Luca 2:34 - ꞌRe Ihâimana Uꞌâsi Mono Zadawa Wasuꞌu

^34-35 Tawamhã Simiã hã te tiwi rowaptẽ, 'Re ihâimana u'âsi mono wi, te te 're pawaptob zahuré mono da. Mariaha ma, te duré tinha: — 'Re ihâimana u'âsi mono, ma tô ai'ra hã pisutu, watẽme wei morĩ da, Izaraéu na warom nhisi u. Tawamhã watẽme wei morĩ wa, te za da'ahâ na danho'reptuzé hã da te dasina 're waihu'u za'ra. Tane nherẽ, da'ahâ na danho'reptuzé hã da te dasina 're waihu'u za'ra mono õ di za. Danho'reptui'wa na da te dasina 're waihu'u za'ra mono da, te te pisutu nherẽ, niwapsi te za ai'ra hã dasiwi wẽ'õ ni, da'ahâ na. Tawamhã da te dasiwi wẽ'õ wamhã, dama waihu'u pese di za oto, danhimirosa'rata wasédé hã ai'ra ãma hã. Sib'ézé i'wa pese na, da te 're danhihâri za'ra mono wamhã, dama 're rowẽ za'ra mono õ di za. Tane ai'ra hã da te dasiwi wẽ'õ wamhã, aipẽ'ẽzé ahâ di za.

Luca 2:34 ပူးပေါင်းရင်းမြစ်များ

Zenezi 14:19

Tawamhã Mequizédéqui, Abrãhã ma, iwẽ te te tãma pisutu sina, ma tô ãne tãma tinha: “Abrã, 'Re ihâimana u'âsi mono, danhipai u 're ihâimana mono, hâiwa 'manhari'wa hã, duré ti'ai 'manharĩ'wa hã iwẽ si te te aima 're pisutu mono da, wa tiwi te 're waptẽrẽ.

Zenezi 47:7

Taha parip si te Zuzé, timama Zaco hã saprõ, apito u, te te tãma hâiba waihu'u da. Tahawa, Zaco, apito tãma wazéb sina te te sawi parimhã,

Mateu 11:19

Duré ti'ai ãma Dasiré Ipodo hã te to sina dasiré 're sa, mram na. Uwa 'rãi wa'u isé hã te duré dame te te 're hâsi. Tahawa, ma tô ãne na da te tãma 're nharĩ wasété za'ra: “Ma'ãpé 'madâ'â za'ra wa'aba. Õhõta te aibâ hã sa za'ẽtẽ na 're sai u'âsi. Ta hã uwa 'rãi wa'u zei'wa duré. Rob'uiprazé arĩ ubumroi'wa norĩ siwadi ta hã, uburé siwa'ru 're idanomro mono norĩ siwadi.” Ãne ma tô da te tãma 're nharĩ wasété za'ra. Ni'wam norĩ hã 'Re ihâimana u'âsi mono nhimiroti zarina 're nomro mono wamhã, te za marĩ iwẽ si te te 're 'manharĩ u'âsi za'ra. Ãne wa, te za iwaihu'u pese za'ra wa'wa, tô sena 'Re ihâimana u'âsi mono nhimiroti iwẽ uptabi na hã.

Mateu 12:46

Tawamhã Zezusi hã te te dama rowasu'u ré, ma tô ino norĩ hã itẽme aihutu, tina norĩ me. Tawamhã rowi simasa wa, ma tô siwi da'maipo're pu'u, Zezusihi ma, da te 'mairowasu'u da, rob u itẽme hã watobro za'ra da.

Mateu 21:44

Duré, ẽtẽ tomhâpâ nhisiwi, zé'a 'manharĩ hã 're rere'e mono wa, 're isipru pese za'ra mono ne, te za ĩwẽ'õ'wa norĩ hã hâ za'ra, 'Re ihâimana u'âsi mono hã. Duré ẽtẽ tomhâbâ hã zé'a 'manharĩ nhisiwi 're rere'e mono wa, te te 're ipru pese za'ra mono ne, te za 'Re ihâimana u'âsi mono wẽ'õ'wa norĩ si hâ za'ra. Ta norĩ ãma hã 're sib'a'uwẽ za'ra mono õ di za. — Ãne ma tô Zezusi hã sina ãma simiré'é, ẽtẽ wasu'u na hã.

Mateu 27:63

Itẽme si'rã'õtõ wamhã, ãne te tãma nharĩ za'ra: — Apito, õ hã isadawa nhipe hã zahadu 're morĩ ré, dama 're isiwasu'u mono zém na wa tô ãma wapo're pu'u za'ra ni, ãhã na hã. Ãne te dama 're siwasu'u: “Bâdâ si'ubdatõ ĩ'ãma si'utõrĩ õ ré, wa za apâ hâiwa'udu.” Ãne dama 're isiwasu'u mono zé hã.

Zuwã 3:20

Ni'wam norĩ hã 're nomro wasété u'âsi mono wamhã, te za 're imorĩ wẽ uptabi hã te te 're 'ruiwapari za'ra, rowa'a iwẽ hã. Tawamhã itẽme 're nomro mono õ di za, isimirosa'rata wasété na te te 're awaihu'u mono wa, 're siséb za'ra mono õ'umnhasite.

Zuwã 5:18

Tahawa, te ãma sima roti za'ra, te te siwi wĩrĩ da, romhuri zahârizé hã isimiroti za'ra zarina, te te 'madâ'â õ wa, duré 'Re ihâimana u'âsi mono hã Timama na te te wasu'u wa, aiwa iwaihu'u pese zahuré na hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 13:45

Tane nherẽ, da'ahâ na idasi'rã'õno hã zudeu norĩ hã te te da'madâ'â za'ra wamhã, ma tô da'ruiwapari za'ra. Tawamhã Pauluhu mreme hã ma tô dawi wẽ'õ za'ra, zudeu norĩ hã. Tahawa, timreme na ma tô nasi ãma tãma wa'rãmi za'ra, Pauluhu mreme wa'rãmi. Ma tô duré ãma tiwa'ẽ za'ra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 17:6

Tane nherẽ, oto sô sisisi wamhã, robaba zahuré di, Paulu norĩ hã. Te te sa'rese za'ra õ di. Tahawa, Zasã norĩ hã ma tô Paulu norĩ upana dasiwi waibu ni, isiré isazei'wa norĩ me. Tawamhã dama ipire norĩ nho're u ma tô te te simro. Tawamhã mreme 'rãihâ na te 'mahârâ za'ra, isaprõni'wa norĩ hã, ãne: — Õ hã, aibâ norĩ hã daro mono bâ, 're idahâimana za'ra mono zém na ma tô ãma dawi saprĩ za'ra. Ma tô dawi ro'wa'rutu za'ra. Ãhã na ma tô duré we aimasisi, waza'ru u.

Zezusihi zadawa wasuꞌuꞌwa norĩ nhimiromhuri na robꞌuiꞌéré 24:5

Õ hã aibâ hã wa tô waihu'u za'ra ni, timreme na daré ro'wa'rutu'wa na hã. Duré daro mono bâ zudeu norĩ hã te te iropéi mono tẽme 're morĩ wamhã, ma tô te te da'ãma 're aro'wa'rutu. Duré nazarenu na dasina dasipo'ozém nhisi niwĩ, 're inomro mono ma hã pire di, õ hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 28:22

Tane nherẽ, wa tô wasima aiwẽ za'ra ni, asimirosa'rada hã wa te wapari za'ra da, duré wa te waihu'u za'ra da. A hã dasima idasipo'ozép tém niwĩ, te 're aihâimana mo. Ta niwĩ 're idahâimana za'ra mono hã, te iwasété na da te dasima 're rowasu'u za'ra, daro mono bâ. Ãne hã wa te waihu'u za'ra wa, wa tô wasima aiwẽ za'ra ni, wa te aiwapari za'ra da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 4:26

Roti'wa norĩ hã te sada aimasa. Isadawa para da'uwati'wa norĩ me, ma sada atob za'ra, Wanhib'apito 'Re ihâimana u'âsi mono zada, duré Danho'reptui'wa da, te te ipisutu zada.”

Zezusihi zadawa wasuꞌuꞌwa norĩ nhimiromhuri na robꞌuiꞌéré 6:7

Tawamhã 'Re ihâimana u'âsi mono zadawa wasu'u hã ma tô duré te te ropé, 'ri baba. Zezusihi nhirã zarina 're inomro mono norĩ hã ma tô sina hâ, Zeruzalẽ ãma hã. Sasedoti norĩ hã ahâ na ma tô duré Zezusi hã saze za'ra oto.

Roma 9:32

E marĩ wa, te te sina tãma 're uwaimrami za'ra mono õ di. 'Re ihâimana u'âsi mono te te 're isazei pese za'ra mono zém na si, te te 're iwẽsãmri za'ra mono zéb da hã, 're si'madâ'â za'ra mono õ wa, 'Re ihâimana u'âsi mono nhimiroti 'rata na rob'ui'éré na si 're si'madâ'â ze za'ra mono wa. Cristuhu ãma, wa za oto ẽne hã aima ãma simiré'é za'ra wa'wa. Ẽtẽ tõmo wawẽ hã bâdâdi wa, 're sa'wari mono wa, te za te te 're da'marõpãrĩ za'ra. Tahawa, te za 're dasirẽme za'ra. Tane duré, zudeu norĩ hã ma tô Cristu te te siwi 're iwẽ'õ za'ra mono zém na si'uihâ na sima 're simiza'repese za'ra, wedepo'o nhonhi'rãmi na dazada idâ'âzé hã taré newa, Cristu hã da te 're isaze za'ra mono zém na, 'Re ihâimana u'âsi mono te te 're ida'anho'reptui mono õ newa.

1 Corĩtu 1:23

Tane nherẽ, wa norĩ hã Cristu, wedepo'o nhonhi'rãmi na dazada idâ'âzé wasu'u si, wa tô wa te dama 're wasu'u za'ra. Tane nherẽ, ma tô taha wasu'uwẽ hã zudeu norĩ hã te te siwi 're wẽ'õ za'ra. Zudeu'õ norĩ zama ma tô duré te te sima ãma 're rosa'rata upai u'âsi za'ra, taré newa, marĩ da ihâimana õ newa, iwasu'uwẽ hã.

Hebreu 7:1

Ta hã Mequizédéqui hã Salẽ na 'ri nho'õmo nhisi ãma danhib'apito, ma tô dama 're hâimana. Sasedoti na te duré dama 're hâimana, 'Re ihâimana u'âsi mono ma, da'ãma romhuri'wa na. Danhipai u dama pire uptabi na 're ihâimana mono ma, romhuri'wa na te 're hâimana. Duréihã Abra'ã norĩ hã, danhib'apito norĩ, maparane si'uiwa na te te ãma ai'uté za'ra pari, apâ si'aba'réi ré, ma tô sõpẽtẽ Mequizédéqui hã, Abra'ã hã. Tahawa, ma tô mreme pire na Mequizédéqui hã ãma mre, 'Re ihâimana u'âsi mono ma, marĩ hã iwẽ si te te tãma 're apisutu mono da, Abra'ãhã ma hã.

Hebreu 7:7

'Re ihâimana u'âsi mono hã iwẽ hã te te dama 're apisutu mono da, ni'wa hã da'ãma mreme wamhã, ta hã pire na dama 're ihâimana mono. Ãne hã wama waihu'u pese za'ra di. Tahawa, wa za ãne na ãma waihu'u za'ra ni, Mequizédéqui hã Abra'ãhã ma, pire na 're ihâimana mono zém na hã.

1 Pedru 4:14

Ãté Cristuhu ãma si 're aihâimana za'ra wa'aba mono 'ru te, te za da te aima 're nharĩ wasété za'ra wa'wa. Tane nherẽ, aima 're rowẽ za'ra wa'aba mono di za. E marĩ wa. 'Re ihâimana u'âsi mono pẽ'ẽzani hã aipẽ'ẽ 're aima 're hâimana za'ra wa'aba mono wa oto, rowẽ uptabi zé hã.

1 Samuéu 2:20

Tawamhã Eri hã, Eucana norĩ ãma imro me ma tô iwẽ na te te ãma 're rowaptẽrẽ zahuré, 'Re ihâimana u'âsi mono wi. Ãne ma tô te te tãma 're rowasu'u zahuré: — Wa aima wẽ wa'wa, Uburé Danhib'apito hã te te aima sõmri aba da hã, ai'ra norĩ hâiba amo hã, 'Re ihâimana u'âsi mono ma isõmri aba nhowa're'reb da hã. Tawamhã taha parip si, ma tô apâ 're neb zahuré, tinhorõwa u hã.