Luca 18:43 - ꞌRe Ihâimana Uꞌâsi Mono Zadawa Wasuꞌu

⁴³ Tawamhã awa'awi ma tô rob'madâ'â wẽ, aibâ hã. Zezusihi siré te oto mo, 'Re ihâimana u'âsi mono ãma, wata sina. Uburé, ãma i'madâ'â'wa norĩ zama, te 'Re ihâimana u'âsi mono ãma tiwata za'ra. Ãne Zezusi, itob'a te te ito pesezé wasu'u hã.

Luca 18:43 ပူးပေါင်းရင်းမြစ်များ

Mateu 11:5

Itob'a norĩ hã to pese za'ra wa, ma tô apâ te te 're rob'madâ'â za'ra. Imorĩ'õ norĩ hã te duré oto para na 're nomro. Duré i'wa're ré norĩ hã ma tô 're pese za'ra. Tahawa te oto duré hâiba wẽ na hã 're nomro. Duré ipo'reptõ norĩ hã te oto po're 'repu'u wa 're simipari za'ra. Duré 're idâ'â za'ra mono norĩ hã ma tô duré apâ 're hâiwa'utu za'ra. Ĩwasu'uwẽ hã ma tô duré isibrob'õ norĩ hã te te 're wapari za'ra. Ãne na te za tãma irowasu'u za'ra wa'wa, Zuwãhã ma.

Mateu 21:14

Tawamhã Zezusi hã 'Re ihâimana u'âsi mono nhorõwa ãma 'ri 'wawi wa'ra 're, zahadu sãmra ré, ma tô da'ahâ na itẽme dasito, itob'a norĩ hã, duré imorĩ waihu'u'õ norĩ zama. Itẽme dasito mono wamhã, ma tô da'apese, uburé ihâzé ré norĩ hã.

Mateu 9:8

Tawamhã ãne hã da te 'madâ'â za'ra wamhã, ma tô tãma tapẽ'ẽwara za'ra ni, dama sa'rese õ wa. Ma tô duré 'Re ihâimana u'âsi mono ãma tawata za'ra ni, tiwaihu'u pe hã te te dama 're anhomri mono wa.

Luca 13:17

Tawamhã Zezusihi mreme hã te te wapari za'ra wamhã, ma tô iwẽ'õ'wa norĩ hã aséb za'ra, Zezusihi mreme ma. Iwẽ'wa norĩ ma, rowẽ za'ra di. Marĩ hã te te dama 're ab'manharĩ wẽ mono wa, te 're to za'ra, tipẽ'ẽ na.

Luca 19:37

Tawamhã ma tô rob'umhutu, Zeruzalẽ u hã. Oriwera na te za oto si'ra, Zeruzalẽ u wisi da. Tamomo, te da'ahâ na Zezusihi zarina ai'aba'ré ni, isazei'wa norĩ hã. Ma tô te te ãma 're 'madâ'â za'ra aré, Zezusi te te 're ida'apawapto mono zém na, tiwaihu'u pese uptabi na. Tahawa, te oto damreme 'rãihâ na dasima nharĩ za'ra ni, ãne: — Uburé Danhib'apito te we oto mo, 'Re ihâimana u'âsi mono zadawa para. Tãma 're rowẽ za'ẽtẽ mono di za. Rowẽ hã hâiwa ãma 're isa'wari u'âsi mono da si, wa wasima wẽ za'ra ni.

Luca 4:39

Tahawa, isimiwaptâ u hã te itẽme mo. I'rata te za. Tawamhã iwa'ro ma, te tinha, wahâ da. Tahawa, ma tô tiwahâ. Awa'awi ma tô wahudu. Wahutu wamhã, ma tô tãma api za'ra, saihuri da hã.

Luca 5:26

Tawamhã uburé ma tô ãma tatob'uzu za'ra ni. 'Re ihâimana u'âsi mono ãma, te duré ãhã wamhã tawata za'ra ni. Ãne te dasima nharĩ za'ra ni: — Aibâ te te ipesezé hã, wẽ uptabi di. Ãhã na, wa tô wasiwi 'madâ'â za'ra ni.

Luca 9:43

Tahawa, ma ãma tatob'uzu za'ra ni, waihu'u pese uptabi wa, 'Re ihâimana u'âsi mono hã. Zezusi te te 're ida'apese mono zém na, ãma datob'uzu za'ra ré, te tisiré 're inomro mono norĩ ma Zezusi hã tinha, ãne:

Zezusihi zadawa wasuꞌuꞌwa norĩ nhimiromhuri na robꞌuiꞌéré 11:18

Ãne hã te te wapari za'ra wamhã, asa te te tãma nharĩ waihu'u za'ra õ di oto. Tahawa, ma tô ãma tiwata za'ra, 'Re ihâimana u'âsi mono ãma. Tawamhã te oto sima rowasu'u za'ra, ãne: — 'Re ihâimana u'âsi mono hã ma tô zudeu'õ norĩ zama pisutu za'ra, tiwasété wi 're sipizari za'ra mono da, 'Re ihâimana u'âsi mono siré, rowẽ na 're hâimana u'âsi za'ra mono da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 26:18

Datob'a ne 're danomro mono wa, da te 're idato pese za'ra mono ne, te za 'Re ihâimana u'âsi mono nhimiroti na 're ipo're pu'u za'ra mo, zudeu'õ norĩ hã. Robra na 're inomro mono hã te za 're i'awaibui mo, rowa'a na oto 're nomro mono da, ta norĩ hã. Satanasihi nhiptetezém hawi te za 're i'apizari mo, 'Re ihâimana u'âsi mono niwĩ 're nomro mono da oto, te te sina 're ĩ'umnhasi za'ra mono zéb zarina, 'Re ihâimana u'âsi mono hã iwasédé hã te te tãma 're apari mono da, duré ãma 're sib'a'uwẽ za'ra mono da oto dame.” Tawamhã Paulu te duré siwasu'u, ãne:

Zezusihi zadawa wasuꞌuꞌwa norĩ nhimiromhuri na robꞌuiꞌéré 4:21

Aibâ ihi'ré hã pese õ ré hã, 40 na ma tô ãma tiwahu. Tahawa, aihĩni 'Re ihâimana u'âsi mono ãma te tawata za'ra ni, aibâ ihi'ré hã morĩ wẽ wa oto. Tahawa, da te dasiwi ahâri da, te te dama 'ru waihu'u za'ra õ di, zudeu norĩ ma roti'wa norĩ hã. Tahawa, te taré duré tãma amhâzépa zahuré ni, Pedru norĩ ma, Zuwãhã me, te te dama rowasu'u zahuré tõ da oto, Zezusihi wasu'u na. Taha parimhã, ma tô duré oto tãma rob'ru zahuré ni, neb zahuré da.

Galata 1:24

Tahawa, Wanhib'apito zazei'wa norĩ hã, 'Re ihâimana u'âsi mono ãma si, te 're wata u'âsi za'ra, te te ĩnho'reptui wẽ te ta hã.

1 Pedru 2:9

Tanei õ di, a norĩ wa'wa hã. 'Re ihâimana u'âsi mono, ma tô sima aipisutu za'ra wa'wa, isib'a'uwẽ si oto tãma 're anomro aba mono da. Sasedoti norĩ hã te te sima 're i'apisutu mono ne, te oto a norĩ wa'wa hã uburé Danhib'apito ma romhuri'wa, 're anomro aba mo, õhõ ãma si 're anomro aba mono da, ite da. Ta hã robra hawi ma tô rowa'a u sitẽme asô tihârâ za'ra wa'wa, 're anomro wasété aba mono zém hawi, rowẽ uptabi na si 're anomro aba mono da oto. Taha wasu'u na, tiwaihu'u pese na te te aima ãma 're i'uwaimrami wẽ za'ra wa'aba mono zém na, ma tô sima aipisutu za'ra wa'wa, ãma 're dapo're pu'u u'âsi za'ra wa'aba mono da.