Luca 11:9 - ꞌRe Ihâimana Uꞌâsi Mono Zadawa Wasuꞌu

^9-10 Tahawa, 'Re ihâimana u'âsi mono wi, te za iwẽ hã 're iwaptẽrẽ u'âsi za'ra wa'aba mo. Tawamhã te za tô te te aima 're anhomri 'wa. Iwẽ zô si te za duré asima 're asõpré u'âsi aba mo. Tawamhã taha zarina te za tô te te aima ãma 're a'uwaimrami 'wa, 'Re ihâimana u'âsi mono hã, 'râwi aima 're hâimana za'ra wa'aba mono da. Duré ni'wa hã 'ri tede'wa zô, te te 're i'ridawa ta'a mono ne, te za iwẽ hã tiwi 're iwaptẽrẽ za'ra wa'aba mo. Tawamhã 'ri tede'wa te te tãma i'ridawa ne, te za tô te te aima 're anhomri 'wa, iwẽ hã, 'Re ihâimana u'âsi mono hã.

Luca 11:9 ပူးပေါင်းရင်းမြစ်များ

Salmu 118:5

Te irobzépata 'remhã, wa tô Uburé Danhib'apito wi hã rowaptẽ. Tahawa, ma tô ãma ĩzada'â. Ma tô duré te irobzépata za'ẽtẽ hawimhã ĩwaze.

Salmu 34:10

Hu'u zérépa norĩ wi, isa zô tiwi 're ro'wanhi'riti za'ra mono wamhã, te za mra hã te te 're sépata za'ra. Tanei õ di, Uburé Danhib'apito nhimipawaptobzéb zô sima 're isõpré mono norĩ wi hã, tiwi sô 're robaba za'ra mono õ di, marĩ zô.

Salmu 34:4

Wa hã, Uburé Danhib'apito nhimipawaptobzé te tiwi waptẽrẽ wamhã, ma tô ãma ĩzada'â. Ĩpahi wamhã, ma tô ĩnho'reptu.

Daniéu 9:3

Ĩma robzei'õ zarina, da'uza ihâi hâza'õtõ na wa tô ĩsi'uza. Taha wa, wa tô duré 'ru'a wa nhamra. Ĩsa hã wa tô duré tirẽ. Wa tô Uburé Danhib'apito 'Re ihâimana u'âsi mono ma, sa'ẽtẽ mre, te tiwi iwaptẽrẽzé te te ĩma 'manharĩ da.

Mateu 21:22

'Re ihâimana u'âsi mono hã 're umnhasi za'ra wa'aba mono sina, marĩ na tiwi 're rowaptẽrẽ za'ra wa'aba mono wamhã, tô sena te za te te aima ãma 're a'uwaimrami 'wa.

Mateu 21:31

— E 'wa hã tawamhã, timama te te sina isaze hã te te tãma irob'ruzéb uwaibaba, imorĩ da hã. E idub'rada. E ino. — Ãne ma tô Zezusi hã ãma sadanharĩ za'ra, 'Re ihâimana u'âsi mono ma, da'ãma romhuri'wa norĩ nhib'apito norĩ hã, duré zudeu norĩ ma rowahutu'wa norĩ hã. Tawamhã asa te tãma nharĩ za'ra, ãne: — Dama ipoto'rada ma tô timama mreme hã sina saze. Tawamhã Zezusi te duré ãne tãma rowasu'u za'ra: — Tane tô. Tane duré, danhib'apito ma rob'uiprazé arĩ ubumroi'wa norĩ hã duré pi'õ hã aibâ zô si siwa'ru 're ihâimana za'ra mono norĩ hã, ta norĩ hã aré 're hâimana wasété za'ra mono nherẽ, ãté te za 're sisisi, 'Re ihâimana u'âsi mono, da'ãma 're isib'a'uwẽ mono zéb u hã, ta norĩ si tô sena na te te 're sazei pese za'ra mono wamhã. Tane nherẽ, a norĩ wa'wa hã ãté dame 're asisisi aba mono õ di za. Tô sena, wa ãne na hã aima waihu'u siromo za'ra wa'wa.

Mateu 6:29

Tane nherẽ, dama 'madâ'â zei uptabi di, romnhirãrã hã. Apito Saloma hã sibro pese wa, uza wẽ uptabi na 're si'uza mono nherẽ, taha nhipai u, dama 'madâ'â zei uptabi di, romnhirãrã hã.

Marcu 11:24

Tahawa, wa aima waihu'u za'ra wa'wa. 'Re ihâimana u'âsi mono ma, 're aimreme zusi aba mono wamhã, duré marĩ na tiwi 're rowaptẽrẽ za'ra wa'aba mono wamhã, za te te ãma aima 're i'a'uwaimrami aba mono zém na, te za ãma 're isaze za'ra wa'aba mo. Tawamhã te za tô te te ãma aima 're a'uwaimrami u'âsi 'wa.

Marcu 13:37

Ãne hã aima si, te waihu'u za'ra wa'aba õ di. Uburé ĩzazei'wa norĩ udâna zama, wa aima waihu'u siromo za'ra wa'wa, asimiza'rese, ĩzô 're asimipari za'ra wa'aba mono da.

Zuwã 14:13

Tahawa, uburé marĩ hã te aima 're iwẽ za'ra wa'aba mono zéb uwaibaba si, te za tiwi 're irowaptẽrẽ za'ra wa'aba mo, Ĩmama wi, ĩzadawa para. Tawamhã wa za te aima ãma 're a'uwaimrami 'wa. Ĩwi zama ĩzadawa para, ĩwi 're rowaptẽrẽ za'ra wa'aba mono wamhã, wa za te aima ãma 're a'uwaimrami 'wa. E marĩ da. Ĩmama ãma 're aiwata za'ra wa'aba mono da, wa hã i'ra te aima ãma 're a'uwaimrami aba mono wa za.

Zuwã 15:16

A norĩ wa'wa hã asima ĩwẽ na'rata za'ra wa'aba õ di, ĩsiré 're anomro aba mono da. Wa hã wa tô ĩsima aiwẽ na'rata za'ra wa'wa, ĩsiré 're anomro aba mono da. Wa tô duré aipisutu za'ra wa'wa, datẽme 're anomro aba mono da, da'ãma asimiromhuri 'wa hã ĩma ãma 're uwaimrami za'ra wa'aba mono da. Tawamhã asimiromhuri za'ra wa'aba na hã robaba õ di za. Ãne wamhã, Ĩmama te za te te 're aiwapari u'âsi za'ra wa'wa. Tawamhã uburé marĩ hã te te aima 're iwẽ za'ra wa'aba mono zéb uwaibaba si, tiwi 're rowaptẽrẽ za'ra wa'aba mono wamhã, te za te te aima ãma 're a'uwaimrami 'wa.

Zuwã 15:7

A norĩ wa'wa hã te za ĩ'ãma 're aihâimana u'âsi za'ra wa'aba mo, 're anomro wẽ wa'aba mono da. Tawamhã Ĩmama hã te za te te 're aiwapari u'âsi za'ra wa'wa, tiwi 're irowaptẽrẽ za'ra wa'aba mono zém na hã. Tawamhã tiwi 're iwaptẽrẽ za'ra wa'aba mono zéb uwaibaba, te za tô te te aima ãma 're a'uwaimrami 'wa.

Zuwã 4:10

Tahawa, ma tô Zezusi hã asa tãma tinha, ãne: — 'Re ihâimana u'âsi mono nhoprubzé hã waihu'u 'wa'âhã, duré ĩwaihu'u 'wa'âhã, te aré â hã ĩwi iwaptẽ. Tawamhã â u'â hã wa aré aima tisõ.

Roma 2:7

Ni'wam norĩ si te marĩ hã simi'ẽ na te te dama 're 'manharĩ u'âsi za'ra, iwẽ hã. Ta norĩ hã 'Re ihâimana u'âsi mono si te te 're wẽsãmri za'ra mono da, te sina 're simipari za'ra, duré i'rata 're isi'ubumroi u'âsi mono zé, te te tãma 're apisutu mono da. Ta norĩ ma si, te za tô 'Re ihâimana u'âsi mono hã te te 're apisutu, 're isi'ubumroi u'âsi mono zéb da hã, i'rata.

2 Corĩtu 6:2

Duréihã Izaia hã ma tô 'Re ihâimana u'âsi mono mreme na rob'ui'éré, ãne: “Ai'ãma ĩpẽ'ẽzézéb da, bâdâ te ĩsima ipisutuzém na, wa tô aiwapa. Te i'asõ'reptuzéb da, bâdâ hã iwa waptã'ã wamhã, wa tô aipawapto tô.” Ma'ãpé, ĩwapari pese za'ra wa'aba. Bâdâ ma tô oto iwa waptãrã, 'Re ihâimana u'âsi mono nhimizawi pese zé hã asi'uihâ na asima tiwi waptẽrẽ za'ra wa'aba da, duré te te asõ'reptu za'ra wa'aba da.

Hebreu 11:6

Ni'wam norĩ hã 'Re ihâimana u'âsi mono te te sina 're umnhasi za'ra mono õ nherẽ, ta norĩ ma hã, 're toi mono õ di za, 'Re ihâimana u'âsi mono hã. Duré ni'wam norĩ hã 'Re ihâimana u'âsi mono ãma 're wata za'ra mono da, tipẽ'ẽ na 'râwi itẽme 're sihutu mono da, te te sima 're wẽ za'ra mono wamhã, tô sena 're ihâimana mono na, te za te te 're saze za'ra a'â. Duré 'Re ihâimana u'âsi mono zô si 're isõpré mono norĩ ma, iwẽ na za te te ta norĩ ma iwa'âbâ za'ra na, te za ta norĩ hã te te sina 're umnhasi u'âsi za'ra.

Hebreu 4:16

Tahawa, wasina 're wahâtâ'â za'ra mono ãna, wa za tô 'râwi wapẽ'ẽ 're, 'Re ihâimana u'âsi mono u 're wasihutu, da'ãma 're siwãrĩ mono da, te te 're ida'ab'madâ'â u'âsi mono u hã. Wa'uburé te te 're wa'wapé za'ra mono ré, wa'ãma 're siwamri mono da, duré wa'ãma 're siwãrĩ mono da, wa za ãhã ré wapẽ'ẽ 're, itẽme 're wasihutu u'âsi, 'Re ihâimana u'âsi mono u hã.

Tiagu 1:5

'Re ihâimana u'âsi mono hawi, dahâimanazém na rowaihu'u ré 're aihâimana za'ra wa'aba mono õ wamhã, te za asima tiwi 're irowaptẽrẽ za'ra wa'aba mo, ta hã sõpru uptabi wa. Duré uburé ta hã dama marĩ wẽ nhomri'wa. Ãne wa, tiwi 're irowaptẽrẽ za'ra wa'aba mono zéb uwaibaba, te za te te aima 're sõmri za'ra wa'wa, dahâimanazém na rowaihu iwẽ uptabi hã.

Tiagu 5:15

Tawamhã Wanhib'apito umnhasi sina te te tiwi rowaptẽrẽ za'ra wamhã, Wanhib'apito te za tô sõ'reptu, ihâzé ré hã. Te za tô duré pese. Duré ihâzé ré hã tiwasédé te te 're ab'manharĩ mono nherẽ, iwasédé te te ãma 're ab'madâ'â mono õ di za tô oto.

1 Zuwã 3:22

Duré, isimiroti hã wa te 're 'madâ'â pese za'ra mono wamhã, te te wama 're i'awẽ mono zéb uwaibaba si 're wahâimana za'ra mono wamhã, wa te tiwi 're irowaptẽrẽ za'ra mono zéb uwaibaba si, te za uburé marĩ hã iwẽ te te wama 're anhomri.

Apocalipsi 2:24

“Pi'õ nhimiroti 're iwapari za'ra wa'aba mono õ norĩ ma si, wa za oto aima waihu'u za'ra wa'wa, ĩzazei uptabi 'wa norĩ ma si. A norĩ wa'wa hã Satanasihi nhimiroti sima'uri pe hã dawi waihu'u za'ra wa'aba õ di. Tô sena, wa aima waihu'u za'ra wa'wa. Te oto aima ãma sahu za'ra wa'aba õ di za, ĩnhimiroti i'amo na hã ipire na hã, te te 're asi'wa'rutu tõ za'ra wa'aba mono da.