẽne hã. 'Re ihâimana u'âsi mono ãma te tiwata, sõpru wa. Taha pari, ma tô te te wẽ'ẽ, i'u'ẽne hã. Te te wẽ'ẽi mono parimhã, tisiré 're inomro mono norĩ ma, ma tô te te sõmri. Ãne ma tãma sina waihu'u za'ra: — Ã, i'u'ẽne hã huri aba. Ã hã ĩhâiba, te wasu'u.

Luca 22:19

I'u'ẽne hã ma duré ti'â. 'Re ihâimana u'âsi mono ãma te duré iré ãma tiwata, sõpru wa. Taha pari, ma tô te te wẽ'ẽ, i'u'ẽne hã. Te te wẽ'ẽi mono parimhã, ma tô te te tãma sõmri, tisiré 're inomro mono norĩ ma. Te duré tãma nharĩ za'ra, ãne: — Ã, i'u'ẽne hã huri aba. Ã hã ĩhâiba, te wasu'u, za asada ĩsisõmri aba zé. Ã hã te za 're ihuri aba mo, ĩ'ãma 're asipo're pu'u u'âsi za'ra wa'aba mono zéb da hã.

Luca 9:16

Tawamhã i'u'ẽtẽ wapu hã ma oto waibu Zezusi hã, 5 na ihâiba hã. Pe'a ma duré timra. Hâiwa u te iré rob'madâ, timama ãma wata da, sõpru wa. Taha pari, ma tô te te wẽ'ẽ, i'u'ẽtẽ wapu hã. Pe'a zama, ma tô duré te te wẽ'ẽ. Ma tô te te tãma sõmri oto, tisiré 're inomro mono norĩ ma, te te dama sõmri mono da hã.

Roma 14:6

Ta norĩ hã nimahã bâdâ hã romhuri'õzé hã dama 're ipire za'ra mono zém na te te si'ãma 're irosa'rata za'ra mono norĩ hã, Wanhib'apito ãma 're wata za'ra mono da, te ãne te te 're 'manharĩ za'ra. Duré ni'wam norĩ hã uburé siwa'ru romnhi te te 're ihuri mono norĩ hã te ãne te te 're 'manharĩ za'ra, Wanhib'apito 'Re ihâimana u'âsi mono ãma 're wata za'ra mono da, dasa na dama 're sõpru mono wa. Duré ni'wam norĩ hã romnhi na dame 're isaihuri mono õ norĩ hã, te ãne duré te te 're 'manharĩ za'ra aiwa, 'Re ihâimana u'âsi mono ãma 're wata za'ra mono da, waihu'u pese wa, duré sõprub uptabi wa.

1 Corĩtu 10:16

Zezusi hã wazada idâ'âzém na 're iwasipo're pu'u za'ra mono zéb da, wasiré 're wasi'rã'õtõ mono wa, 'Re ihâimana u'âsi mono ãma 're wawata za'ra mono pari, wa za hâsizém na uwa 'rãi wa'u isé hã wa te 're âhuri. Ãne hã wasiré, wa te 're âhuri mono wamhã, Cristuhu wi iwapru hã tiwi pu'u wa, wazada idâ'âzéb zarina, te rowẽzé hã wahâiba mono bâ wama 're hâimana za'ra. Duré i'u'ẽne hã wasiré, wa te 're huri mono da, wa te wasima 're wẽ'ẽ za'ra mono wamhã, Cristu hã da te dasiwi hâibapru wa, wazada idâ'âzéb zarina, te duré wahâiba mono bâ rowẽzé hã wama 're hâimana za'ra.

1 Corĩtu 11:23

Duréihã Wanhib'apito te te ĩma iwaihu'uzém na, wa tô ãne na aima waihu'u pari za'ra wa'wa: Zuda hã Zezusi te te dama ihâiba nhomrizém na, tô taha bara na ma tô Wanhib'apito Zezusi hã i'u'ẽne hã ti'â.

1 Samuéu 9:13

Tawamhã 'ri nho'õmo u azasi aba wi, te za isõpẽtẽ 'wa, sa da, sõ'a na zahadu morĩ õ ré, ẽtẽ nhisi u hã. Duré zahadu datẽme wisi õ ré, dasa na da te sãna'rata za'ra õ di. E tihai wa. Imorĩ'rata na za a'â danhimizama zata na 'Re ihâimana u'âsi mono ma, mreme wa. Taha parip si te za tisaihu, sô idahãsi norĩ hã. Tahawa, sa'ẽtẽ anep su'u aba, sõpẽtẽ aba hâ.