Luca 12:15 - ꞌRe Ihâimana Uꞌâsi Mono Zadawa Wasuꞌu

¹⁵ Tawamhã te uburé dama tinha, ãne: — Ma'ãpé, ĩwapari pese za'ra wa'aba. 'Râwi te za 're asi'madâ'â za'ra wa'aba mo, asimarĩ ahâ zô, 're rob'ruiwapari za'ra wa'aba mono tõ da. Danhimarĩ ahâ uptabi nherẽ, robze u'âsi, ãma 're danomro mono õ di za, rowẽzéb õ wa, ta hã.

Luca 12:15 ပူးပေါင်းရင်းမြစ်များ

Salmu 10:3

Iwasété norĩ hã te mreme nhiséb ãna marĩ iwasété si te te sima 're i'ruiwapari za'ra mono na 're mreme zusi, isi'madâ'â ze zéb zarina. Duré danhimarĩ zô hâimana nhipese sina te te sima 're ida'wani za'ra mono norĩ hã, te Uburé Danhib'apito ãma te te 're wasété za'ra.

Provébiu 15:16

Wẽ uptabi di, danhimarĩ'õ, Uburé Danhib'apito da te 're iwazé pese mono zé hã, danhimarĩ pe dasina dahâtâ'â za'ẽtẽ na 're idahâimana mono zém nhipai u.

Provébiu 16:16

Wẽ uptabi di ẽtẽ waipo pré oru nhipai u, da'rãiwaihu'u wẽ, da te 're iwaihu'u za'ra mono da hã. Duré wẽ uptabi di ẽtẽ waipo prã prata nhipai u, danhimirowaihu'u wẽ na 're idahâimana za'ra mono zé hã.

Provébiu 28:16

Dama i'rã nho'u isimiza'rese'õ hã te za da'ãma siwamri ãna te te 're dawati pese za'ra. Tane nherẽ, ni'wa senai õ na 're idahâimana za'ra mono zéb zarina, 're idasisibro pese za'ra mono zé tãma i'ru si te za dama i'rãnho'õmo na hã ãma 're hâimana hâ.

Luca 12:16

Te duré ãma romnhimiré'é, ãne: — Aibâ hã te 're hâimana, isimarĩ ahâ hã. Buru nho ahâ wamhã, 'râwi te sima rosa'rata, ãne: “'Ri hã 'ri 're su'ure di, buru nho za'warizéb da hã. E marĩ wa za 'manha.

Luca 16:14

Tawamhã farizeu norĩ hã ma tô Zezusihi mreme hã wapari za'ra. Tawamhã rob'uiprazé wẽ 'wa, 're nomro mono wa, ma tô Zezusihi ma nharĩ za'ra, ãne.

Luca 21:34

Tawamhã Zezusi hã tinhimiroti na ma tô tãma 'rãsutu za'ra, ãne: — Asimiza'rese sina, te za 're aihâimana za'ra wa'aba mo. Datoi u hã âsipãrĩ na 're asapa'a za'ra wa'aba mono õ di za. Marĩ na si 're rosa'rata za'ra wa'aba mono õ di za. E marĩ wa. Rosa'rese õ ré, bâdâ ipire, iwa waptã'ã õ'umnhasite. Rosa'rese õ ré, te robzari hã itede'wa hã te te 're waibu, wedenhorõ na. Tane, duré rosa'rese õ ré, te za bâdâ ipire hã iwa waptãrã, uburé ti'ai ãma hã.

Luca 8:14

Duré amnho hã wab'ru wazari i'a'a mono hã, aimawi a'uwẽ, te wasu'u. Ta norĩ hã ãté te za taré tipo're na te te 're wapari za'ra, isadawa wasu'u hã. Tazahã, marĩ wamhã, õhõ ãma si 're nomro mono õ di za. Ãté, marĩ na si te za te te 're rosa'rata za'ra sima, ãté rob'uiprazém na si, ãté titozém na si. Tawamhã rob'rã i'rã wẽ prã ne, 're hâimana wẽ uptabi za'ra mono õ di za.

Colosu 3:5

Ti'ai ãma isazei'õ'wa norĩ hâimanazéb zarina, marĩ wasété zô 're irob'ruiwapari za'ra wa'aba mono zé hã te za 'râwi asiwi 're i'uprosi pese za'ra wa'aba mo, 're dadâ'â za'ra mono wa, marĩ zô da te oto 're irob'ruiwapari za'ra mono õ ne. Pi'õ na aibâ na zama siwa'ru aiwasédé, 're i'manharĩ za'ra wa'aba mono zé hã te za 'râwi 're i'uprosi pese za'ra wa'aba mo asiwi, duré asisô 're irowasutu za'ra wa'aba mono zé hã, duré marĩ wasété zô si asima 're irob'ruiwapari za'ra wa'aba mono zé hã, duré danhipai u asibro pese na 're aihâimana za'ra wa'aba mono da, marĩ zô si asima 're i'asõpré wa'aba mono zé hã. Ãne hã 'Re ihâimana u'âsi mono ma, wẽ õ di, marĩ zô i'upana asima 're irob'ruiwapari za'ra wa'aba mono zé hã. Tahawa, te za tô uburé aiwasédé hã asiwi 're i'uprosi pese za'ra wa'aba mo, aiwi 're si'utõrĩ pese za'ra wa'aba mono wa, 're anomro wẽ wa'aba mono da oto.

2 Timotiu 3:2

Ãne dahâimanazé hã za: Dasima si te za marĩ zô 're danhopré. Duré rob'uiprazéb zô si te za da te dasima 're rob'ruiwapari za'ra. Duré 'râwi dapẽ'ẽ na, te za marĩ na dasina 're dawata za'ra. Duré te za da te dasima 're nharĩ wasété za'ra. Duré marĩ na dama 're danhoprub za'ra mono nherẽ, danhoprum na da'ãma 're dawata za'ra mono õ di za. Duré damama norĩ nhimiroti hã da te 're wapari za'ra mono õ di za. Duré 'Re ihâimana u'âsi mono nhimiroti hã da te 're wazéb za'ra mono õ di za.

Hebreu 13:5

Rob'uiprazéb zawizé, te te aima 're roti za'ra wa'aba mono tõ da, tãma asina 're rowairébé za'ra wa'aba mono õ di za. Asibro hã aima 're ihâimana za'ra wa'aba mono na si, te za asima 're irowẽ za'ra wa'aba mo. Duréihã 'Re ihâimana u'âsi mono hã ma tô ãne dama sina ropisutu: “Niwamhã te airẽme za'ra wa'aba õ di za. Duré asiwaprosi 're aihâimana za'ra wa'aba mono da, asiti za'ra wa'aba 're ĩhâimana waihu'u mono õ di za.”

Zozué 7:21

Marĩ hã te iwaibu za'ra 'remhã, wa tô Babilonia hawi da'uza ihâpa iwẽ hã 'madâ. Duré ẽtẽ waipo prã prata zama wa tô 200 na iwa'õno hã 'madâ, duré ẽtẽ waipo pré oru aiwa ãma isipo'o na ipire pibuzém na hã. Ã norĩ hã ĩma 'ruiwapari za'ẽtẽ wa, wa tô ĩsima sa'ra za'ra. Ĩte romhâ 'manharĩ na 'ri 're, te daba'wara simi'uri pese na, ti'ai 'rowi. Da'rowimhã prata hã te duré daba'wara.

2 Pedru 2:14

Senai'õ na rowasu'u'wa norĩ hã te pi'õ iwasété norĩ zô te te 're rob'madâ'â u'âsi za'ra. Ta norĩ ma hã wẽ za'ra di, tiwasédé hã te te ãma 're i'manharĩ u'âsi za'ra mono zéb da hã. Hâimana nhipese na te ta norĩ hã 're nomro, da te ãma 're sasõmri za'ra mono da. Tawamhã ni'wam norĩ hã siptete sina Wanhib'apito ãma 're nomro mono õ wamhã, te za ta norĩ ãma te te 're sasõmri za'ra. Duré senai'õ na rowasu'u'wa norĩ hã te tinhimarĩ wẽ zô si, te te sima 're rob'ruiwapari u'âsi za'ra. Tahawa, ta norĩ hã tãma wẽ õ di, 'Re ihâimana u'âsi mono ma hã.

2 Pedru 2:3

Tô senai'õ na rowasu'u'wa norĩ hã te za taré rob'uiprazéb zô, tinhimirosa'rata na si, marĩ na te te aima 're rowasu'u za'ra wa'wa. Tane nherẽ, ta norĩ hã iwasété na 'Re ihâimana u'âsi mono ma, waihu'u pese di. Tahawa, isimihâzé wi, 're sisõ'reptu waihu'u za'ra mono õ di za.