Luca 10:34 - ꞌRe Ihâimana Uꞌâsi Mono Zadawa Wasuꞌu

³⁴ Tahawa, ma tô itẽme mo. Ma tô 'wa're upsõ, rob'rãi wa'u isé na. Taha pari, ma tô 'wa're u'ré, rob'rãi wa'u na, iwab ré na. Te te u'réi parimhã, ma tô 'wa're ubu. Taha pari, ma tô tinhimizama ba nhisiwi tihi, 're idanhimi'wara mono zéb u te te hiri da. Tame te 'madâ, a'â.

Luca 10:34 ပူးပေါင်းရင်းမြစ်များ

Zenezi 42:27

Tawamhã isimi'warazéb da, isimizahâri za'ra zéb u oto sihutu wamhã, ma tô nima hã tite sa'u hã wata wasihu, tinhimizama ma, te te tãma a da, ĩsa hã. Tahawa, sa'ui wata ãma rob'uiprazé amnho zu inomro hã ma tô tisã.

Ezodu 4:24

Tawamhã Ezitu u si'aba'réi wa, Mozési ti'ra norĩ ré rowãi wa sõtõ wamhã, ma tô Uburé Danhib'apito hã itẽme wi. Ãhã wa, ma tô duré aré tiwĩ.

Marcu 14:8

Pi'õ hã ma tô i'uwaibaba tô ĩma 'manha, iwẽ hã. Ã hã ĩdâ'â wana ré, ma tô ãma ĩhâiba zadaze, da te iré ĩnherẽzéb u.

Luca 10:33

Tawamhã te duré aibâ hâiba amo hã iwa'wai baba mo, darob amoi u morĩ da. Ta hã, samaritanu. Ta hã ma tô 'madâ, aibâ ihâzé ré hã. Te te 'madâ'â wamhã, ma tô ãma tipẽ'ẽzé.

Luca 10:35

Tawamhã awẽmhã, rob'uiprazé hã ma tô 'ri tede'wai ma tisõ, maparane isapotore hã, ẽtẽ waipo prã prata 'manharĩ hã. Te tãma tinha, ãne: “Ĩzô 'madâ'â pese. Apâ we ĩmorĩ wapsi, wa za aima wa'âbâ 'rãsutu, iwab õ wamhã, rob'uiprazé hã.” Ãne ma tô 'ri tede'wai ma tinha, samaritanu hã. Ãne samaritanu wasu'u hã.

Roma 12:20

Duré ãne 'Re ihâimana u'âsi mono nhimiroti amo na rob'ui'éré wasu'u hã: “Asitob'ru norĩ hã mra te te 're sépata za'ra mono wamhã, isa na te za 're ipawaptob za'ra wa'aba mo. Duré 'rubu wamhã, te za tãma 're i'õb za'ra wa'aba mo. Ãne zarina, asitob'ru norĩ ma, 're 'manharĩ wẽ za'ra wa'aba mono wamhã, ta norĩ hã 'râwi 're siwaihu'u za'ra mono wa, te za aima 're siséb za'ra wa'wa.” Ãhã zarina si te za dama 're i'manharĩ wẽ u'âsi za'ra wa'aba mo. Tahawa, a norĩ wa'wa hã 'râwi asi'uihâ na 're asi'ruiwa'âbâ za'ra wa'aba mono õ di za.

1 Tesalonita 5:15

Ni'wai ma iwẽ'õ hã da te 'manharĩ wamhã, te za 're asipawaptob za'ra wa'aba mo, asa marĩ iwẽ'õ hã dama 're 'manharĩ za'ra wa'aba mono tõ da. Marĩ iwẽ'õ hã da te aima 're 'manharĩ za'ra wa'aba mono nherẽ, iwẽ na si te za 're asipawaptob za'ra wa'aba mo, asa tãma ãma 're wa'rãmi za'ra wa'aba mono tõ da. Iwẽ na si te za asima 're i'manharĩ u'âsi za'ra wa'aba mo, asiré isazei'wa norĩ ma. Uburé te za dama 're i'manharĩ wẽ u'âsi za'ra wa'aba mo, a'uwẽ mono bâ.