Luca 13:7 - ꞌRe Ihâimana Uꞌâsi Mono Zadawa Wasuꞌu

⁷ Tahawa, te buru 'madâ'â'wai ma tinha, ãne: “Si'ubdatõ, ma tô ĩ'ãma tiwahu oto, taré nasi we sô ĩneb ré hã, figuera 'rã zô. Wa tô 'madâ'â wa'a. Te za isizâ. E marĩ da, te za taré 're sab u'âsi, 're 'rãi mono õ nherẽ.” Ãne te romhuri'wai ma tinha.

Luca 13:7 ပူးပေါင်းရင်းမြစ်များ

Ezodu 32:10

Tahawa, ĩwi hã robzâri tõ. Sada ĩnhiti'ru za'ra zéb zarina wa za uprosi. Tawamhã romhutu'õmhã aihawimhã wa za da'ahâ na apâ dasiré 're idahâimana za'ra mono da hã 'manha.

Daniéu 4:14

Ta hã ma tô mreme 'rãihâ na tinha ãne: ‘Ma'ãpé wede hã asiwi 'morõwĩrĩ aba. Asiwi 'morõwĩrĩ aba wamhã, te za ipanhipti asiwi isihâri aba mo. Te za duré isu hã asiwi isinarĩ aba mo. Duré i'rã asiwi sãmra aba wamhã, te za ãma asiwi iropéi wa'aba mo. Iwede awã zahâpâ abaze norĩ 're iwa'utu za'ra mono hã te za duré ta hawi asiwi iwano'õ aba mo, si norĩ ipanhipti na 're isimasa mono norĩ zama.

Mateu 7:19

Rowede hã 're 'rã za'ra mono õ wa, te za da te 're sãna'rata nhihâri za'ra, unhama u da te 're sãmra mono da.

Luca 13:8

Tawamhã romhuri'wa hã te asa tãma tinha, ãne: “Apito, misi ãma wahu a'â. Wa hã wa za a'â ti'a zu, ti'ai wazarizém na te ãma uirĩ da, wẽ na sab da.

Luca 3:9

Hâtâra hã ma tô ni'wa hã sarõtõ oto, wede te te ãma sari nhihâri da. Uburé wede hã 're i'rãi pese za'ra mono õ hã te za te te ãma 're anhihâri. Tawamhã unhama u te za te te 're anhamra.

Zuwã 15:2

Uwa 'ru panhipti sisa'ridi hã wẽ õ di, 're i'rã za'ra mono õ hã. Tahawa, uwa 'ru 'madâ'â'wa hã te za ipanhipti hã te te 're anhihâri i'rãi'õ hã, te te 're anhamra mono da. Tane te za Ĩmama hã ĩzazei'õ'wa norĩ hã te te 're azatõrĩ, ĩnhiti 're hâimana za'ra mono da. Uwa 'ru panhipti sisa'riti amo hã wẽ di, 're 'rã za'ra mono wa, ta norĩ hã. Tahawa, wa za 're i'rã za'ra mono na simiré'é, ĩzazei'wa norĩ ãma 're nomro wẽ mono wa. I'wanhipré te te 're i'anhihâri mono hã, wa za ãma simiré'é, ĩzazei'wa norĩ te te 're i'manharĩ wasété za'ra mono zém na. 'Re i'rã za'ra mono hã ipanhipti wãi wa, i'wanhipré ahâ wamhã, te za misi si te te 're anhihâri i'madâ'â'wa hã, 're 'rãi pese za'ra mono da. Tane te za Ĩmama hã ĩzazei'wa norĩ wi iwasédé hã te te 're anhihâri, 're nomro wẽ uptabi mono da oto.

Zuwã 15:6

Ni'wam norĩ hã ĩ'ãma 're hâimana u'âsi za'ra mono õ wamhã, 're nomro wẽ mono õ di za. Ta norĩ ãma, wa za uwa 'ru panhipti nhihâri hã ãma simiré'é. Uwa 'ru panhipti nhihâri hã te te 're i'anhamra mono hã, te za 're 'ré za'ra. 'Re 'ré za'ra mono wapsi, te za simisutu te te 're aza'ra i'madâ'â'wa hã, te te 're asui mono da, 're zata za'ra mono da.