Luca 18:14 - ꞌRe Ihâimana Uꞌâsi Mono Zadawa Wasuꞌu

¹⁴ Tahawa, ma tô Zezusi hã dama tinha, ãne: — Tô sena, wa aima waihu'u za'ra wa'wa. Rob'uiprazé arĩ ubumroi'wa si, rowẽ na te apâ mo tinhorõwa u, farizeu upana. E marĩ wa. 'Re ihâimana u'âsi mono te te wẽsãmri wa, tãma isiwasu'uzém na, duré wasété nherẽ, marĩ te te 're i'manharĩ wasété mono na, te te 're 'madâ'â mono õ wab zama. Ni'wam norĩ hã danhipai u wẽ newa, tiwẽ na sina 're wata za'ra mono wamhã, 'Re ihâimana u'âsi mono, te za tãma pisutu za'ra, wapu na dama 're hâimana za'ra mono da. Duré ni'wam norĩ hã tiwẽ na sina 're wata za'ra mono õ wamhã, 'Re ihâimana u'âsi mono, te za tãma pisutu za'ra, pire na dama 're hâimana za'ra mono da.

Luca 18:14 ပူးပေါင်းရင်းမြစ်များ

Ezodu 18:11

Wa tô oto waihu'u ãhã na awa'awi na hã Uburé Danhib'apito, isiptete uptabi na hã uburé ihâiba'õ norĩ nhiptete nhipai u. E marĩ wa. Ta hã Izaraéu nhihudu norĩ, ezipsiu norĩ nhiptetezém hawi te te sõ'reptu za'ra wa, tãma iwazéb'õ za'ra sina, marĩ te te tãma 're 'manharĩ wasété za'ra mono ré.

Provébiu 15:33

Ni'wa hã Uburé Danhib'apito te te 're wazé pese mono wamhã, te za tinhimiza'resezé hã waihu'u. Duré ni'wa dama wapu na 're isi'madâ'â mono zarina, te za da te dasiwi 're wazé.

Provébiu 18:12

'Râwi 're idasi'madâ'â ze za'ra mono na hã te za ãma 're dasiwamnarĩ za'ra. Tane nherẽ, ni'wa dama wapu na 're isi'madâ'â mono zarina, te za da te dasiwi 're wazé pese.

Provébiu 25:7

Wẽ uptabi di aré, dama ipire hã ãne te te aima inharĩ da hã: “We ĩzababa asãmra hâ.” Tane nherẽ, wasété di aré, õ hã uburé ipire norĩ nho'a te te aima rowazé wazere wamhã.

Provébiu 29:23

'Râwi 're idasi'madâ'â ze za'ra mono zéb zarina, te za 'râwi 're dasiwazéb za'ra. Tane nherẽ, dama dawapu na 're idasi'madâ'â mono zéb zarina, te za dama dawazé pese zé hã da te dasina 're sani za'ra.

Provébiu 3:34

Da'ãma 're iwa'ẽ za'ra mono norĩ ãma te za 're wa'ẽ iwa'rãmi. 'Râwi 're isi'madâ'â ze za'ra mono õ norĩ si te za te te 're apawapto.

Daniéu 4:37

Tahawa, wa hã apito Nabucodonozo, wa tô hâiwa ãma apito 'Re ihâimana u'âsi mono ãma hã ĩwata. Uburé marĩ te te 're i'ab'manharĩ mono zé hã i'uwaibaba si. Duré õ hã te za siwa'ru a'uwẽ norĩ 're isi'madâ'â ze za'ẽtẽ za'ra mono norĩ hã te te 're anhisém nomri.

Mateu 23:12

Ni'wam norĩ hã pire na 'râwi sina 're sõpré mono wamhã, 'Re ihâimana u'âsi mono si te za tãma pisutu za'ra, wapu na dama 're hâimana za'ra mono da oto. Duré, ni'wam norĩ hã pire na 'râwi 're si'madâ'â za'ra mono õ wamhã, ta norĩ ma si te za pisutu za'ra, pire na oto dama 're hâimana za'ra mono da.

Mateu 5:3

— Ni'wam norĩ hã 'râwi 're isipawapto waihu'u za'ra mono õ na 're siwaihu'u za'ra mono wamhã, duré 'Re ihâimana u'âsi mono si za ta norĩ hã i'upana te te 're ipawapto wẽ za'ra mono na te te sina 're waihu'u za'ra mono wamhã, ta norĩ si te za rowẽ na 're hâimana za'ra, ãma 're sib'a'uwẽ za'ra mono wa.

Luca 1:52

Apito norĩ hã te za roti hawi te te 're azani, wapure na oto 're nomro mono da. Tipire na sina 're iwata za'ra mono õ norĩ si te za te te 're apisutu, pire na oto 're nomro mono da.

Luca 10:29

Aibâ hã, uburé te te 're da'azawi pese mono õ di. Tahawa, te asa Zezusihi ma tinha, ãne: — E 'wam norĩ hã wa za wa te 're sawi pese za'ra.

Luca 14:11

Tane, ni'wa hã pire wẽ te, 'râwi sina 're wata mono wamhã, 'Re ihâimana u'âsi mono, te za tãma pisutu, wapu na 're hâimana mono da oto. Duré ni'wa hã, tipire na 'râwi 're si'madâ'â mono õ wamhã, te za tãma pisutu, dama pire na 're hâimana mono da oto.

Luca 16:15

Tahawa, te Zezusi hã tãma nharĩ za'ra, ãne: — A norĩ wa'wa hã aiwẽ newa, te ai'ãma 're dawata za'ra wa'wa. Tazahã asimirosa'rata 'wa hã, 'Re ihâimana u'âsi mono ma, waihu'u pese di. Ãté, marĩ na te za dasima ãma 're dawata za'ra, iwẽ newa. Tazahã tãma wẽ õ wamhã, te za te te 're awẽ'õ, 'Re ihâimana u'âsi mono hã.

Roma 3:20

E 'Re ihâimana u'âsi mono nhimiroti 'rata na rob'ui'éré zarina, marĩ hã da te 're i'manharĩ wẽ za'ra mono na, te za te te sima da'ãma 're aroti, dawasédé hã te te oto da'ãma 're ab'madâ'â tõ mono da, taha zarina te te oto 're da'awẽsãmri mono da, dapo're'õ nherẽ, te te 're da'ahâ za'ra mono tõ da. Mare di. Taha nai õ di. Uburé marĩ hã da te 're i'manharĩ wasété za'ra mono na, 'râwi 're dasiwaihu'u za'ra mono da si, te dama 're hâimana, rob'ui'éré 'rada hã.

Roma 4:5

Tanei õ di, 'Re ihâimana u'âsi mono hã. Marĩ hã da te 're i'manharĩ wẽ za'ra mono na, te 'râwi 're dasi'madâ'â ze za'ra, taha na si 'Re ihâimana u'âsi mono hã dawasédé hã te te oto da'ãma 're i'ab'madâ'â mono õ na, te te sima da'ãma 're aroti mono newa. Tane nherẽ, te te sima da'ãma 're aroti mono õ di, taha na dawasédé hã te te oto da'ãma 're ab'madâ'â tõ mono da, taha zarina te te oto 're ida'awẽsãmri mono zéb da hã. 'Re ihâimana u'âsi mono hã da te dasina 're umnhasi za'ra mono wapsi, te za te te sina 're da'awẽsãmri, dawasédé hã za oto te te da'ãma 're ab'madâ'â mono õ wa, duré dawasété na 're danomro mono nherẽ, te te 're da'ahâ za'ra mono tõ da.

Roma 5:1

Wanhib'apito Zezu Cristu hã ma tô te te sima 're wa'awẽ, wa te wasina 're i'umnhasi za'ra mono zéb zarina. Tahawa, 'Re ihâimana u'âsi mono hã ma tô te te sima wa'ãma 're aroti, wa te 're isazei pese za'ra mono na, wawasédé hã te te oto wa'ãma 're ab'madâ'â tõ mono da, taha zarina si te te duré 're wa'awẽsãmri mono da, wawasété na 're wanomro mono nherẽ, te te 're wa'ahâ za'ra mono tõ da. Tahawa, rowẽ u'âsi, wa oto ãma 're wanomro, 'Re ihâimana u'âsi mono ãma hã.

Roma 8:33

Wa norĩ hã 'Re ihâimana u'âsi mono, tinhib'a'uwẽ da, te te sima 're iwa'apisutu mono norĩ si, ma tô te te 're wa'awẽsãmri, wawasédé hã te te oto wa'ãma 're i'ab'madâ'â mono õ zarina. E ni'wam norĩ hã wawasédé te te wa'ãma 're sa'ra mono da bâ bété. Ni'wam norĩ hã, wawasédé te te wa'ãma 're sa'ra waihu'u mono õ di za oto. Ãne wa za duré aima waihu'u za'ra wa'wa. Cristu Zezusi hã ma tô wazada dârâ, wa'upana. Apâ ma tô duré hâiwa'udu. Tahawa, te oto Timama nhimire niwĩ 're sãmra, dama pire na. Timama ma, te duré te te 're wa'awasu'u wẽ u'âsi, wazada idâ'âzéb zarina, wawasédé hã te te wa'ãma 're ab'madâ'â tõ mono da oto. Ãne wa, e ni'wam norĩ hã wawasété na te te wama 're nharĩ zahu za'ra mono da bâ oto. Mare di.

Galata 2:16

Wa norĩ hã wa tô oto marĩ hã waihu'u ni, 'Re ihâimana u'âsi mono te te 're ida'awẽsãmri mono zém na hã. Zezu Cristu, Danho'reptui'wa na da te dasina 're umnhasi za'ra mono wamhã, 'Re ihâimana u'âsi mono, dawasédé hã te te da'ãma 're i'ab'madâ'â mono õ zéb zarina, te oto te te 're da'awẽsãmri. Taha zarina, dawasété 'ru te, te te dahâ za'ra õ di za, rob'rãsutuzéb ãma hã. Isimiroti na Mozési te te irob'ui'éré 'rata zarina, da te 're rob'manharĩ za'ra mono nherẽ, taha zarina te te dama 're apari mono õ di za, dawasédé hã. Ãne na wa tô oto waihu'u ni, wa norĩ hã.

Tiagu 4:10

Aihâimana wẽ na tãma 're asiwasu'u za'ra wa'aba mono õ di za, Danhib'apito uptabi ma hã, asina 're aiwata za'ra wa'aba mono tõ da. Aihâimana wasété na si te za tãma 're asiwasu'u za'ra wa'aba mo. Tawamhã robzei'õ hawi te za ai'ãma 're sisaprĩ za'ra wa'wa, rowẽ na oto 're aihâimana za'ra wa'aba mono da.

Tiagu 4:6

Ãne wa, Wamama zawi'wa 're wanomro mono da, te za te te 're wa'apawaptob u'âsi. Duréihã ma tô taha wasu'u na rob'ui'éré, isadawa wasu'u'wa hã, ãne: “Si'uihâ na 'râwi tinhimirosa'rata na 're isi'madâ'â ze za'ra mono norĩ zada, te za 're hâimana, Wamama hã. 'Râwi tinhimirosa'rata na 're isi'madâ'â za'ra mono õ norĩ si, te za te te 're apawapto.” Ãne ãma irob'ui'éré hã.

1 Samuéu 1:18

Tawamhã te asa tãma tinha ãne, Erihi ma: — Ĩnhib'apito, ĩ'ãma 're rosa'rata wẽ u'âsi mono da hã ĩma wẽ di. — Ãne te te tãma nharĩ pari, ma te oto watobro. Tawamhã te oto tisa. Duré tawamhã tiwi robzei'õ õ di oto.