Luca 2:11 - ꞌRe Ihâimana Uꞌâsi Mono Zadawa Wasuꞌu

¹¹ Ã bâtâ na ma tô waptãrã Belẽ ãma, danho'reptui'wa da hã, Dawihi za'rui ãma. Ta hã 'Re ihâimana u'âsi mono te te ipisudu, Danho'reptui'wa da, uburé Danhib'apito da hã.

Luca 2:11 ပူးပေါင်းရင်းမြစ်များ

Zenezi 3:15

Wa za duré aima pisutu 'wa, asi'rui wa'aba na asisada 're aihâimana aba mono da hã. Tawamhã ãne zarina te za asihudu norĩ wa'aba zama si'ru na hã sisada 're hâimana za'ra. Ãhã pi'õ nhihudu norĩ hã te za zahadu wapsi siwi ai'rãihâpâ. Tawamhã a hã te za duré pi'õ nhihudu norĩ hã ipara na'rata wi hã 're i'ahâzu mo.

Zenezi 49:10

Zuda, apito siwazusizé hã te za te te 're tété. Duré isihudu norĩ hã te za õne u'â dama i'rãnho'õmo na dama 're hâimana za'ra. Te za danhoprubzé hã da te tãma 're 'wasari, daro mono bâ. Tawamhã te za duré isimiroti hã da te 're wapari pese za'ra.

Salmu 2:2

Ti'ai ãma isib'apito norĩ hã, duré dama i'rãnho'õmo norĩ hã te Uburé Danhib'apito zada te te sima 're rowa'õtõ za'ra, duré za apito te te ipisutu da zama.

Mateu 1:16

Zaco hã Zuzéhé mama. Zuzé hã Mariaha mro. Ta hawi Zezusi hã ipodo, Cristu na da te 're isisi za'ra mono.

Mateu 1:21

I'ra hã 'watébrémi na te za tãma podo. Tawamhã Zezusi na te za isisi. Danho'reptui'wa te wasu'u, isisi hã. Taha si te za tinhib'a'uwẽ hã te te 're anho'reptu, iwasété hawi, duré 'Re ihâimana u'âsi mono te te 're idahâ za'ra mono zém hawi.

Mateu 16:16

Tawamhã Sima Pedru ma te ãne asa ãma sada'â: — A hã Cristu, 'Re ihâimana u'âsi mono te te i'aipisudu, Danho'reptui'wa da. A hã 'Re ihâimana u'âsi mono 'ra.

Mateu 16:20

Tahawa, Zezusi hã ma tô sina sadawa uwati za'ra, tisiré 're inomro mono norĩ hã, te te dama wasu'u tõ za'ra da a'â, Danho'reptui'wa na 'Re ihâimana u'âsi mono te te ipisutu na hã.

Luca 1:43

Duré a hã Wanhib'apito na te za 're aimo. Tahawa, ĩma aipire di. Tane nherẽ, asisawi õ di, we ĩtẽme aimorĩ tõ da. Tahawa, ĩma rowẽ di.

Luca 1:69

Ma tô we oto watẽme satõ iwaihu'u pe hã, Wanho'reptui'wa da hã, apito Dawihi nhihudu hã. Tãma iromhuri'wa, Dawi hã.

Luca 2:26

'Re ihâimana u'âsi mono pẽ'ẽzani ré, te 're mo, Simiã hã. Ipẽ'ẽzani hã ma tô tãma ropisutu, ãne: “Atâ'â õ ré, te za Danho'reptui'wa da hã isabu, 'Re ihâimana u'âsi mono te te ipisudu hã.” Ãne ma tô Simiãhã ma waihu'u siro.

Luca 2:4

Tahawa, Zuzé hã te mo, tihi'rata za'ru u. Apito Dawi hã ihi'rata wa, tihi'rata za'ru u te mo, Belẽ u. Zudéa ãma, Belẽ hã. Nazaré hawi te mo, Belẽ u. Galiléa ãma, Nazaré hã.

Zuwã 1:41

Tawamhã tidub'rata zô te mo, Ãdré hã. Te te sãmri wamhã, ãne te tãma rowasu'u: — Danho'reptui'wa hã wa tô sõpẽtẽ ni, 'Re ihâimana u'âsi mono te te ipisudu hã. Danho'reptui'wa hã ta hã “Cristu”, damreme amo na hã.

Zuwã 1:45

Tawamhã Filipi te Natãnaéhé zô hã rĩtĩ. Te te oto sõpẽtẽ wamhã, ãne te tãma tinha: — Aibâ hã wa tô wasiwi 'madâ'â ni, wahi'rada Mozési te te ãma irob'ui'éré siro hã romhâ ré, 'Re ihâimana u'âsi mono zadawa 'mahârâ 'rata 'wa norĩ zama isa'u te te ãma irob'ui'éré za'ra hã. Ta hã Zezusi, Nazaré hawi we imorĩ, Zuzéhé 'ra hã.

Zuwã 11:27

Tawamhã Marta ma asa ãma tãma wa'rã ãne: — Ĩhe. Tô sena, wa aimreme hã saze. A hã Danho'reptui'wa da, 'Re ihâimana u'âsi mono te te i'aipisudu. A hã 'Re ihâimana u'âsi mono 'ra. Wahi'rata norĩ hã asô 're isimipari za'ra mono, a hã, ti'ai u we aimorĩ da hã.

Zuwã 20:31

Danho'reptui'wa da, 'Re ihâimana u'âsi mono te te ipisutu na, Zezusihi si 're saze za'ra wa'aba mono da, duré 'Re ihâimana u'âsi mono 'ra na 're saze za'ra wa'aba mono da, ma tô rob'ui'éré'wa hã ãne na ãma romnhihâtâ. E marĩ da, te za Zezusihi si asina 're i'umnhasi za'ra wa'aba mo. Rowẽ u'âsi ãma 're anomro aba mono da, duré 're atâ'â za'ra wa'aba mono ãna 're aihâimana u'âsi za'ra wa'aba mono da, 'Re ihâimana u'âsi mono 'rata, hâiwa ãma. Taha da, te za Zezusihi si asina 're i'umnhasi za'ra wa'aba mo.

Zuwã 4:25

Tawamhã pi'õ te duré tãma tinha, ãne: — Niwapsi te za we datẽme wi, Danho'reptui'wa da, 'Re ihâimana u'âsi mono te te ipisudu hã, Cristu na da te 're isisi za'ra mono hã. Wei wisi wapsi, te za uburé 'Re ihâimana u'âsi mono nhimiroti hã te te wama 're awaihu'u, wa te 're waihu'u za'ra mono da. Ãne na hã ĩma waihu'u pese di, iwasu'u hã.

Zuwã 4:42

Tawamhã te ãne pi'õi ma nharĩ za'ra, pi'õ nhimirowasu'u wapari'wa norĩ hã: — Asimirowasu'u hã wa te wapari za'ra wa, wa tô saze za'ra ni. Ãhã na wasi'uihâ na wa tô imreme hã wapari za'ra ni. Tahawa, wa oto waihu'u za'ra ni, õ hã Danho'reptui'wa te 're mo.

Zuwã 6:69

'Re ihâimana u'âsi mono, ma tô we asatõ. Wa norĩ hã wa tô asaze za'ra ni. A hã 're aimorĩ wẽ uptabi di. Ãne na wa tô aiwaihu'u za'ra ni.

Zuwã 7:41

Ni'wam norĩ hã te duré dama nharĩ za'ra, ãne: — Õ hã Danho'reptui'wa da, 'Re ihâimana u'âsi mono te te ipisudu. Ni'wam norĩ hã te duré dama ãma nharĩ za'ra, ãne: — Oro õ hã Galiléa hawi wei morĩ za. Danho'reptui'wa da, 'Re ihâimana u'âsi mono te te ipisudu hã Galiléa hawi wei morĩ õ di za.

Zezusihi zadawa wasuꞌuꞌwa norĩ nhimiromhuri na robꞌuiꞌéré 10:36

'Re ihâimana u'âsi mono zadawa wasu'u hã ma tô iwaihu'u za'ra wa'wa. Tizadawa wasu'u hã ma tô wama waihu'u za'ra, wasiré Izaraéu nhihudu norĩ ma. Zezu Cristu hã ma tô watẽme satõrĩ za'ra, te te wama rowasu'u za'ra da, 'Re ihâimana u'âsi mono ãma rowẽ na 're idanomro mono zém na hã. Zezu Cristu hã, uburé Danhib'apito uptabi. Taha wasu'u ma tô iwaihu'u za'ra wa'wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 13:23

Dawihi nhihudu uwaibaba, ma tô 'Re ihâimana u'âsi mono hã pisutu Zezusi hã, Izaraéu nhihudu norĩ nho'reptui'wa da hã. Wahi'rata norĩ ma, te te iropisutuzéb zarina, ma tô pisutu.

Zezusihi zadawa wasuꞌuꞌwa norĩ nhimiromhuri na robꞌuiꞌéré 17:3

Ãne ma tô dama rob'rãzarõtõ: — “Cristu hã Danho'reptui'wa da, 'Re ihâimana u'âsi mono te te wama ipisudu hã te za robzépata. Te za duré dârâ. Dâ'â uptabi nherẽ, te za apâ hâiwa'udu.” Ãne te wama ãma rowasu'u, irob'ui'éré 'rata na hã. Zezusi hã te aima iwasu'u za'ra wa'wa hã wa tô waihu'u pese za'ra ni, tô õ hã Cristu, 'Re ihâimana u'âsi mono te te wama ipisudu, Danho'reptui'wa da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:36

Tahawa, wa hã wa aima rowasu'u za'ra wa'wa, waihu'u pese za'ra wa'aba da oto, duré uburé wasiré Izaraéu nhihudu norĩ te te waihu'u pese za'ra da. Zezusi hã da te dasiwi sasõmri da, dama i'ru za'ra wa'wa hã, ta hã 'Re ihâimana u'âsi mono te te ipisudu, uburé Danhib'apito da hã, duré uburé Danho'reptui'wa da hã. Ma'ãpé ãhã wasu'u hã tô sena na waihu'u pese za'ra wa'aba.

Zezusihi zadawa wasuꞌuꞌwa norĩ nhimiromhuri na robꞌuiꞌéré 5:31

Ta hã ma tô 'Re ihâimana u'âsi mono hã ti'â apâ, isimire niwĩ 're sãmra u'âsi mono da oto, dama pire na 're hâimana mono da, duré tiwaihu'u pese zarina te te 're da'anho'reptui mono da. Tahawa, te za te te 're wapawaptob za'ra, wasiré Izaraéu nhihudu mono bâ, wawasédé hã wa te 're rẽme za'ra mono wa, te te wama 're apari mono da.

1 Corĩtu 15:47

Duréihã te te dama i'manharĩ 'rada hã aibâ na ma tô ti'a na 'manha, 'Re ihâimana u'âsi mono hã. Tane nherẽ, taha uirĩ na si, ma tô aibâ aimawi hã wei mo hâiwa hawimhã, ti'ai u, Adãhã ma ipire uptabi hã, duré iwẽ uptabi hã.

Filipu 3:8

'Re ihâimana u'âsi mono te te ĩwẽsãmri da, uburé marĩ hã ĩsihawim na te 're i'ab'manharĩ mono zé hã taré uptabi oto ĩma hã. Misi te ipire uptabi hã ĩma 're hâimana oto. Ĩnhib'apito, Cristu Zezusi hã 'râwi te iwaihu'u pese da si, te ĩma 're hâimana oto, taha si. Marĩ zô 're ĩnhimipari mono õ di oto, ta hã ĩma tarére wa. Roprum ne, te ta hã ĩma 're hâimana oto, 're ĩhâimana 'rata mono zé hã. Tahawa, Cristuhu niwĩ ĩhâiba na te isaprĩ wẽ da si, wa 're ĩsi'madâ'â wẽ u'âsi.

Colosu 2:6

Tahawa, Cristu Zezusi hã Asib'apito za'ra wa'aba na 're saze za'ra wa'aba mono wa, ma'ãpé simisutu isiré ãma 're aihâimana u'âsi za'ra wa'aba mono za, 'râwi.

1 Zuwã 4:14

Wamama hã ma tô ti'ra hã we satõ, Danho'reptui'wa da. Ta hã wa tô wa te 're 'madâ'â za'ra, watõmo na. Ãhã na wa oto wa te dama 're wasu'u za'ra, Danho'reptui'wa na, i'ra hã.

1 Zuwã 5:1

Ni'wam norĩ hã, Zezu Cristu, Danho'reptui'wa da, 'Re ihâimana u'âsi mono te te ipisutu na te te 're sazei pese za'ra mono wamhã, ta norĩ si te 'Re ihâimana u'âsi mono 'ra, 're hâimana za'ra. Ni'wa hã aibâ hã wama sawi pese za'ra wamhã, taha u'âbâ, wa za duré i'ra norĩ hã wa te 're sawi pese za'ra.