Luca 10:42 - ꞌRe Ihâimana Uꞌâsi Mono Zadawa Wasuꞌu

⁴² Marĩ hã misi iwẽ hã asima pisutu õ di. Ta hã ma tô Mariaha si sima pisutu. Tahawa, ni'wa hã iwẽ hã te te tiwi âri õ di za, te te iwaparizé hã.

Luca 10:42 ပူးပေါင်းရင်းမြစ်များ

Salmu 119:111

Asimiroti hã te ĩnhimarĩ pese zém ne hã õne u'â ĩma 're hâimana. Ta hã te duré 're ĩpẽ'ẽ toi mono zém na ĩma 're hâimana.

Salmu 119:30

Wa hã wa tô ĩsima pisutu, sena na bâdâdi 're ihâimana mono zém na si 're ĩmorĩ da. Asimiroti na 're irowaihu'u mono zém na si 're ĩmorĩ da hã, wa tô duré ĩsima te 're rowairébé.

Marcu 8:36

Ãté ni'wa hã te za tinhibro hã te te sima 're a'ubumroi pese, sibrob ahâ uptabi da. Tawamhã te za oto dârâ. Ti'ab ré sibrob ahâ nherẽ, e tãma 're rowẽ mono di za, rowẽ isi'utõrĩ'õ hã te te sina 're uwaimrami mono õ wamhã. Mare di. Tãma 're rowẽ mono õ di za. Ti'ai ãma simarĩ ahâ uptabi nherẽ, tãma waihu'u õ di za, marĩ na isiwa'âbâzéb da hã, rowẽ ãma 're ihâimana mono zéb da hã.

Luca 10:39

'Ri para u sisisi wamhã, ma tô Maria hã Zezusihi 'rata nhamra, ti'a, isimirowasu'u hã te te wapari da. Martaha no, Maria hã.

Luca 11:1

Tawamhã nimahã bâtâ na, te Zezusi hã nhamra, Timama ma, mreme da. Tãma mreme pari, ma tô misi isiré 're inomro mono norĩ hã 'mai'mahâ, ãne: — Wanhib'apito, ma'ãpé wama waihu'u za'ra na, 'Re ihâimana u'âsi mono ma, 're iwamreme zusi mono zéb da hã, wa te waihu'u za'ra da. Zuwã hã tinhimi'ubumro norĩ ma, te te iwaihu'u ne, te za wama iwaihu'u za'ra, wa te wasiwi waihu'u da.

Luca 12:20

Tahawa, te 'Re ihâimana u'âsi mono hã tãma tinha, ãne: “A hã ma tô ãma i'upa za'ẽ, asimirosa'rata na. Ã bara na te za atâ. Atâ'â wamhã, e 'wa te hã za oto asimarĩ hã, asima si 're i'a'ubumroi pese mono hã.”

Luca 12:33

Tahawa, te za uburé asimarĩ hã dama iwede za'ra wa'wa, iwa'âbâ zô, isimarĩ'õ norĩ ma, sõmri aba mono da. Tawamhã asimarĩ hã isi'utõrĩ'õ hã te za hâiwa ãma asô 're hâimana u'âsi za'ra wa'wa, wẽ u'âsi na. Tame, isipsaihuri norĩ hã sô 're sisisi waihu'u mono õ di za. Tame duré, da'uza hâzapu'u'wa hã 're hâimana za'ra mono õ di. Ti'ai ãma asimarĩ ahâ zô si 're rob'ruiwapari za'ra wa'aba mono wamhã, taha na si te za aipẽ'ẽ 're, asima 're irosa'rata u'âsi za'ra wa'aba mo, hâiwa ãma iwẽ hã isi'utõrĩ'õ upana. Duré hâiwa ãma iwẽ uptabi zô si, asima 're rob'ruiwapari za'ra wa'aba mono wamhã, taha na si te za asima 're irosa'rata u'âsi za'ra wa'aba mo, 'Re ihâimana u'âsi mono hã iwẽ hã te te asô 're i'apisutu aba mono zô si.

Luca 16:2

Tahawa, te sô hâ, tãma irob'madâ'â'wa zô. Taha wamhã, te tãma tinha, ãne: “Aiwasu'u hã wa tô wapa. Ĩma 're irob'madâ'â mono zé hã, tâibâ za oto. Te za rob'ui'éré hã oto ĩma isõ, uburé ĩnhimarĩ na 're irob'ui'éré mono zé hã.” Ãne te tãma tinha, tite rob'madâ'â'wai ma.

Luca 16:25

— Tahawa, ma tô Abra'ã hã asa tãma tinha, isibro pese ma, ãne: “Ĩnhihudu, aihâiba ré, aima 're rowẽ mono di. Uburé marĩ iwẽ hã ma tô asô 're simi'wara. Lazaru ma hã, marĩ iwasétére si, ma tô da te tãma 're sõmri za'ra. Ãhã na hã rowẽ na te oto 're hâimana. A hã te oto tô ropipa hã 're isépata mo.

Luca 18:22

Isihâimanazéb 'rãzarõno hã te te wapari wamhã, te asa tãma tinha, ãne Zezusi hã: — Tane nherẽ, misi te zahadu aihâimanazéb zô aiwi rowaptâ. Ma'ãpé, uburé asibro hã dama wede mono, iwa'âbâ zô, isibrob'õ norĩ ma, sõmri mono da. Tawapsi, asibro pese di za, hâiwa ãma hã. Asibro hã dama wede mono parip si, te za apâ we ĩtẽme aimo, ĩsiré 're aimorĩ da oto.

Luca 8:18

— Tahawa, ma'ãpé ĩmreme hã 're wapari pese za'ra wa'aba mono. Tawamhã ĩzadawa wasu'u hã te za te te aima 're waihu'u za'ẽtẽ za'ra wa'wa, 'Re ihâimana u'âsi mono hã. Ĩmreme hã 're wapari pese za'ra wa'aba mono õ wamhã, te za apâ te te aiwi 're awaibui wa'wa, ĩzadawa wasu'u hã. Tawamhã ĩmreme waihu'u'wa na, 'râwi 're asi'madâ'â ze za'ra wa'aba mono nherẽ, te za ĩmreme waihu'u'õ'wa ne, oto 're anomro aba mo.

Zuwã 11:1

Tawamhã aibâ hã te 're hâimana, Lazaru na isisi hã, Betãnha na 'ri wa'õtõ nhisi ãma. Tame te duré ihidiba norĩ hã 're simasisi zahuré Maria norĩ hã, Martaha me. Maria hã niwapsi te za Zezusihi hã para u'ré, wedewa'u zadaze na, tãma rowẽ da. Taha parip si te za duré para u'õ, tizéré na hã. Tawamhã ma tô tihâzé, Lazaru hã. Hâzé wa, ma tô ihidiba norĩ hã da'mazatõrĩ zahuré, Zezusihi zô da'maimorĩ da, ihitébré zahuré hã te te tãma 'maiwasu'u da. Itẽme wisi wamhã, ãne te Zezusihi ma wasu'u: — Apito, aibâ 're isawi pese mono hã ma tô tihâzé.

Zuwã 12:3

Tawamhã Maria hã ma tô we ti'â, wedewa'u isadaze hã. Nadu na wedewa'u nhisi hã. Ta hã iwa'âbâ wawẽ. Zezusihi zô te we ti'â, te te ãma para u'ré wa, tãma rowẽ da. Tawamhã te te ãma para u'ré pari wamhã, ma tô para u'õ, tizéré na. Sadazei pire wa, ma tô 'ri 're zadaze sina.

Zuwã 17:3

A hã misire Danhib'apito uptabi. Wa hã Zezu Cristu Danho'reptui'wa da, ĩpisudu, we datẽme ĩzatõrĩ. Ãne na, da te 're wawaihu'u za'ra mono wa, da te 're wazazei pese za'ra mono wamhã, robzei u'âsi te za ĩ'ãma 're danomro. 'Re dadâ'â za'ra mono ãna, te za duré 're dasi'ubumroi u'âsi, hâiwa ãma.

Zuwã 4:14

Ĩnhib'â hã te dama 're anhomri mono wa, da te 're âhuri mono wamhã, 'rubu ãna te za iré 're dasi'ubumroi u'âsi. Ub're 're isidototo u'âsi za'ra mono ne, dawi 're si'utõrĩ waihu'u za'ra mono õ di za, da te 're âhuri mono wamhã. Tawamhã 're dadâ'â za'ra mono ãna, te za 're dasi'ubumroi u'âsi, hâiwa ãma.

Zuwã 5:24

— Ĩmreme hã da te 're wapari za'ra mono wamhã, duré we ĩzatõrĩ'wa hã da te dasina 're umnhasi za'ra mono wamhã, te za dapẽ'ẽ na da te sina 're uwaimrami siromo za'ra, rowẽ na 're idahâimana u'âsi za'ra mono zé hã. 'Re ihâimana u'âsi mono nhimihâzé hã da te dasina 're waihu'u za'ra mono õ di za. Te za dapẽ'ẽ na ãma saprĩ siromo za'ra ni, dapẽ'ẽ 're, dadâ'â u'âsi 're idahâimana za'ra mono zém hawi, dapẽ'ẽ 're rowẽ na 're idahâimana u'âsi za'ra mono zéb u hã.

Zuwã 6:27

Dasa hã siwamnarĩ su'u di. Tahawa, taha zô si 're romhuri za'ra wa'aba mono õ di za. Dasa ne isi'utõrĩ'õ zô si, te za 're irob'ruiwapari za'ra wa'aba mo, wẽ na 're ihâimana u'âsi mono zô si. Ta hã rowẽ u'âsi dadâ'â ãna 're idahâimana u'âsi za'ra mono zé, te wasu'u. Wa hã ti'ai ãma dasiré ĩpoto wa, ma tô Ĩmama hã ĩpisutu, isadawa para te dama 're anhomri mono da, rowẽ u'âsi 're idahâimana u'âsi za'ra mono zé hã.

1 Corĩtu 13:3

Duré uburé ĩnhibro hã isibrob'õ norĩ ma, te tãma 're anhomri mono nherẽ, ĩnhimizawi pese zé hã ĩma 're ihâimana mono zarinai õ wamhã, aré tô tarére hã, dama ãma 're ĩnhoprub mono zé hã. Duré isazei'wa 're ĩhâimana mono wa, da te 're ĩ'ruiwapari mono zéb zarina, da te dasiwi ĩzata da, duré dawi ĩsihâiba zawi õ nherẽ, tane nherẽ, aré duré tarére, ĩnhimi'manharĩ wẽ zé hã, ĩnhimizawi pese zé ĩma 're hâimana mono õ wamhã.

Galata 5:6

Simisutu Cristu Zezusihi nhib'a'uwẽ oto 're wanomro mono wamhã, 'Re ihâimana u'âsi mono hã te te 're wa'aba'a mono õ di za, isihâiwata nhihâri ré norĩ hã, duré isihâiwata nhihâri õ norĩ hã. Zudeu na duré zudeu'õ na 're iwahâimana za'ra mono zém na hã, te te oto 're wa'awaihu'u mono õ di za. Zezu Cristu Danho'reptui'wa na, wa te wasina 're umnhasi za'ra mono wa, wanhimizawi pese na 're iwahâimana za'ra mono zém na si, te za oto te te 're wa'awaihu'u, 'Re ihâimana u'âsi mono hã.

Zozué 24:15

Tane nherẽ, Uburé Danhib'apito ma, 're anomro aba mono da, asima wẽ za'ra wa'aba õ wamhã, ãhã na awa'awi na hã asima pisutu za'ra wa'aba, nimahã ãma si 're anomro aba mono da wamhã. Niha hã wamhã, te za tô asima irowairébé za'ra wa'wa, aihi'rata norĩ hã Mezopotãmia ãma, ihâiba'õ ãma 're iwata za'ra mono ma si 're anomro aba mono da hã, niha wamhã, amoreu norĩ te ihâiba'õ norĩ ma hã, ã hã ti'ai 're, 're ihâimana za'ra mono zéb ãma hã. Tane nherẽ, wa za tô wa norĩ hã wanhorõwa 're, 're iwahâimana za'ra mono norĩ hã Uburé Danhib'apito ãmap si 're wanomro.

Zozué 24:22

Tahawa te Zozué, duré ãne tãma nharĩ za'ra: — Asisõ'a za'ra wa'aba ma tô 'râwi asima ipisutu za'ra wa'wa, Uburé Danhib'apito ãma 're anomro aba mono da hã. — Ĩhe, wa norĩ hã wa tô wasisõ'a wasima pisutu za'ra ni! — Ãne ma tô ãma tãma wa'rãmi za'ra.