Luca 17:3 - ꞌRe Ihâimana Uꞌâsi Mono Zadawa Wasuꞌu

³ Tahawa, te za 'râwi asina 're asõpré wa'aba mo, 're anomro wẽ wa'aba mono zéb zô. Ãté asisãnawã hã te za asada 're wasété za'ra wa'wa. Ãne wamhã, aimreme wẽ na, te za tãma 're iroti za'ra wa'aba mo, asada 're wasété za'ra wa'aba mono tõ da. Tiwasété na aima 're siwẽ'õ za'ra wa'aba mono wamhã, te za tãma 're inharĩ za'ra wa'aba mo, ãne: “Te ĩsina 'madâ'â õ di, ĩzada aiwasétézé hã.” Ãne te za tãma 're inharĩ za'ra wa'aba mo.

Luca 17:3 ပူးပေါင်းရင်းမြစ်များ

Ezodu 34:12

Itẽme i'ai'aba'réi wa'wa ti'ai 're, 're ihâimana za'ra mono norĩ me hã marĩ na 're asisaze za'ra wa'aba mono õ di za. E marĩ wa. Ta norĩ hã asisitob za'ra wa'aba zém ne hã za aima 're hâimana za'ra wa'aba mono õ'umnhasite.

Provébiu 17:10

Ni'wa i'rãi waihu'u wẽ ma, da te pẽtẽ wamhã, te za tihâimana pese zé hã sina uze, te te waihu'u wẽ wa. Tane nherẽ, isimiza'rese'õ hã 100 na da te 're pré'é mono nherẽ, siwaihu'u su'u õ di, tiwasété na hã.

Provébiu 27:5

Wẽ di, ni'wai ma, isawi zarina sõ'awi da te tãma 're ipri'i za'ra mono zé hã. Da te 're dazawi za'ra mono nherẽ, da te dama 're ipri'i za'ra mono õ zép si hã wẽ õ di.

Provébiu 9:8

Niwamhã da'ãma 're iwa'ẽi mono ma hã 're pẽtẽ mono tõ. Ãnei õ wamhã, te za asada hã 're sahi. Tane nherẽ, ni'wa i'rãi waihu'u wẽ ma, 're pẽtẽ mono wamhã, te za te te 're aiwazé.

Mateu 18:21

Tawamhã Pedru hã ma tô Zezusihi u ai'ré, te te sadanharĩ da. Ãne te taha wamhã sadanha: — Wanhib'apito, wasiré isazei'wa nherẽ, ĩzada 're iwasété u'âsi mono zé hã e mame isa'ratazém nhitõ ãma wa za ĩsina hã 'madâ'â zazâ, iwasédé te ĩsina i'madâ'â'õzém na hã za oto. E 7 ãma.

Luca 21:34

Tawamhã Zezusi hã tinhimiroti na ma tô tãma 'rãsutu za'ra, ãne: — Asimiza'rese sina, te za 're aihâimana za'ra wa'aba mo. Datoi u hã âsipãrĩ na 're asapa'a za'ra wa'aba mono õ di za. Marĩ na si 're rosa'rata za'ra wa'aba mono õ di za. E marĩ wa. Rosa'rese õ ré, bâdâ ipire, iwa waptã'ã õ'umnhasite. Rosa'rese õ ré, te robzari hã itede'wa hã te te 're waibu, wedenhorõ na. Tane, duré rosa'rese õ ré, te za bâdâ ipire hã iwa waptãrã, uburé ti'ai ãma hã.

Éfézu 5:15

Tahawa, wa za aima roti za'ra wa'wa, 'râwi asina 're asõpré u'âsi aba mono da, 're i'anomro wẽ wa'aba mono zéb da na hã. Sena na roti wẽ waihu'u'õ'wa ne, 're anomro wasété aba mono õ di za oto. Roti sena hã oto aima waihu'u pese za'ra wa'aba wa, te za ãma 're anomro wẽ wa'aba mo, tô sena roti wẽ zarina si.

Hebreu 12:15

'Re aihâimana za'ra wa'aba mono zém na, 'Re ihâimana u'âsi mono ma, asina tãma ãma 're uwaimrami za'ra wa'aba mono õ wa, tinhoprubzéb zarina, iwẽ uptabi hã te te aima 're ipisutu za'ra wa'aba mono hã 're simini za'ra wa'aba mono tõ da, te za 're asi'madâ'â pese za'ra wa'aba mo. Wede pa hã, ti'ai 'rowi 're simi'wara mono ré hã, taha wa'u isé hã dama simimnhasi õ di. Tane nherẽ, ipa hã da te oto 're sa'o'o za'ra mono wa, da te oto 're huri mono wamhã, te za te te 're da'rãiwamnarĩ za'ra, taha pa wa'u hã sé wa. Tane duré, a norĩ wa'wa hã te za ni'wam norĩ wi 're asi'madâ'â pese za'ra wa'aba mo, ta norĩ hã te te aiwi 're rowasété za'ra wa'aba mono tõ da, duré taha zarina a norĩ wa'wa hã 'râwi aiwasété na 're asi'uptob za'ra wa'aba mono tõ da, ta norĩ zu.

Tiagu 5:19

Ĩsisãnawã norĩ, ãne wa za duré aima waihu'u za'ra wa'wa. Ãté asiré isazei'wa hã te za aipi'ra, roti senai'õ niwĩ. Tawamhã ãté misi te za i'maipawapto wa'wa, apâ te te sina siri da, roti tô sena niwĩ 're hâimana mono da apâ. Ãne asimiroti wẽ na 'manho'reptui wa'aba wamhã, ipo're'õ hã, 'Re ihâimana u'âsi mono nhiti 're hâimana u'âsi mono õ di za, rowẽ u'âsi nhiti. Duré Wamama hã te te ãma 'madâ'â õ di za, marĩ hã ahâ na tiwasédé te te 're i'ab'manharĩ mono zé hã. Ta hã te za tãma pari za'ra.

2 Zuwã 1:8

Tahawa, roti tô senai'õ na te te dama 're iroti za'ra mono norĩ wi, te za 're asi'madâ'â pese za'ra wa'aba mo 'râwi, 're iromhuri za'ra wa'aba mono zé wa'â hã 're simini tõ za'ra wa'aba mono da. Uburé marĩ iwẽ na 'Re ihâimana u'âsi mono, za te te aima iwa'âbâ za'ra wa'aba zé hã ubuni na asima 're waibui wa'aba mono da, te za 'râwi 're asi'madâ'â pese za'ra wa'aba mo tiwi.