Luca 20:13 - ꞌRe Ihâimana Uꞌâsi Mono Zadawa Wasuꞌu

¹³ Tahawa, te 'râwi sima tinha, buru tede'wa hã, ãne: “E marĩ, wa za 'manha. Ãté ĩ'ra hã wa za oto satõ, buru 'madâ'â'wa norĩ u hã, ĩma sawi pese nherẽ, ĩ'ra hã. Ĩburu u te satõrĩ wamhã, ãté te za siwi hâiba wazé.” Ãne te 'râwi sima tinha, buru tede'wa hã. Tawamhã ti'ra si'aibâ hã te oto satõ, tiburu u.

Luca 20:13 ပူးပေါင်းရင်းမြစ်များ

Mateu 17:5

Tawamhã ãne Pedru te te tãma nharĩ ré, ma tô hâiwa nhirõno hã we hâiba zuwa za'ra, Zezusi norĩ hã. Tawamhã hâiwa nhirõtõ zarob'a hawi, ma tô 'Re ihâimana u'âsi mono hã mre, ãne: — Ã hã ĩ'ra, te 're isawi pese mono. Tãma 're ĩto za'ẽtẽ mono di. Ma'ãpé isimiroti hã 're wapari pese za'ra wa'aba mono za.

Mateu 3:17

Tawamhã hâiwa hawi te we tinha ãne: — Ã hã ĩ'ra. Ĩma sawi uptabi di. Tãma ĩto za'ẽtẽ uptabi di. — Ãne te we tinha, Imama hã.

Luca 18:2

— Aibâ hã te 're hâimana, 'ri nho'õmo ãma, da'ãma rowairébé'wa hã. 'Re ihâimana u'âsi mono nhimiroti 'madâ'â'õ'wa ta hã, duré danhimiroti na zama isimiwazéb õ.

Luca 18:4

— Tane nherẽ, duréi nherẽ, te te pawaptob õ di. Tawamhã itẽme 're neb u'âsi mono wa, te oto 'râwi sima tinha, da'ãma rowairébé'wa hã, ãne: “Wa hã 'Re ihâimana u'âsi mono nhimiroti, te 'madâ'â õ nherẽ, duré danhimiroti na ĩnhimiwazéb õ nherẽ, te te sina ĩwa'a wa, wa za oto tãma rowairébé, marĩ te te sima iwẽ na. Te tãma rowairébé õ wamhã, ĩtẽme 're neb u'âsi mono wamhã, te za te te 're ĩwasutu u'âsi, timreme na. Ãne õ'umnhasite, wa za oto pawapto.” Ãne te sima tinha, tipẽ'ẽ na.

Luca 20:12

Iwa'rãmi ma tô duré sô 'mazatõ, buru tede'wa hã. Si'ubdatõ oto te te isatõrĩ za'ra zé hã. Tazahã, buru u wisi wamhã, ma duré siwi azâ. Ma siwi u'a. Buru hawi, te duré siwi satõ apâ.

Luca 20:14

— Tawamhã buru u oto morĩ wamhã, buru 'madâ'â'wa norĩ hã ma tô romhâ ré sima sãmri za'ra. Tahawa, te sima 'mahârâ za'ra, ãne: “Õhõta buru tede'wai 'ra hã te wei mo, timama uirĩ na buru tede'wa da hã. Oto wa te wasiwi wĩrĩ aba, buru hã wate za'ra da oto.”

Luca 9:35

Hâiwa nhirõtõ hawi, te we 'Re ihâimana u'âsi mono hã tãma nharĩ za'ra, ãne: — Ã hã ĩ'ra, te ipisudu. Ma'ãpé isimiroti hã 're wapari pese za'ra wa'aba mono za.

Zuwã 1:34

Wa hã wa tô ãma 'madâ. Tô sena, wa aima rowasu'u za'ra wa'wa. Õ hã, 'Re ihâimana u'âsi mono 'ra.

Roma 8:3

'Re ihâimana u'âsi mono nhimiroti 'rata na Mozési te te irob'ui'érézé hã wa te 're i'madâ'â pese za'ra mono zéb zarina, te te sima wa'ãma 're aroti mono õ di za 'Re ihâimana u'âsi mono hã, wawasédé hã te te oto wa'ãma 're ab'madâ'â tõ mono da, taha zarina te te oto 're wa'awẽsãmri mono da. E marĩ wa. Wawasété u'âsi wahâimanazém hawi, wanhib'uware na 're wanomro u'âsi mono wa. Tahawa, wa te wasina 're uwaimrami waihu'u za'ra mono õ di, 'Re ihâimana u'âsi mono nhimiroti 'rata na rob'ui'éré hã. Wawasété si, wa te 're i'manharĩ za'ra mono zé hã ma tô te te siwi 're awẽ'õ pese, 'Re ihâimana u'âsi mono hã. Tahawa, ma tô ti'ra hã we satõ ti'ai u, da'upana dazada dâ'â da, dawasété u'âsi 're idahâimana za'ra mono zém hawi, te te 're da'anho'reptui mono da. Ti'ai ãma dahâiba na ma tô 're mo, Cristu hã. Tane nherẽ, dasine ti'ai ãma hã tiwasédé hã te te 're ab'manharĩ mono õ di, tihâiba na hã.

Galata 4:4

Tawamhã bâdâ oto iwa waptã'ã wamhã, 'Re ihâimana u'âsi mono hã ti'ra ãma te te irotizéb zarina, ti'ai u we te te isatõrĩ da hã. We te te satõrĩ wamhã, ma tô pi'õi ma i'ra hã tãma podo oto, zudeu na. Zudeu na poto wa, pire na ma tô tãma 're hâimana, 'Re ihâimana u'âsi mono nhimiroti hã, Mozésihi ma te te 're i'awaihu'u mono hã.