Luca 13:31 - ꞌRe Ihâimana Uꞌâsi Mono Zadawa Wasuꞌu

³¹ Tawamhã Zezusi hã te te apo're pu'u parip si, awa'awi ma tô itẽme 'maihaihutu, farizeu norĩ hã. Tahawa, ma tô Zezusihi ma rob'ru za'ra, ãne: — Mo oto ã hawi aimorĩ. E marĩ wa. Apito Erodi hã ma tô sima aiwẽ, da te dasiwi aiwĩrĩ da.

Luca 13:31 ပူးပေါင်းရင်းမြစ်များ

Mateu 14:1

Tawamhã apito Erodi Galiléa na danhipti'a nho'õmo nhisi ãma te te 're da'madâ'â mono ré, ma tô Zezusihi wasu'u hã wapa.

Mateu 14:3

Ãne ma tô apito Erodi hã Zezusihi wasu'u na tãma rowasu'u za'ra. Ta hã ma tô aré tinoi mro zô rowasutu, Erodiza na pi'õ nhisi zô. Ino nhisi hã Filipi na isisi. Zuwã Batista hã ma tô aré te te tãma 're roti u'âsi, ãne: “'Re ihâimana u'âsi mono nhimiroti 'rata na rob'ui'éré hã te te ãma roti õ di, asisãnawãi mro na aimro da hã. Tãma wẽ õ di, 'Re ihâimana u'âsi mono ma hã.” — Ãne ma tô te te tãma 're roti u'âsi, Erodihi ma. Tane nherẽ, ma tô apito Erodi hã tinoi mro na tiwi ãma ai'ré. Tahawa, ma tô dama ti'ru, Zuwã Batista hã da te âri da, da te pawasisi da, duré da te sẽrẽ da, dazazéb 're.

Mateu 14:6

Tawamhã Erodihi waptã'ãzém na ma tô dato hã dasiwi 'manharĩ ni. Tawamhã Erodizaha 'ra hã ma tô danho'a apese azarudu hã, apito Erodihi nho'a zama. Tahawa, ma tô 'madâ'â ze, apito Erodi hã.

Luca 3:1

Tawamhã 15 na ma tô ãma tiwahu, Tibériuhu ãma, danhib'apito na 're hâimana mono ré, Roma ãma hã. Isadawa para, te Põsiu Pilatu hã te te dama 're roti, Zudéa ãma. Duré Erodi hã te te dama 're roti isadawa para, Galiléa ãma. Duré Erodihi no hã Filipi hã te te dama 're roti, isadawa para, Itureza na danhipti'a nho'õmo nhisi ãma, duré Taraconiti na danhipti'a nho'õmo nhisi ãma. Duré Risãniza hã te te dama 're roti, isadawa para, Abireni na danhipti'a nho'õmo nhisi ãma.

Luca 9:7

Tawamhã apito Erodi hã, Galiléa ãma da'madâ'â'wa hã ma tô Zezusihi wasu'u hã wapa. Ãne ma tô ni'wam norĩ hã ãma rosa'rata za'ra, Zezusihi ãma hã: — Ãté Zuwã Batista apâ ihâiwa'udu.