Luca 12:33 - ꞌRe Ihâimana Uꞌâsi Mono Zadawa Wasuꞌu

^33-34 Tahawa, te za uburé asimarĩ hã dama iwede za'ra wa'wa, iwa'âbâ zô, isimarĩ'õ norĩ ma, sõmri aba mono da. Tawamhã asimarĩ hã isi'utõrĩ'õ hã te za hâiwa ãma asô 're hâimana u'âsi za'ra wa'wa, wẽ u'âsi na. Tame, isipsaihuri norĩ hã sô 're sisisi waihu'u mono õ di za. Tame duré, da'uza hâzapu'u'wa hã 're hâimana za'ra mono õ di. Ti'ai ãma asimarĩ ahâ zô si 're rob'ruiwapari za'ra wa'aba mono wamhã, taha na si te za aipẽ'ẽ 're, asima 're irosa'rata u'âsi za'ra wa'aba mo, hâiwa ãma iwẽ hã isi'utõrĩ'õ upana. Duré hâiwa ãma iwẽ uptabi zô si, asima 're rob'ruiwapari za'ra wa'aba mono wamhã, taha na si te za asima 're irosa'rata u'âsi za'ra wa'aba mo, 'Re ihâimana u'âsi mono hã iwẽ hã te te asô 're i'apisutu aba mono zô si.

Luca 12:33 ပူးပေါင်းရင်းမြစ်များ

Provébiu 13:7

Ni'wam norĩ hã sibro pese ne dama 're sihâi'ré za'ra mono zahã, te tô simarĩ ãna hã 're hâimana za'ra, i'uptabi na hã. Duré isiré norĩ hã simarĩ'õ ne dama 're sihâi'ré za'ra mono zahã, te duré tô sibro pese na 're hâimana za'ra, iwa'rãmi.

Mateu 19:21

Tawamhã Zezusi te asa tãma tinha, ãne: — Rowẽ na 're aihâimana mono zéb zô, 're rosa'rata mono wamhã, mo oto aimorĩ, uburé asibro hã dama wede mono da, da te aiwi i'uipra za'ra zé rob'uiprazé hã isibrob'õ norĩ ma, sõmri mono da. Tawapsi asibro pese di za, hâiwa ãma. Taha parip si te za we apâ ĩtẽme hã aimo, ĩsiré 're aimorĩ da oto.

Luca 11:41

Tahawa, ma'ãpé isibrob'õ norĩ ma, 're asõprub za'ra wa'aba mono. Ãne dama 're 'manharĩ za'ra wa'aba mono wamhã, asimirosa'rata wẽ na, te za te te 're ai'awaihu'u 'wa, 'Re ihâimana u'âsi mono hã.

Luca 12:21

— Tane, danhimarĩ hã dasima si, da te 're ubumroi pese za'ra mono wamhã, 'Re ihâimana u'âsi mono ma, 're danhoprub za'ra mono ãna, te za taré da te dasima 're ubumroi pese za'ra, danhimarĩ hã.

Luca 16:9

Tahawa, ti'ab ré te za asimarĩ na 're idazawi za'ra wa'aba mo, ãma 're asiwadi za'ra wa'aba mono da. Asimarĩ hã asipara 're rẽme za'ra wa'aba mono wapsi, hâiwa u, asõrõwa u 're asisisi aba mono wi, te za asô 're tob'uzu za'ra wa'wa, asawi'wa norĩ wa'wa hã. — Ãne Zezusi te tãma roti za'ra, tisiré 're inomro mono norĩ ma.

Luca 18:22

Isihâimanazéb 'rãzarõno hã te te wapari wamhã, te asa tãma tinha, ãne Zezusi hã: — Tane nherẽ, misi te zahadu aihâimanazéb zô aiwi rowaptâ. Ma'ãpé, uburé asibro hã dama wede mono, iwa'âbâ zô, isibrob'õ norĩ ma, sõmri mono da. Tawapsi, asibro pese di za, hâiwa ãma hã. Asibro hã dama wede mono parip si, te za apâ we ĩtẽme aimo, ĩsiré 're aimorĩ da oto.

Zuwã 12:6

E marĩ wa. E isibrob'õ norĩ hã te te pawaptob zei wa. Mare di. Te te pawaptob ze za'ra wab õ di. Ta hã sipsaihuri di. Rob'uiprazé hã te te wama 're i'madâ'â mono hã, te pi'uriwi te te sima 're 'mazani.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:45

Ni'wam norĩ hã ma tô tinhipti'a hã te te dama 're wede za'ra, duré tinhibrob zama, iwa'âbâ zô. Tawamhã iwa'â hã ma tô te te sima 're po'o za'ra, marĩ zô tiwi 're iro'wanhi'riti za'ra mono zéb zarina.

2 Corĩtu 8:2

Ta norĩ hã da te ãma 're irowasété za'ra mono na, te te 're robzépata za'ẽtẽ za'ra mono nherẽ, duré sibrob ãna 're hâimana za'ra mono nherẽ, ma tô to sina, dama tinhoprub za'ẽtẽ za'ra, tite rob'uiprazém na hã.