Luca 18:31 - ꞌRe Ihâimana Uꞌâsi Mono Zadawa Wasuꞌu

³¹ Tawamhã Zezusi hã hâiba pisutu ma tô sani za'ra, tisiré 're inomro mono norĩ hã, aibâ 12 na ihâiba za'ra hã. Ãne te tãma nharĩ za'ra: — Ĩwapari pese za'ra wa'aba. Ãhã na, wa Zeruzalẽ u ai'aba'ré ni. Tame te za marĩ hã ĩzô watobro. 'Re ihâimana u'âsi mono zadawa 'mahârâ'wa norĩ hã, dasiré ĩpoto ãma, te te ĩ'ãma irob'ui'éré za'ra zéb zarina, te za marĩ hã ĩzô watobro.

Luca 18:31 ပူးပေါင်းရင်းမြစ်များ

Daniéu 9:26

Tawamhã ã hã romhâimanazé oto isi'utõrĩ ãma, 'Re ihâimana u'âsi mono dama i'rã nho'õmo da, te te ipisudu hã te za dasiwi wĩrĩ ni, marĩ iwasédé te te 'manharĩ õ nherẽ. Taha pari te za danhib'ihâ'a hã tite dasi'wapéi 'manharĩ'wa norĩ siré 'ri nho'u hã duré 'Re ihâimana u'âsi mono nhorõwa 'ri 'rãihâ hã siwi te te prub za'ra. Tawamhã romhâimana 'rãsutuzé hã 're i'âpusi mono ne te za datẽme wi. Tahawa, te za dasi'wapé hã duré datẽme ãwisi, 'Re ihâimana u'âsi mono te te sima irowairébézéb zarina, marĩ te te i'uprosi da hã.

Mateu 16:21

Tawamhã ta hawim haré te oto Zezusi hã tidâ'âzém na, duré tihâiwa'utuzém na zama tãma 're siwasu'u u'âsi za'ra sõ'awi, tisiré 're inomro mono norĩ ma. Ãne ma tô tãma 're siwasu'u za'ra: — Ĩmama te te ĩma ipisutuzéb zarina wa za mo, Zeruzalẽ u. Tamemhã zudeu norĩ ma roti'wa norĩ hã, duré 'Re ihâimana u'âsi mono ma da'ãma romhuri'wa ipire norĩ hã, duré isimiroti na rob'ui'éré 'rata na dama rowahutu'wa norĩ hã te za ĩma rob'manharĩ wasété za'ra. Taha zarina, wa za robzépata za'ẽtẽ. Te za duré dasiwi ĩwĩrĩ ni. Taha wamhã, maparane bâdâ ĩ'ãma si'utõrĩ õ ré, wa za duré apâ hã hâiwa'udu.

Mateu 27:63

Itẽme si'rã'õtõ wamhã, ãne te tãma nharĩ za'ra: — Apito, õ hã isadawa nhipe hã zahadu 're morĩ ré, dama 're isiwasu'u mono zém na wa tô ãma wapo're pu'u za'ra ni, ãhã na hã. Ãne te dama 're siwasu'u: “Bâdâ si'ubdatõ ĩ'ãma si'utõrĩ õ ré, wa za apâ hâiwa'udu.” Ãne dama 're isiwasu'u mono zé hã.

Marcu 8:9

Idasaihuri za'ra norĩ hâiba za'ratazé hã, 4 miu u, ma watobro, ãté. Taha pari, te oto Zezusi hã dama rob'ru, apâ darob u, da te ropéi mono da.

Luca 10:30

Tahawa, te Zezusi hã tãma romnhimiré'é, ãne: — Aibâ hã ma tô si'ra Zeruzalẽ hawi, Zerico u morĩ da. Tawamhã morĩ ré, ma tô sô wairé, isipsaihuri norĩ hã. I'uza, ma tô tiwi sani za'ra. Te te siwi 're pré'é. Te aré oto siwi tiwĩ. Te te siwi 're pré'é mono pari, te oto ai'aba'ré.

Luca 9:22

Tahawa, te tãma siwasu'u za'ra, ãne: — Ti'ai ãma Dasiré Ipodo hã te za robzépata za'ẽtẽ. Dama roti'wa norĩ hã te za siwi wẽ'õ za'ra. Duré 'Re ihâimana u'âsi mono ma, da'ãma romhuri'wa ipire norĩ hã, te za siwi wẽ'õ za'ra, sasedoti ipire norĩ hã. Rowahutu'wa norĩ zama, te za siwi wẽ'õ za'ra. Tahawa, te za dasiwi wĩrĩ ni. Tawamhã bâdâ maparane ãma si'utõrĩ õ ré, te za hâiwa'udu apâ.

Luca 9:51

Zezusi hã hâiwa u za imorĩzé hã romhuture wa, ma tô sina roti, Zeruzalẽ u morĩ da.