Luca 15:7 - ꞌRe Ihâimana Uꞌâsi Mono Zadawa Wasuꞌu

⁷ — Tane duré, ni'wa hã siwa'ru 're imorĩ hã tiwasédé hã te te oto rẽme pese wamhã, hâiwa ãma 're isi'ubumroi mono norĩ hã te za tãma 're to za'ra, misi nherẽ. Õhõ ãma si, te za 're toi uptabi za'ra, 're inomro wẽ mono norĩ nhipai u hã, 99 na ihâiba za'ra nhipai u hã. Ta norĩ hã 're nomro wẽ mono wa, tiwasété na 're isiwẽ'õ za'ra mono da hã, mare di.

Luca 15:7 ပူးပေါင်းရင်းမြစ်များ

Provébiu 30:12

Ni'wam norĩ hã te tiwẽ na 're ihâimana za'ra mono na te te sina 're rosa'rata za'ra. Tane nherẽ, zahadu 're isi'uptob za'ra mono pari zé hã tãma 're hâimana za'ra mono õ di, ipẽ'ẽ 'remhã.

Mateu 18:13

Tawamhã te te sãmri wẽ te, te za 're to, pone'ẽrebâ tede'wa hã. Pone'ẽrebâ hã isimani'õ norĩ hã rowẽ u'âsi tãma 're hâimana za'ra mono wa, tãma 're irowẽ mono zém nhipai u, te za 're to za'ẽtẽ.

Mateu 3:8

Sena na aiwasédé hã irẽme za'ra wa'aba zém na, da te 're aiwaihu'u za'ra wa'aba mono da, te za oto 're anomro wẽ wa'aba mo.

Luca 15:10

— Tane duré, ni'wa hã siwa'ru 're imorĩ hã, tiwasédé hã te te oto rẽme pese wamhã, hâiwa ãma 'Re ihâimana u'âsi mono ma romhuri'wa norĩ hã te za ãma 're to za'ra, tiwasédé hã te te rẽme pese wẽ te, misi nherẽ.

Luca 15:29

Ãhã wa, te timama ma tinha, ãne: “Wa hã wa tô te aima 're romhuri pese. Ĩ'ãma wahub ahâ di, te aima 're iromhuri mono ré hã. Niwa, aimreme hã te simini õ di. Tane nherẽ, marĩ ĩma sõmri õ di, pone'ẽrebâ hã, dasa hã ĩsiwadi norĩ ma, te i'manharĩzéb da hã ãma.

Luca 15:32

Uburé wama rowẽ za'ra wa, wa tô dasa hã dama 'manha, ĩ'ra hã iwisizém na. Ano hã dâ'â newa. Tane nherẽ, dâ'â õ di. Ma tô aré ãma ropsisa'rese'õ. Tane nherẽ, ma tô we apâ wi.” Ãne ma tô ti'ra ma waihu'u.

Luca 15:6

'Ri tẽme ãwisi wamhã, te za sô aihârâ za'ra, asiwadi norĩ zô. 'Râwi ai'rata 're isõrõwa za'ra mono norĩ zô zama, te za sô aihârâ za'ra. Tawamhã te za tãma irowasu'u za'ra, ãne: “Ãhã na ĩma rowẽ di. Ĩnhimizama hã wa tô tisã, ĩwi isimani hã. Ĩzabâdâ te za 're ato za'ra wa'aba mo.” Ãne te za tãma irowasu'u za'ra.

Luca 15:8

Tawamhã Zezusi hã te duré tãma ãma romnhimiré'é za'ra, ãne: — Pi'õ te, rob'uiprazé hã ahâ wamhã, ãté misi te za tiwi 'maihaimani, 10 na hâimana za'ra wamhã, isapotore hã. E tawamhã sô 're rĩtĩ mono õ di za, tiwi 'masimani wamhã. Te za tô sô 're rĩtĩ. Iro'ore hã te za duré sô ro'o, sô rĩtĩ da. Te za duré sô 'ri 're wamro. Sô 're rĩtĩ pese mono wamhã, te za tô oto tisã.

Luca 16:15

Tahawa, te Zezusi hã tãma nharĩ za'ra, ãne: — A norĩ wa'wa hã aiwẽ newa, te ai'ãma 're dawata za'ra wa'wa. Tazahã asimirosa'rata 'wa hã, 'Re ihâimana u'âsi mono ma, waihu'u pese di. Ãté, marĩ na te za dasima ãma 're dawata za'ra, iwẽ newa. Tazahã tãma wẽ õ wamhã, te za te te 're awẽ'õ, 'Re ihâimana u'âsi mono hã.

Luca 5:32

Tane duré wa hã, dawẽ na 're idanomro mono norĩ zô, ĩsitẽme 're ĩhârâ mono da, we ĩmorĩ õ di. Dawasété na 're idanomro mono norĩ zô si, 're ĩhârâ mono da, wa wei mo, dawasédé hã da te 're rẽme pese za'ra mono da, 're danomro wẽ mono da oto.

Roma 7:9

Duréihã 'Re ihâimana u'âsi mono nhimiroti 'rata na rowasu'u hã te waihu'u õ nherẽ, wa tô aré ĩsi'ãma rosa'rata na te 're upa. Ĩwasété na 're ĩsi'madâ'â mono ãna, wa tô 're ĩhâimana. Tane nherẽ, isimiroti 'rata na rob'ui'éré wasu'u hã te oto waihu'u wamhã, ãne na te oto ĩsi'ãma 're rosa'rata mono õ di. 'Re ihâimana u'âsi mono ma, ĩwasété na aré 're ĩhâimana mono zém na hã wa tô ĩsi'ãma waihu'u. Ĩdâ'â u'âsi, wa tô aré 're ĩhâimana, ĩpẽ'ẽ 're. 'Re ihâimana u'âsi mono hã ma tô tinhimiroti 'rata na rob'ui'éré hã wama sõmri za'ra, wa te wasina tãma 're i'uwaimrami za'ra mono zéb zarina, rowẽ uptabi na ãma 're wanomro wẽ mono da. Tane nherẽ, te ĩsina tãma uwaimrami õ di, wa hã. Tahawa, wa tô aré ĩdâ'â u'âsi 're ĩhâimana u'âsi, 'Re ihâimana u'âsi mono nhiti.